Liivuru Anaawiili a Matharihelo
13 Mu eyaakha ya neekhumi nathanu nararu ya mwene Yeropowamu, Apiya aakhala mwene o Yuta. 2 Owo aalamulela mu iyaakha raru o Yerusalemu. Amama awe yiichaniwa Mikaiya, mwaana amwaamuthiyana a Uriyeli o Kipeya. Nave yaakhalavo ekhoco variyari va Apiya ni Yeropowamu.
3 Mwawiihiiha, Apiya aaya okhoconi vamoha ni anakhoco oowerya ni oovyakihiwa* macikhwi masana maxexe.* Nave Yeropowamu aacimula wi awane ni yoowo arinono alopwana oovyakihiwa,* anakhoco oowerya macikhwi masana mathanu namararu.* 4 Vano Apiya aaheemela vasulu va mwaako Semaraimi, yoowo onakhala makupa a miyaako so Efraimu, nave aloca ariki: “Okiwiriyane weyo Yeropowamu ni Isarayeli oothene. 5 Apwanne nyuwaano hamunasuwela wi Yehova, Muluku a Isarayeli, oomvaha Tavite omwene ntakhara Isarayeli okhala wookhala owo ni anamwane awe, moorweela wa waataana wa maakha?* 6 Nto Yeropowamu, mwaana a Nepati, namuteko a Solomoni, mwaana a Tavite, oomurukunuwela pwiyawe ni ammwareela. 7 Mwawiihiiha, alopwana oohuhula, oohiphwanelela, yaakhala ni yoowo. Nave awo yaahooniherya owerya waya wa Rehopowamu, mwaana a Soolomoni; woona wi Rehopowamu aari mmiravo ni oohikhapeleleya, owo haawenrye okhoma ni yaawo.
8 “Vano nyuwaano munuupuwela wi munanwerya okhumelela phaama owana ni omwene wa Yehova mmatani mwa anamwane a Tavite woona wi pahiru nyuwaano muri muloko mutokweene nave mookhalano asaana amope a ooru yaawo Yeropowamu aapankeiye wi ekhale amiluku anyu. 9 Himwaari nyuwo nwiikanre alipa a mukucho a Yehova, muyareriwo wa Aroni ni Alevi, nave mwaathanla alipa a mukucho anyu, hiiha ntoko achu a ilapo ikina? Muchu vyakala aphiya aruuhaka* emope yeelopwana ni ipucepuche thanu napiili aanawerya okhala mulipa a mukucho a soophwaniherya seiho ihiri amiluku. 10 Vooloca sa hiyaano, Yehova ti Muluku ahu, nave hiyaano hinimunyanyanle, alipa a mukucho ahu, muyareriwo wa Aroni, annamulapela Yehova, nave Alevi annaakhaviherya mmuteko. 11 Awo annapaha mikucho sa soovaha wa Yehova mahiku oothene, wooxiixelo ni oxekuwa, vamoha tho ni sawunkhela. Ipaau sootheteiwa* iri va emeesa ya ooru aphaama, nave awo annapariha muthiko wa ooru ni onyaari aya waasekuwaka. Woona wi hiyaano ninnathokororya murici ahu ntakhara Yehova Muluku ahu, nto nyuwaano moomunyanyala. 12 Vano nkoonani! Muluku eeparipari ori ni hiyaano, anihoolelaka, vamoha tho ni alipa a mukucho awe epharenle mapeca, wi evahe eneneeryo ya ekhoco ya owana ni nyuwo. Nyuwo alopwana a Isarayeli, muhiwane ni Yehova, Muluku a makholo anyu, woona wi hamukhumelela phaama!”
13 Nyenya Yeropowamu aahaapheremanya alopwana oculi, eniiha anakhoco awe eri ohoolo wa Ayuta nave yaale yaawiipithenle yaari oculi. 14 Vaavaa alopwana o Yuta yaarukununwaaya, yaahoona wi yaanawaniwano ohoolo ni oculi. Mwa yeeyo yaapacerya okhuwela wa Yehova, eniiha alipa a mukucho yiipaka moovuwa mapeca. 15 Alopwana o Yuta yaakhuwela, okhuwela wa ekhoco. Vaavaa alopwana o Yuta yaakhuwenlaaya, okhuwela weekhoco, Muluku eeparipari aamvootha Yeropowamu vamoha ni Isarayeli oothene vamiithoni va Apiya ni va Yuta. 16 Aisarayeli yaachawa vamiithoni va Yuta, nave Muluku aahaaveleela mmatani mwaya. 17 Apiya ni alopwana awe yaahiwiipha ancipale, nave yaahikhwa alopwana oovyakihiwa* a Isarayeli macikhwi masana mathanu.* 18 Mwawiihiiha, alopwana a Isarayeli yaahuulihiwa muru mu elukuluku yeele, nto alopwana a Yuta yaahooniherya okhala oowerya, woona wi yaanamuroromela Yehova, Muluku a makholo aya. 19 Apiya aatitelela omwiikara Yeropowamu nave akuxa miceche sawe iha: Peteli ni miceche saya soorukurerya, Xesana ni miceche saya soorukurerya, ni Eforoni ni miceche saya soorukurerya. 20 Nave Yeropowamu haakookenle tho okhala oowerya mu elukuluku ya Apiya; voocharela Yehova aamwiipha nave owo aakhwa.
21 Nto Apiya aakhala ooweryaxa. Moovira wa elukuluku aahaathela athiyana khumi naxexe nave aakhala tiithi a anamwane a aasilopwana makhumi meeli napiili* ni aasithiyana khumi nathanu nammoha.* 22 Nave saweereya ikina sa Apiya, saweera sawe ni masu awe, soorempwa mu soorepa sa* Itu mulipa a miririmu.