Liivuru Anaawiili a Matharihelo
25 Amasiya aarino iyaakha makhumi meeli nathanu vaavaa aakhanleiye mwene, nave owo aalamulenle iyaakha makhumi meeli nathanu naxexe* o Yerusalemu. Amama awe yiichaniwa Yehoyatani o Yerusalemu. 2 Owo aaneera yeeyo yaari yawookololowa vamiithoni va Yehova, nto ohiya ni murima woothene. 3 Vaavaa aatikithenryeiye omwene awe, aahiwiipha alapeli awe yaawo yaamwiiphale mwene, apapa awe. 4 Nyenya, owo haawiiphale anamwane aya, woona wi eenreno mwawiiwanana ni yeeyo erempwe mu nlamulo, mu liivuru a Mose, mummo Yehova aalamulenleiye ariki: “Alipa ooyara hanaphwanela okhwa wa nthowa na anamwane, nave anamwane hanaphwanela okhwa wa nthowa na alipa ooyara; mmoha ti mmoha onaphwanela okhwa wa nthowa na yoocheka awe.”
5 Nave Amasiya aahaathukumanya alopwana oothene o Yuta aarehererya mwawiiwanana ni ichoko sa makholo aya, moorweela wa ahooleli a nikhuuru ncikhwi ni ahooleli a nikhuuru nsana, wa Yuta oothene ni Penxami. Owo aahaarepela achu a iyaakha makhumi meeli oyaaka ohoolo nave oona wi yaakhalavo anakhoco oovyakihiwa* macikhwi masana mararu* wi eye okhoconi, yaawerya opharihela nivaka ni eyaakiho etokweene. 6 Ohiya yeeyoru, owo aahaawopa anakhoco oowerya o Isarayeli macikhwi nsana nimoha* aaliva italentu* nsana nimoha. 7 Nyenya, muchu mmoha a Muluku eeparipari aaya wa yoowo nave alocano ariki: “Muhineera mwene, muhaahiye wi anakhoco o Yerusalemu yoochareeni, ntakhara Yehova hari ni Isarayeli, naari mano hari ni mmoha a Efraimu. 8 Pahiru mpwahe mukhatiinyu; mweerevo echu nave mukhale oolipa murima okhoconi. Mwaheerano yeeyo, Muluku eeparipari onanweerihaani ovoothiwa vamiithoni va amwiicani, woona wi Muluku ookhalano owerya wa okhaviherya ni weeriha ovoothiwa.” 9 Mwa yeeyo, Amasiya aamukoha muchu a Muluku eeparipari: “Hanka vooloca sa italentu nsana nimoha seiho kaalimvaakano anakhoco o Isarayeli?” Muchu a Muluku eeparipari aamwaakhula: “Yehova onamoovahaani sincipale opwaha seiyo.” 10 Mwawiihiiha, Amasiya aahaarowiha atoropa o Efraimu yaawo yaaruule okumana ni yoowo, aalamulela okookela mu ilapo saya. Nyenya awo yaahitepa onyeenyeya ni Yuta nave ekookela mu elapo aya esarasaren’ye.
11 Voocharela, Amasiya aahilipa murima, aahoolela atoropa awe ophiyerya ompopa wa maakha nave weiwo aahiwiipha alopwana macikhwi khumi* o Seiri. 12 Nave alopwana o Yuta yaahaaphara achu awoona ene awaakhwana macikhwi khumi.* Mwawiihiiha, awo yaahaakeriha omuthomani wa mwaako nave yaarihela vathi ovinyerya va mwaako vaavale, oothene yaanyaanyeya. 13 Nto nikhuuru na atoropa nenlo Amasiya aarowinheiye wi nihiyewo okhoconi ni yoowo, naahiphela ipooma so Yuta, ovinyerya o Samariya ophiyerya o Pete-heromi; ewiipha achu macikhwi mararu* nave ekuxa ichu sincipale.
14 Mwawiihiiha, vaavaa Amasiya aakonkeiye, amanle owiipha a Etomi, aahaaruuhawo amiluku a achu o Seiri, aatikitherya ntakhara yoowo ntoko amiluku nave apacerya waakokhorela ni ovaha mikucho ntakhara yaawo. 15 Mwa yeeyo, Yehova aananariwa ni Amasiya nave aamurumiha mulipa a miririmu, yoowo aalonce ariki: “Ntakhara heeni munaacharaanyu amiluku a achu yaala, yaawo ahiwenrye waavuluxa achu aya mmatani mwanyu?” 16 Vaavaa owo aaloceiye, mwene aaloca ariki: “Apwanne nohoothanla okhala namiruku a mwene? Omaale oloca! Onachuna okhwa?” Mwa yeeyo, mulipa a miririmu aamaala, nto aaloca ariki: “Koosuwela wi Muluku oolakelela wooruhelaani epahu, wa nthowa na weerano yeela ni ohiwiriyana miruku saka.”
17 Amanle waakoha anamiruku awe, Amasiya, mwene o Yuta aarumiha michaka iha wa Yowasi, mwaana a Yowakasi, mwaana a Xewu mwene o Isarayeli ariki: “Orwe, nawane.”* 18 Mwene Yowasi o Isarayeli aarumiha michaka iha wa Amasiya Mwene o Yuta ariki: “Mwiri mmoha wa miiwa wo Liipano waarumihela michaka mwiri wa seetru wo Liipano: ‘Okivahe mwanaa amwaamuthiyana wi mwanaka amuthele.’ Nto mwaasinama amutakhwani o Liipano aavira vaavale waarivo mwiri wa miiwa nave anyikalela. 19 Weyaano oriye: ‘Miyaano koomvootha* Etomi.’ Wa nthowa na yeeyo murimaa onniirumiha nave onachuna waakhela ncicimiho. Nto okhale owannyaa* weiwo. Ntakhara heeni waahaalaawe wiihaawiha ni omora, moorweela wa waakuxa Ayuta?”
20 Nyenya Amasiya haanwiriyanne, woona wi ela yaari yookhwela ya Muluku eeparipari. Owo aachuna omveleela mmatani mwa amwiicani wa nthowa na waachara amuluku a Etomi. 21 Mwa yeeyo, Yowasi, mwene o Isarayeli aacimula; owo ni Amasiya mwene o Yuta yaawana ekhoco o Pete-semi epooma yo Yuta. 22 Yuta aavoothiwa ni Isarayeli, nave mmoha ti mmoha aachawela owannyawe.* 23 Yowasi mwene o Isarayeli, aamphara Amasiya, mwene o Yuta, mwaana a Yowasi, mwaana a Yehowakasi* o Pete-semi. Voocharela, owo aamukeriha o Yerusalemu nave aampakela mukuso wa ikoovatu* wa makhumi maxexe mu ixiri so Yerusalemu, o mulako wa Efraimu, ophiyerya o mulako wa ekwantu. 24 Owo aamukusa ooru oothene, eparata, ikaruma soothene saaphwanyeya mu empa ya Muluku eeparipari, vamoha* ni Opeti-etomi, nnipuro na muhakhu na empa* ya mwene ophitaanyerya achu akina. Voocharela, owo aakookela o Samariya.
25 Amasiya, mwaana a Yowasi mwene o Yuta, aakhala nivano iyaakha khumi nathanu amanle okhwa Yowasi, mwaana a Yehowakasi, mwene o Isarayeli. 26 Vooloca sa saweereya ikina sa Amasiya, ovinyerya woopaceryani ophiyerya wookuchulani hirempwale mu liivuru a mamwene o Yuta ni o Isarayeli? 27 Ovinyerya elukuluku yeeyo Amasiya aamuhin’yeiye omuchara Yehova, aavaaneleliwa o Yerusalemu nave owo aachawela o Lakixi, nyenya yaarummwa alopwana omuchara ophiyerya o Lakixi nave emwiipha weiwo. 28 Mwawiihiiha, muruchu awe waaruhiwa oteexiwe ni kavalo nave aavithiwa vamoha ni makholo awe mu epooma yo Yuta.