Liivuru Anaawiili a Matharihelo
17 Voocharela Yehosafati, mwanawe, aakhala mwene mu nipuro nawe nave aalipiha olamulelo awe ntakhara Isarayeli. 2 Owo aahaahelamo anakhoco mu ipooma soothene soolipihiwa sa o Yuta ni anakhoco mu elapo yo Yuta ni mu ipooma soothene sa Efraimu seiho Asa, apapa awe yaakunxaaya. 3 Yehova aari ni Yehosafati woona wi owo aaneeca mu iphiro seiho Tavite, nikholo nawe eenceiyemo khalai nave haawaamvye Apaala. 4 Owo aanamwaavya Muluku a apapaawe nave aanachariha* malamulo awe, ohiya meerelo a Isarayeli. 5 Yehova aalipiha omwene mmatani mwa Yehosafati; nave Yuta oothene aanamvaha samahala, ophiyerya wi owo aakhalano muhakhu muncipale ni ncicimiho nawaaca. 6 Owo aari oolipa murima acharihaka iphiro sa Yehova nave ophiyerya wi aaviihamo mapuro oocukhuwa ni miri saweelihiwa* o Yuta.
7 Mu eyaakha yaneeraru ya olamulelo awe aawiichana asitokweene awe, Penihaili, Opatiya, Sakariya, Netaneli ni Mikaiya, wi ehusiheke mu ipooma so Yuta. 8 Yaayawo ni yoowo Alevi ala: Semaiya, Netaniya, Sepatiya, Asayeli, Semiremoti, Yehonata, Atoniya, Topiya ni Topi-atoniya. Alipa a mukucho Elisama ni Yehoramu yaayawo tho. 9 Awo yaapacerya ohusiha o Yuta, emukunxe liivuru a Nlamulo na Yehova; yaaheeceeca miceche soothene so Yuta yaahusihaka achu.
10 Nave omwene woothene wa ilapo soorukurerya o Yuta, waanamoova Yehova nave hiwaawanne ni Yehosafati. 11 Afilisti yaamuruuhela Yehosafati samahala ni ikhorowa ntoko muxokho. Achu o Arape yaamuruuhela ipucepuche seelopwana macikhwi mathanu nameeli ni masana mathanu nameeli,* ipuri seelopwana macikhwi mathanu nameeli ni masana mathanu nameeli* sa munikholani mwaya.
12 Yehosafati aamvira akhalaka ooweryasa, nave aatitelela oteka ipa soolipihiwa ni ipooma sookhapelelamo yoolya o Yuta. 13 Owo aapaka miteko mitokweene mu ipooma so Yuta, nave aakhalano anakhoco, yaawo yaari oowerya o Yerusalemu. 14 Awo yaathukumana mwawiiwanana ni imusi sa makholo aya: O Yuta yaakhalawo ahooleli a makhuuru ncikhwi. Aakhalawo muhooleli Atina vamoha ni yoowo anakhoco oowerya macikhwi masana mararu.* 15 Mu nikhuuru nawe aakhalavo muhooleli Yehohanani, nave ni yoowo yaakhalawo alopwana macikhwi masana meeli ni makhumi mathanu namararu.* 16 Nave tho mu nikhuuru nawe aakhalavo Amasiya mwaana a Sikiri, yoowo iivelenle mukhateiye ntakhara muteko wa Yehova, nave ni yoowo yaakhalawo anakhoco oowerya macikhwi masana meeli.* 17 Nave mu nikhuuru na Penxami aakhalavo Eliyata, mukhoco oowerya, nave ni yoowo yaakhalawo alopwana macikhwi masana meeli* ooreheryeya ni minra vamoha ni iyaakiho. 18 Mu nikhuuru nawe aakhalawo Yehosapati, nave ni yoowo yaakhalawo alopwana ncikhwi nsana nimoha ni makhumi mathanu namararu* ooreheryeya ntakhara ekhoco. 19 Ala yaamurumeela mwene, waahiya ale mwene aakunheiye mu ipooma soolipihiwa o Yuta woothewene