Liivuru Anaawiili a Matharihelo
22 Voocharela, achu yaakhala o Yerusalemu yaamweera Akasiya mwaana mukhaanixa a Yehoramu okhala mwene mu nipuro nawe, ntakhara nikhuuru na alipa oohuhula nenlo naarwiile vamoha ni a Arape naahiwiipha anamwane awe oothene awunnuwelavo. Mwawiihiiha, Akasiya mwaana a Yehoramu aahipacerya olamulela o Yuta. 2 Akasiya aarino iyaakha makhumi meeli napiili vaavaa aakhanleiye mwene, nave aahilamulela eyaakha emoha o Yerusalemu. Amama awe yiichaniwa Ataliya, musulwa* a Onri.
3 Akasiya aanachariha tho meecelo a ahima a Akape, woona wi amama awe yaanamuceenyerya weera ichu soonanara. 4 Nave owo aatitelela weera ichu soonanara vamiithoni va Yehova, hiiha ntoko ahima a Akape yeeraaya; woona wi apapa awe emanle okhwa, awo yaahikhala anamiruku awe wi empahule. 5 Owo aahichariha miruku saya nave apwaha ni Yehoramu mwaana a mwene Akape o Isarayeli, wi awanihe ekhoco ni mwene Asayeli o Siriya o Ramoti-kiliyati, weiwo alipa oovonya munra yaamphoreihalaaya Yehoramu. 6 Yehoramu aakookela o Xesereyeli wi yavole makhwaca yaawo aaphoreihiweiye o Rama, vaavaa aawaneiye ni Asayeli, mwene o Siriya.
Akasiya,* mwaana a Yehoramu, mwene o Yuta aakhuruwela o Xesereyeli, wi amoone Yehoramu mwaana a Akape, woona wi owo aaphoreihiwa.* 7 Nto moorweela wa oxekurya yoola wa Yehoramu, Muluku aamuruuhela epahu Akasiya. Vaavaa owo aaphin’yeiye weiwo, aakhuma ni Yehoramu wi yakumane ni Xewu, Musulwa* a Ninsi yoowo Yehova aamuthanlileiye wi atoloxe* echoko ya Akape. 8 Vavaa Xewu aapacenryeiye waakhwaniherya othoriha echoko ya Akape, owo aahaaphwanya ahooleli o Yuta ni anamwane a asinna a Akasiya, akhaviheryi a Akasiya nave awiipha. 9 Voocharela owo aaya omwaavya Akasiya; achu awe yaahimphara o Samariya, weiwo owo iipintheiyewo, emukerihela Xewu nave emwiipha. Ohoolo waya yaamvitha, woona wi yaaloca eriki: “Ola musulwa a Yehosafati, yoowo aamwaamvye Yehova ni murima woothene.” Haavo a echoko ya Akasiya aawerya olamulela omwene.
10 Vaavaa Ataliya, amamaawe Akasiya, yonnaaya wi mwanaya aahikhwa, yaahitoloxa muyareriwo woothene woomwene* wa echoko ya Yuta. 11 Nto Yehosapiyati mwaana amwaamuthiyana a mwene, aamviihavo Yowasi, mwaana a Akasiya, variyari va anamwane a mwene yaawo yaaya wiiphiwa nave owo aamvitha okwartu vamoha ni mulipa oomukhapelela. Yehosapiyati, mwaana amwaamuthiyana a mwene Yehoramu (owo aari mwaara a mulipa mukucho Yehoyata ni murokora a Akasiya), aawerya omvitha wa Ataliya nave owo haawenrye omwiipha. 12 Owo aakhala ni yaawo iyaakha thanu nammoha, iipinthe mu empa ya Muluku eeparipari, vaavaa Ataliya aalamuleleiye elapo.