1 Akorintu

8 Vano, vooloca sa soolya inaveleeliwa wa soophwaniherya: Noosuwela wi oothene ahu nookhalano masuwelelo. Masuwelelo annamweeriha muchu wiirumiha, nyenya osivela onnatikitherya. 2 Wakhala wi muchu onuupuwela wi oosuwela echu, owo nlelo hasuwenle ntoko aaphwaneleiye osuwela yeeyo. 3 Nto wakhala wi muchu onnamusivela Muluku, muchu owo oosuweliwa ni yoowo.

4 Vano vooloca sa olya soolya inaveleeliwa wa soophwaniherya, noosuwela wi yoophwaniherya tahi echweenevo mweelaponi, nave wi haavo Muluku mukina, voohikhala mmoharu. 5 Vawi, naamwi erivovo yaale aneeriwa amiluku, wirimu naari veelaponi, hiihaa ntoko aryaayavo “amiluku” ancipale ni “asaapwiya” ancipale, 6 wa hiyaano orivo Muluku mmoha, Tiithi, wa yoowo inarweelaayawo ichu soothene, nave hiyo nikhanle ntakhara yoowo; nave orivo Pwiya mmoha, Yesu Kristu, moorweela wa yoowo ichu soothene ikhanlaaya, nave hiyo nikhanle moorweela wa yoowo.

7 Tahi wi oothene aakhalano masuwelelo yaala. Nyenya akina, wa nthowa nawi yaakhovelela soophwaniherya, annalya yoolya ntoko echu eveleeliwe wa yoophwaniherya, nave yawuupuxerya-ya-murima aya yeeyo eri yooceecheya, yoonanara. 8 Nto yoolya, herwa enaacameliha wa Muluku; wakhala wi hinilyile, hiniyeleela echu, nave nalya, hiniphura echu. 9 Nyenya mukhaleno ephoole wi owerya wanyu wa othanla ohikhale nluku nookwaculiha wa yaale ari ooceecheya. 10 Wakhala wi muchu oowoona weyo orino masuwelelo, olyaaka mu empa ya amiluku atheru, apwanne yawuupuxerya-ya-murima ya yoole ori ooceecheya, hevoloweliwa ophiyerya olya soolya seiho inaveleeliwa wa soophwaniherya? 11 Moorweela wa masuwelelo oryaaweno, yoole ori ooceecheya onnapahuwa, munnaa yoowo Kristu omukhwenleiye. 12 Vaavaa munaachekelaanyu asinninyu mmukhalelo yoola nave munaphoreiha yawuupuxerya-ya-murima aya yooceecheya, munamuchekela Kristu. 13 Wanthowa nenla, wakhala wi yoolya ennamweeriha munnaka okwaculeya, nkirwa kikhuura emece wi kihimweerihe munnaka okwaculeya.