Salmu
Wa muhooleli a macipo. Salmu a Tavite.
40 Kaanweherya Yehova moopisa murima,
Owo aahuurama nave aawiriyana okhuwela waka ntakhara nikhaviheryo.
2 Owo aakiviiha mu ehime ya maahi ooviluwa,
Mu nchaca na ncokwa,
Nave aakuha inaani saka va mwala;
Aatikitherya meecelo aka.
3 Mwawiihiiha, owo aahela mwaano mwaka ncipo nivyaani,
Ncipo noomucicimihano Muluku ahu.
Ancipale enarwa evarerya mootikhiniheya
Nave enarwa ekuha nroromelo naya mwa Yehova.
4 Oohakalala muchu yoowo onamuroromela Yehova
Nave ohinaavya nikhaviheryo wa achu oophuca naari oowoka.*
5 Khwoo Yehova, Muluku aka,
Ichu mpankaanyu,
Saweera sanyu sootikhiniha ni muupuwelo anyu ntakhara hiyo, ti sincipale.
Haavo onalikana ni nyuwo.
Waakhanle wi koheererya othariha ni oloca seiho,
Saahaala otepa waaca wi kilokohe!
6 Nyuwo himwaachunne* mikucho ni sooveleela,
Nto mwaahula iwaru saka wi kiwiriyane.
Nyuwaano himwaavenke soovaha soopahiwa naari mano soovaha ntakhara yoocheka.
7 Voocharela kaahi: “Miyo kiri va.*
Mu eroolu* yoorempwa vooloca sa miyo.
8 Weerano yookhwela anyu, khwoo Muluku aka, onnakihakalaliha,*
Nave nlamulo nanyu nri va murimani vaka.
9 Kinnalaleya michaka saphaama sa wookololowa mmuloko mutokotoko.
Nkinamaaliha iyano saka,
Khwoo Yehova, nyuwo munnasuwela phaama.
10 Nkinavitha wookololowa wanyu mmurimani mwaka.
Kinnalaleya ororomeleya wanyu ni nivuluxo nanyu.
Mmuloko mutokotoko, nkinakhuwa osivela wanyu woororomeleya ni eparipari anyu.”
11 Khwoo Yehova, muhikikhwatiiherye ikharari sanyu.
Osivela wanyu woororomeleya ni eparipari anyu ikikhapeleleke moohihiyererya.
12 Ipahu sinakirukurerya sootepa waaca wi kaalakhanye.
Soohesa saka sincipale sinnakinyaaya ophiyerya wi kihinawerya woona ephiro aka;
Sootepa waaca opwaha miihi a mmuruni mwaka.
Nave koocecheya.
13 Kinnoovekaani, khwoo Yehova, musiveliwe mu okivuluxa.
Khwoo Yehova, murwe mwawaakuveya wi mukikhaviherye.
14 Oothene yaale anaavya omaliha okumi aka*
Yuulihiwe muru nave enyemuliwe.
Yaale anahakalala ni epahu aka
Ekookele muculi, elamwihen’ye.
15 Yaale anakiroha, eriki: “Ahaa! Ahaa!”
Etikhiniheye wa nthowa na wuuliheya waya muru.
16 Nto yaale anawaavyaani
Echape ni ehakalale mwa nyuwo.
Yaale anasivela saweera sanyu sa ovuluxa ilukuluku soothene eloceke eriki:
“Yehova acicimihiwe.”
17 Nto miyo koohasuwa nave koohaawa.
Yehova akivarerye.
Nyuwo muri mukhaviheryi aka ni moopoli aka;
Khwoo Muluku aka, muhilekele.