Salmu
Ncipo. Salmu a anamwane a Kora. Wa muhooleli a macipo; mmukhalelo wa Mahalati,* wi niipiweke mwawaakhulelana. Masikili* a Hemani, a nihimo na Esira.
88 Khwoo Yehova, Muluku a nivuluxo naka,
Othana kinnakhuwela,
Nave ohiyu kinnaphiya vamiithoni vanyu.
2 Nivekelo naka niphiye wa nyuwo;
Mutheteye iwaru sanyu wa* okhuwela waka ntakhara nikhaviheryo.
4 Kohaalakhanyeryiwa vamoha ni yaawo anamorela munlicini;*
Ka muchu ohirino ikuru,
5 Onyanyaliwe variyari va achu ookhwa;
Kiri ntoko miruchu sikonne mmahiye,
Seiho nyuwo muhinuupuwelaanyu
Nave iviihiwemo mu okhapelela wanyu.*
6 Mookivonyerya mu nlici nawiixasa,
Mmapuro a epiiphi, mu nlici ntokweene nawiixa.
7 Esara anyu ennakilemela,
Nave nyuwo munnakihooxa ni macumuxa anyu akuru. (Selaha)
8 Mohaakeriha ocai wa miyo yaawo kaasuwenlaaka,
Mookeeriha okhala oothanyeya wa yaawo.
Koomakeya nave nkinawerya ochawa.
9 Miitho aka aaceecheya wa nthowa na wuukhuwa waka.
Kinnawiichanaani nihiku noothene, khwoo Yehova;
Kinnavekela wa nyuwo kiviihale matata.
10 Apwanne munampaka sootikhiniha ntakhara achu ookhwa?
Apwanne yaale akhwile ananwerya ovinya wi yoocicimiheeni? (Selaha)
11 Apwanne osivela wanyu woororomeleya onanwerya olaleiwa mmahiye,
Ororomeleya wanyu mu nipuro na otoloxa?*
12 Apwanne sootikhiniha sanyu sinanwerya osuweliwa mu epiiphi,
Naari wookololowa wanyu mu elapo ya achu oocuwaliwa?
13 Nto miyo nivano kinnakhuwela ntakhara nikhaviheryo, khwoo Yehova,
Wooxiixelo ori woothene nivekelo naka ninnaphiya vamiithoni vanyu.
14 Khwoo Yehova, ntakhara heeni munakikhoocaanyu?*
Ntakhara heeni mukipithinhaanyu ethoi anyu?
15 Ovinyerya omiravo aka,
Kinnahooxeya nave kihanle vakhaani okhwa;
Kiri ooceecheya wa nthowa na ichu sawoopiha seiho muneemereryaanyu wi sikihooxeke.
16 Esara anyu yoovarela ennakinyaanya;
Woopopiha wanyu onnakitoloxa.
17 Onnakirica ntoko maahi nihiku noothene;
Onnakirukurerya mmakupa oothene.*
18 Mohaakeriha ocai wa miyo asinthamwene ni akhwaaka;
Mukhwaaka vano epiiphi.