Salmu
Wa muhooleli a macipo; ni “Ncipo na Ithutu.” Salmu a Tavite.
69 Mukivuluxe, khwoo Muluku, woona wi maahi annoopopiha okumi aka.*
2 Kooneela mu ncokwa nawiixa, mwemmo ohirimo nipuro naweemelavo.
Koomiryiwa ni maahi awiixa,
Nave maahi awuupa aakipurula.
3 Kookoma wiichana vancipale,
Koolala va mmilo.
Miitho aka annaceecheya vaavaa kinanweheryaaka Muluku aka.
4 Yaale anakiica ohirivo nthowa
Aatepa waaca opwaha miihi a mmuruni mwaka.
Yaale anachuna okiipha,
Amwiicani aka oowoka,* ancipale.
Kookhinyereryiwa okookiha yeeyo kihiiyalaaka.
5 Khwoo Muluku aka, nyuwo moosuwela ololo aka,
Nave nthowa naka hanri noovitheya wa nyuwo.
6 Yaale anooweheryaani nyuwo ehuulihiwe muru wa nthowa naka,
Khwoo Pwiya Ooweryaxa, Yehova a anakhoco.
Yaale anawaavyaani ehilamwihiwe wa nthowa naka,
Khwoo Muluku a Isarayeli.
7 Kinnahooxeya ni oruwaniwa wa nthowa nanyu,
Olamwihiwa woohuruwela ethoi aka.
8 Kookhala mmalapo wa asinnaka,
Namarwa wa anamwane a amamaaka.
9 Mvai ntakhara empa anyu onnakilya murima.
Oruwana wa yaale anooruwanaani wookimorela miyo.
11 Vaavaa kaawanraaka soowara sa isakhwi,
Kaahikhala echu yoorohiwa* wa yaawo.
12 Yaale anakiraathi va mulako mutokweene wa epooma annakaapa,
Nave mivona sinnakipaka okhala mwaha wa macipo aya.
13 Nto nivekelo naka niphiye wa nyuwo,
Khwoo Yehova, mu elukuluku yaweemereryeya.
Khwoo Muluku, mu osivela wanyu woororomeleya wawaaca,
Mukaakhule ni saweera sanyu seeparipari sa ovuluxa.
14 Mukoopole mu ncokwa,
Muhemererye wi kineele.
Mukoopole wa yaale anakiica
Nave wa maahi awiixa.
15 Muheemererye wi maahi awuupa ekipurule,
Naari mano wiixa okimirye.
Naari wi ehime ekiwalele.*
16 Mukaakhule, khwoo Yehova, woona wi osivela wanyu woororomeleya ti waphaama.
Mukivarerye, mwawiiwanana ni ikharari sanyu sawaaca,
17 Nave muhiipithihe ethoi anyu wa mulapeli anyu.
Mukaakhule mwawaakuveya, woona wi kiri mu sawuukhula.
18 Mukaacamele nave mukivuluxe,*
Mukoopole wa nthowa na amwiicani aka.
19 Nyuwaano moosuwela onyemuliwa waka, wuulihiwa waka muru ni olamwihiwa waka.
Nyuwo munnawoona amwiicani aka oothene.
20 Munyemu wookipwexa murima, nave nikhwaca nene ti noohivola.*
Kaanweherya ookooniherya niphwanya, nto haarivo mmoharu mano;
Ookihakararya, nto nkaamphwannye.
21 Nto awo yaakinnya esenya yawiipha* ntoko yoolya,
Nave wi kiiphe nthanana awo yaakinnya eviinyu yoonyuunya wi kiwurye.
22 Mesa aya ekhale mulapa wa yaawo;
Nave muhakhu aya, okhale muraakho.
23 Miitho aya eriipihiwe wi ehiweryeke woona,
Nave mweerihe wi meco saya* sithukumeleke moohihiyererya.
24 Mwaayeherye awo onanariwa* wanyu,
Nave esara anyu yoovarela yaaphwanye.
25 Nipuro naya nookhalavo nikhale milepe,
Nave mmixakalani mwaya ohikhaliwekemo.
26 Tiwi awo annamwiikara yoole mummannaanyu,
Nave annatitelela oloca sawiicela wa yaale mwaaphoreihalaanyu.
27 Mwaaceererye nthowa va nthowa naya,
Nave muhiweere awo okhala awookololowa.
28 Ecipihiwemo mu liivuru a achu akumi,*
Nave ehirempwe vamoha ni awookololowa murima.
29 Kiri awuukhuwa ni kinnoona wiicela.
Owerya wanyu wa ovuluxa okikhapelele, khwoo Muluku.
30 Kinahaala wiipela macipo nsina na Muluku
Nave kinamumvuwiha yoowo ni mathamalelo.
31 Ela enahaala omuhakalaliha vancipale Yehova opwaha emope yeelopwana,
Opwaha mwaasaana a emope a manyaka ni akokocopwa.
32 Awiichacala anamoona yeela nave anamuhakalala.
Nyu munamwaavya Muluku, murima anyu ohakalale.
33 Tiwi Yehova onnaawiriyana oohaawa,
Nave harwa aanyemula achu awe oophariwa.
34 Erimu ni elapo yavathi imucicimihe,
Iphareya ni soothene ineeca mwemmo.
35 Tiwi Muluku onamumvuluxa Siyoni
Ni oteka wanaawiili ipooma so Yuta;
Nave awo enamukhalaka mwemmo ni enamukhala yawaya.*
36 Muyareriwo wa alapeli awe onamwaakhela yeeyo,
Nave yaale anasivela nsina nawe enamukhalaka mwemmo.