Saweeriwa ti Arummwa
17 Awo yaapaka mukwaha evira o Anfipoli ni o Apoloniya nave ephiya o Tesalonika, weiwo naariwo nipuro na malapelo* na Ayuta. 2 Ntoko Paulo aakhovelenleiye, owo aavolowa aya analoca ni yaawo, nave mu a Sapata araru, owo aaneererya waakhaviherya wiiwexexa Soorempwa, 3 aaleelihaka ni awooniheryaka moorweela wa yeeyo yaarempwe wi waari woochuneya wi Kristu ahooxeye nave aviihiwe mwa alipa ookhwa, ariki: “Ola ti Kristu, Yesu yoola kinoolaleeryaakani.” 4 Ntoko yookhumelela, akina a yaawo yaaroromela nave enakhala vamoha ni Paulo ni Sila, nave muloko muncipale wa Akriki yoowo waamoova Muluku yaaheerano emohamoha ophitaanyerya athiyana ancipale oovuwa.
5 Nto Ayuta akina yaahaakhalela ehace arummwa, yaawopa alopwana oonanara murima yeeceeca muramphani, epaka nikhuuru nave emutannya namvutuka mpooma. Yaarica empa ya Yasoni emwaavyaka Paulo ni Sila wi yaakerihe vamiithoni va nikhuuru nenle. 6 Woona wi hiyaaphwannye, awo yaampurulela Yasoni vamoha ni anna akina wa asitokweene a epooma, ekhuwelaka eriki: “Achu ala, ti yaale anamutannya namvutuka* elapo yoothene yavathi, vano aaphiya wenno, 7 nave Yasoni oowaakhela owannyawe. Alopwana oothene yaala annakhooca ochariha ikano sa Kaisara, elocaka wi ookhalawo mwene mukina, Yesu.” 8 Yiiwalaaya ichu seiha, muloko* woothene wa achu ni asitokweene a epooma yaahuukhuwa; 9 nave emanle omuliviha Yasoni ni anna akina, awo yaahaarowiha.
10 Wiilalaayavo, anna yaahaarumiha Paulo ni Sila o Pereya. Yaaphiyalaaya weiwo, yaavolowa mu nipuro na malapelo na* Ayuta. 11 Yaala o Pereya, yaaniiwexexa phaama waapwaha o Tesalonika, woona wi yaaheemererya masu ni nchuno neeparipari, enaalikhela mwaawiiichaalela Soorempwa nihiku ti nihiku wi yoone ichu saari hiihaa. 12 Mwawiihiiha, ancipale a yaawo yaaroromela, ophitaanyerya athiyana ancipale oocicimiheya yaari Akriki, vamoha ni alopwana akina. 13 Nto vaavaa Ayuta o Tesalonika yaasuwenlaaya wi masu a Muluku yaanalaleeryiwa tho ni Paulo o Pereya, awo yaayawo wi yuukhule muloko ni waakanyerya. 14 Mwawiihiiha, anna yaamurumiha Paulo mwawaakuveya oya makupa a ephareya, nto Sila ni Timotiyu yaahala o Pereya. 15 Nyenya, yaale yaamuhoonle Paulo, yaahimphiiha wa Atena, nave yaacimula emanle waakhela malakiheryo wi Sila ni Timotiyu yakumane ni Paulo mwawaakuveya wakhala wooweryeya.
16 Vaavaa Paulo aaweheryeiye yaawo ari wa Atena, owo aatepa wuukhuwa onneiye wi epooma yaasareyamo soophwaniherya. 17 Mwawiihiiha, owo aapacerya ovaanela ni Ayuta vamoha ni achu akina oomulapa Muluku mu nipuro na malapelo,* aanavaanela tho ni achu veeri va epooma* nihiku nnihiku. 18 Mafilosofu* makina a nikhuuru na Epikureya ni Estoiku yaapacerya ovaanyihana ni yoowo; akina yaani: “Nacapuwa* ola tiheeni onachuneiye oloca?” Akina yaani: “Onakhala ntoko wi mulipa a waalaleya amuluku a ilapo ikina.” Yaanaloca yeela woona wi aalaleerya michaka saphaama vooloca sa Yesu ni ovinya mookhwani. 19 Hiihaa, awo yaamukuxa emukeriha o Areyopaku, emukoha eriki: “Mano, naanwerya osuwela nihusiheryo taani nla nivyaani onalocaawe? 20 Woona wi onanruuhela ichu seiho iri seeleco wa hiyaano, vano nnakhwela osuwela echu enataphulelaaya.” 21 Tiwi, oothene a wa Atena ni a ilapo ikina yaakhala weiwo,* yaanamaliha elukuluku aya eheeraka echu, pahiru yaaweiwa oloca ni owiriyana miyaha mivyaani. 22 Mwawiihiiha, Paulo aaheemela veeri va Areyopaku nave aloca ariki:
“Achu nyu o Atena, kohoona wi mu soothene, enakhala ntoko wi munnawoovaxa* amuluku, waapwaha achu akina. 23 Ntoko yootakiherya, vaavaa keeceecaaka ni ovarerya moopwacha ichu seiho munalapelaanyu,* koomoona altare orempwevo: ‘Wa Muluku Oohisuweliwa.’ Tiwi yoowo munamulapaanyu muhimusuwenle, ti yoowo kinoolaleryaakaani. 24 Muluku yoowo opatunxe elapo ni soothene sinakhala mwemmo, yoowo tho ori Pwiya a wirimu ni a elapo yavathi, hanakhala mu ipa sootekiwa ni mata a achu; 25 naari mano owo hanarumeeliwa ni matata a achu ntoko wi yookhala echu enamuthowa, woona wi yoowo mwaneene onnaavaha achu oothene okumi, nwiya, ni ichu soothene. 26 Mwa mulopwana mmoha, owo aapaka maloko oothene a achu wi ekhaleke veelaponi yavathi, nave owo aatikitherya ilukuluku ni minlaano soomakamo achu. 27 Muluku eenreno yeela wi awo emwaavye, emwaapareye nave emphwanye. Chiryene owo hari ocai wa mmoha ti mmoha a hiyo. 28 Woona wi moorweela wa yoowo, nookhalano okumi, ninniitannya nave nookhala, ntoko alipa oorepa anyu akina aloncaaya: ‘Tiwi hiyo tho na anamwane awe.’
29 “Mwawiihiiha, woona wi na anamwane a* Muluku, nihuupuwele wi Omuluku Awe onalikana ni ooru naari eparata naari maluku, ntoko echu yoopachiwa moorweela wa waanyiherya wa achu. 30 Mweeparipari, Muluku haapwanche ilukuluku seiho awo yahaamusuwenlaaya; nyenya vano, owo onnalaleya wa achu oothene mmapuro oothene wi echaruwe. 31 Woona wi oolakelela nihiku nenlo onahaaleiye othoriha elapo yoothene yavathi mwawookololowa moorweela wa mulopwana yoowo aamuthanlileiye. Nave aahaaroromeliha achu oothene moorweela wa omviiha yoowo mookhwani.”
32 Vaavaa yiiwalaaya elociwaka sa ovinya mookhwani, akina yaapacerya omunyemula, nto akina yaani: “Nnahaala owiriyana yeeyo elukuluku ekina.” 33 Mwawiihiiha, Paulo aahaahiya, 34 nyenya achu akina yaakhala ni yoowo nave eroromela. Variyari va yaawo aakhalavo Tiyonisiyu yoowo aari muthoriha o Areyopaku, vamoha ni muthiyana awiichaniwa Tamari, ni achu akina.