Salmu
Ncipo. Salmu a Tavite.
108 Murima aka wootikitheryeya, khwoo Muluku.
Kinarwa kiipa ni opaka macipo ni ncicimiho naka noothene.
2 Vinya, weyo ekaruma ya mikoyi; weyo tho chakare.
Kinarwa kivinya wooxiixelo ene.
3 Kinarwa koocicimihaani variyari va achu, khwoo Yehova,
Kinarwa kiipa macipo a woocicimihaani* nyuwo variyari va maloko.
4 Tiwi, osivela wanyu woororomeleya otokweene, onnaphiya wirimu,
Nave ororomeleya wanyu onnaphiya mmahurukuni.
5 Mucicimihiwe osulu wa irimu, khwoo Muluku;
Ovuwa wanyu okhale veelaponi yoothene ya vathi.
6 Wi oosiveliwaanyu yoopoliwe,
Munivuluse ni ntata nanyu noolopwana nave mukaakhule.
7 Muluku aaloca mu weela wawe:*
“Kinamuhakalala, kinammukawa Sikemi ntoko yoohiyeryiwa,
Nave kinamphima Mpopa* wo Sukoti.
8 Kiliyati taaka, hiihaa ntoko Manase,
Nave Efraimu kapaseti* ntakhara muru aka;
Yuta ekopo aka ya olamulelo.
9 Mowape epasiya kinarapihaakamo inaani saka.
O Etomi kinarwa kaarihelawo asantaalya aka.
Kinarwa kikhuwela moohakalala nthowa na omvootha Filistiya.”
10 Taani onahaala okihoola mu epooma yoolipihiwa?
Taani onahaala okihoolela ophiyerya o Etomi?
11 Tahi nyuwaano, khwoo Muluku ahu, yeenyu munnyanyanle,
Muluku ahu, yeenyu muhinaahoola tho anakhoco ahu?
12 Munikhaviherye mu wuukhuwa wahu,
Woona wi nivuluxo noorweela wa achu hinnaphuriha echu.
13 Moorweela wa Muluku nnamukhalano ikuru,
Nave owo onamwaanyikalela vathi amwiicani ahu.