Mateyu
2 Yesu amanle oyariwa o Petelehemu o Yuteya mmahiku a mwene Heroti,* alipa oovarerya ineneeryo sa itheneeri a makupa onakhumawo nsuwa yaaphiya o Yerusalemu, 2 ekoha: “Ori woowi mwene a Ayuta oyariwe? Nthowa nawi nohoona etheneeri awe nri makupa onakhuma nsuwa, nave nrwenle omucicimiha* yoowo.” 3 Mwene Heroti iiwaleiye yeela, aatepa wuukhuwa, ophitaanyerya achu oothene o Yerusalemu. 4 Owo aahaathukumanya asitokweene oothene a alipa a mukucho ni alipa oorepa, nave aahaakoha nipuro aahaaleiye oyariwawo Kristu. 5 Awo yaamwaakhula: “O Petelehemu o Yuteya, woona wi ti yeeyo erempwe moorweela wa mulipa a miririmu: 6 ‘Weyo Petelehemu, muceche wo Yuteya, hori mukhaanixa mwa ahooleli o Yuteya, mwa weyaano onamuyariwavo mwene, yoowo oni alamuleleke nloko naka Isarayeli.’”
7 Voocharela, Heroti awiichana wiiphiini alipa oovarerya ineneeryo sa itheneeri nave anaakoha mwawiichaalela elukuluku ene yoonen’yaaya etheneeri eyo. 8 Vaavaa aarummeiye oya o Petelehemu, owo aaloca: “Haweni, mwamwaavye phaama mwaana owo, nave mwamphwanya mukooke wi mukileele, wi miyo tho kamucicimihe.” 9 Emanle onwiriyana mwene, yaacimula, nave etheneeri yeeyo yonnaaya eri o makupa onakhumawo nsuwa, yaanaahoolela ophiyerya yeemela nipuro aarivo mwaana. 10 Yonnaaya wi etheneeri yaaheemela, awo yaatepa ohakalala. 11 Yaavolonwaaya mpa, yaahimoona mwaana vamoha ni Mariya, nave awo yaakokhora, emucicimiha mwaana. Awo tho yaahihula mirupa saya, emvaha samahala: ooru, liipanu ni miira. 12 Nyenya, woona wi yaaleeliwa moolohani wi ehikookele wa Heroti, erowaka, yaavinre mphiro mukina.
13 Emanle ocimula, munkeelo a Yehova aahooneya wa Yosefe moolohani, amuleela ariki: “Vinya, omukuxe mwaana ni amama awe, ochawele o Yikuputu. Okhale weiwo ophiyerya elukuluku kineeraaka kooleele, nthowa nawi Heroti onnaavyaavya omwiipha mwaana.” 14 Mwawiihiiha, Yosefe aavinya ohiyu yoole, amukuxa mwaana ni amama awe nave echawela o Yikuputu. 15 Owo aahikhala weiwo ophiyerya okhwa wa Heroti. Ela yaahaakhwaniherya yeeyo Yehova aalonceiye moorweela wa mulipa a miririmu awe, ariki: “O Yikuputu kaamwiichanawo mwanaka.”
16 Heroti, onneiye wi aawokiwa ti alipa oovarerya ineneeryo sa itheneeri, aatepa onanariwa. Owo aalamulela wi yiiphiwe anamwane oothene o Petelehemu ni mmiceche sawaacamela, a iyaakha piili oya vathi, mwawiiwanana ni elukuluku aakonheiye achu yaale. 17 Hiihaa, yaahaakhwanela masu, mulipa a miririmu Yeremiya aalonceiye, ariki: 18 “Onniiweya okhuwela o Rama, wunla ni ikucho. Ti Rakeli onawunlela anaawe, hanamaaliheya, woona wi awo aatholowa.”
19 Amanle Heroti okhwa, munkeelo a Yehova aahooneya wa Yosefe o Yikuputu moolohani 20 nave aaloca: “Vinya, omukuxe mwaana ni amama awe, oye elapo yo Isarayeli, ntakhara wi yaale yaachuna omwiipha mwaana, aakhwa.” 21 Mwawiihiiha, owo aavinya amukuxa mwaana ni amama awe nave aya elapo yo Isarayeli. 22 Nyenya iiwaleiye wi Arkelawu tonalamulela o Yuteya mu nipuro na apapa awe Heroti, aahoova oya weiwo. Mwa yeeyo, amanle olopoliwa moolohani, aaya makupa o Kalileya. 23 Nave aamaka vapooma nsina naya Nasareti, wi ekhwaaniheryeye masu yaalociwe ni alipa a miririmu: “Owo onarwa iichaniwa Munaasareti.”*