Salmu
71 Koochawela wa nyuwo, khwoo Yehova.
Kihirwe kuulihiwe muru.
2 Mu wookololowa wanyu mukivuluxe nave mukoopole.
Mutheteye maaru anyu* nave mukivuluxe.
3 Mukhale nipuro noolipihiwa na vamwala wa miyo,
Weiwo kinahaalaaka ochawelakawo ilukuluku soothene.
Mulamulele wi kivuluxiwe,
Woona wi nyuwo muri mwala aka ni nipuro naka noolipihiwa.
4 Khwoo Muluku, mukoopole mmatani mwa achu oonanara murima,
Wa owerya wa muchu oohooxa oohookololowa.
5 Tiwi nyuwo muri ewehereryo aka, khwoo Pwiya Ooweryaxa Yehova;
Kinnoororomelaani nyuwo* ovinyerya omiravo aka.
6 Munnakikhaviherya ovinyerya vaavaa kaayariwaaka;
Nyuwo mukikuminhe mmirimani mwa amama aka.
Kinnoocicimihaani moohihiyererya.
7 Wa ancipale kookhala ntoko yootikhiniha.
Nto nyuwo muri nipuro naka noochawelavo noolipa.
8 Eyano aka yoosareya ncicimiho nanyu;
Nihiku noothene kinnaloca sa ovuwa wanyu.
9 Muhikikhooce mu wuuluvala waka;
Muhikinyanyale vaavaa kinahaalaaka oyeleela ikuru.
10 Amwiicani aka annaloca sa miyo,
Nave yaale anaavya omaliha okumi aka* annakiphakanela,
11 Eriki: “Muluku oomunyanyala.
Mmwiikare nave mumphare, woona wi haavo oomvuluxa.”
12 Khwoo Muluku, muhikhale ocai wa miyo.
Khwoo Muluku aka, murwe mwawaakuveya wi mukikhaviherye.
13 Yaale anakiica* yuulihiwe muru
Nave etoloxiwe.
Yaale anaavya makacamiho aka
Ekhuneeliwe ni munyemu ni olamwiheya.
14 Nto wa miyaano, kinahaala otitelela owehererya;
Kinahaala woocicimihakaani moohihiyererya.
15 Eyano aka enamulokoha wookololowa wanyu
Ni saweera sanyu sa ovuluxa nihiku noothene,
Naamwi sitempe waaca ni kihiiwexexaka* soothene.
16 Kinamuyawo nave kinamuloca saweera sanyu soowerya,
Khwoo Pwiya Ooweryaxa Yehova;
Kinamuloca sa wookololowa wanyu, pahiru wawinyu.
17 Khwoo Muluku, nyuwo mookihusiha ovinyerya omiravo aka,
Nave ophiyerya hiihava kinnalaleya saweera sanyu sootikhiniha.
18 Naamwi kuuluvanle ni kimenle ipwiini, khwoo Muluku, muhikinyanyale.
Kiloce sa ikuru sanyu* wa muyareriwo onacharela,
Ni sa owerya wanyu wa oothene yaawo anahaala orwa.
19 Wookololowa wanyu, khwoo Muluku, onnaphiya wiirimurimu;
Moopaka ichu itokotoko;
Khwoo Muluku, taani onalikana ni nyuwo?
20 Naamwi mukeerinhe ohooxeya ni sawuukhula ni makacamiho mancipale,
Mukikookiherye okumi;
Mukikumihe mmapuro awiixa* a elapo.
21 Mwaaceererye otokweene aka,
Mukirice ni okhapelela wanyu nave mukihakararye.
22 Mwawiihiiha, kinamoocicimihaani ni ekaruma ya mikoi
Wa nthowa na ororomeleya wanyu, khwoo Muluku aka.
Kinanwiipelaani macipo* ni chakare,
Khwoo Aweela a Isarayeli.
23 Iyano saka sinahaala okhuwela moohakalala vaavaa kinawiipelaakaani,
Vawi moovuluxa okumi aka.*
24 Nlumi naka nnamuloca* sa wookololowa wanyu nihiku noothenene,
Vawi yaale anachuna otoloxa okumi aka anamuulihiwa muru ni onyemuliwa.