Salmu
Wa muhooleli a macipo. Salmu a Tavite. Ncipo.
68 Muluku avinye, nave amwiicani awe emwaramwaxiwe,
Oothene yaale anamwiica echawe vamiithoni vawe.
2 Nyuwo muwiikare, hiiha ntoko echeku enavavihaaya mwiixi.
Hiihaa ntoko epothi enatothowaaya ni mooro,
Hiihaa tho achu oonanara murima etoloxiwe vamiithoni va Muluku.
3 Nto awookololowa murima ehakalale;
Awo etheye vamiithoni va Muluku;
Echape moohakalala.
4 Mmwiipele Muluku, mwiipele macipo* nsina nawe.
Mmwiipele yoole onavira mmireyareya sa matakhwa.*
Yehova ti nsina nawe! Muhakalale vamiithoni vawe!
6 Muluku onnaavaha empa ya okhalamo yaale ari meekhaaya;
Owo onnaataphula achu oophariwa nave onnaweeriha wi ichu iweecele phaama.
Nto achu ooturuwa murima* anaphwanela okhalaka mu elapo yawuuma.
7 Khwoo Muluku, vaavaa mwaahoolenlaanyu* achu anyu,
Vaavaa mweencaanyu mutakhwani, (Selaha)
8 Elapo yaacikinyeya;
Erimu yaarupiha epwila* wa nthowa na Muluku,
Mwaako Sinai waacikinyeya wa nthowa na Muluku, Muluku a Isarayeli.
9 Mwaaheeriha epwila orupa vancipale, khwoo Muluku;
Mwaawiichuuwiha achu anyu ookhulumuwa.*
10 Awo yaakhala mmuxakala anyu;
Mu ooreera wanyu murima, mwaamvakulela oohaawa, khwoo Muluku.
11 Yehova onnavaha nlamulo;
Athiyana yaawo analaleya michaka saphaama nikhuuru ntokweene na anakhoco.
12 Mamwene ni anakhoco aya annachawa, awo annachawa!
Muthiyana yoole ori owaani onnuukano ichu ikuxiwe okhoconi.
13 Naamwi mukonne variyari va mooro wa mmuxakalani,*
Anamukhalavo muuphelo a ekakaiya, ehuruweliwe ni eparata,
Vamoha ni mirekha sa ooru aphaama.*
15 Mwaako wo Pasa, mwaako wa Muluku;*
Mwaako wo Pasa, mwaako woothokolowa.
16 Nyuwo miyaako soothokolowa, ntakhara heeni munawehaanyu mwa nrima,
Mwaako yoowo Muluku othanlileiye* wi akhalekewo?
Aa, Yehova onahaala okhalaka weiwo okhala wookhala.
17 Ikaaro sakhoco sa Muluku iri macikhwi, macikhwi macikhweene.
Yehova aakhuma o mwaako Sinai ayaaka o nipuro naweela.
18 Nyuwo mwaawela osulu;
Mwaakuxa achu oophariwa;
Mukuxa samahala mmukhalelo wa achu,
Aa, ophiyerya tho achu ooturuwa murima, wi yakhaleke variyari vaya, khwoo Yehova, Muluku.
19 Acicimihiwe Yehova, yoowo nihiku ti nihiku onakuxa mucholo* ahu,
Muluku eeparipari, yoowo ori nivuluxo nahu. (Selaha)
20 Muluku eeparipari wa hiyaano, Muluku onavuluxa;
Yehova, Apwiya Ooweryaxa, onnoopola wa okhwa.
21 Aa, Muluku onamunyaanya miru sa amwiicani awe,
Ekarakasa ya muru ya oothene yoole onatitelela* mu yoohesa.
22 Yehova ooloca: “Kinamwaaruuha wanaawiili orweela o Pasa;
Kinamwaaruuha wanaawiili orweela mu ephareya yawiixa,
23 Wi weyo onaanihe inaani saa mu nikhami na amwiicani,
Nave anapwa aa elate nikhami naya.”
24 Awo annoona weeceeca wa achu anyu, khwoo Muluku,
Weeceeca wa achu anyu, Mwene aka, evolowaka mu nipuro naweela.
25 Alipa awiipa annaya ohoolo, alipa awiipa akina annoopa ikaruma sa mikoi, yaacharaka oculi waya,
Veeri vaya aakhalavo asimwali anoopa ikoma.
26 Mmiloko ithukumanne, mmucicimihe Muluku;
Mmucicimihe Yehova, nyuwo muri a ehime ya Isarayeli.
27 Weiwo, Penxami, a mukhaani, onnaalamulela yaawo,
Nave tho ahooleli a Yuta ni muloko aya annakhuwela moohakalala,
Ahooleli a Sepuloni, ahooleli a Nafitali.
28 Muluku aa oolamula wi weyo onamukhala akuru.
Mooniherye ikuru sanyu, khwoo Muluku, nyuwo muneerano ichu wi munikhaviherye.
29 Wa nthowa na empa anyu o Yerusalemu,
Mamwene anamooruuhelaani samahala,
30 Mwaasamele axinama awoopiha a mutakhwani,
Makhuuru a imope ni asaana aya
Ophiyerya achu yuuramme ni oruuha* ichu sa eparata.
Nto owo onnaamwaramwaxa achu yaawo anasiveliwano ekhoco.
31 Ichu sa eporonse inamuruuhiwa* orweela o Yikuputu;
Achu o Kuxi enamwaakuvela ovaha samala wa Muluku.
32 Khwoo omwene woothene wa elapo, mmwiipele Muluku,
Mmwiipele macipo* Yehova, (Selaha)
33 Yoole oneeca osuluxa wa erimu yeeyo ekhanle ovinyerya khalai.
Nwiriyane! Owo onnoopa itari ni nsu nawe, nsu nawe noowerya.
34 Musuwele ikuru sa Muluku.
Otokweene awe ori va Isarayeli,
Nave ikuru sawe iri wirimu.*
35 Muluku ta woopiha orweela o nipuro nawe* naweela.
Owo Muluku a Isarayeli,
Yoowo onavaha ikuru ni owerya wa achu.
Muluku acicimihiwe.