MWAHA 66
Yezebeli—mwene Mwaamuthiyana Oonanaroowo
VACHULI va okhwa wa Mwene Yerobiamu, mwene ori oothene yoowo aalamulela omwene wa mahimo 10 a Isarayeli aari oonanara. Mwene Akabe aari oonanaraxa waapwaha oothene. Mano moosuwela nthowa nene? Nthowa nimoha ti amwaariye, Mwene Mwaamuthiyana oonanaroowo Yezebeli.
Yezebeli haari muIsarayeli. Aari mwaana a mwene o Sitooni. Aamulapela muluku oowoka Paala, nave aahiweeriha wii Akabe ni aIsarayeli akina ancipale emulapeleketho Paala. Yezebeli aanamwiicha Yehova nave aawiipha alipa amiririmu awe ancipale. Akina yaahiphiyerya wiipitha m’makhukuni, wii ehiiphiwe. Vavaa Yezebeli aachuniiye echu, aanaphiyerya wiipha wii aphwanye.
Nihiku nikina, Mwene Akabe aari othanana vancipale. Yezebeli aahimukoha: ‘Mano ntakhara heni muryaanyu othanana olelo?’
‘Nthowa na yeeyo Naboti okileenliiye,’ aahaakhula Akabe. ‘Miyo kaachuna othuma emacaawe ya mpesa. Nyenya owo okileenle wii hooye.’
‘Ohikachamiheye,’ aahaakhula Yezebeli. ‘Kinahaala ophwanya.’
Mwawihiihaa Yezebeli aahirepela ikarata wa asiitokwene akina m’poomani ya Naboti. ‘Erihani wii achu atherweene eloce wii Naboti oomuulumela Muluku ni mwene,’ aahirepa hiihaa owo. ‘Ovinyerya vavaa, m’mukuxerye Naboti vate va epooma nave m’mwiiphe moonvonya maluku.’
Mwawaakuveya Yezebeli asuwenleene sa okhwa wa Naboti, aahi wa Akabe: ‘Vano, haweni mwakuxe emaca eyo ekhale yawinyu.’ Mano himunoona wii Yezebeli aanaphwanela olakiwa nthowa na echu yoonanara eenriiye?
Hiihaa, vachuli vaya, Yehova aahimuruma mulopwana Yehu wii amulake. Vavaa Yezebeli aasuwenliiye sa ophiya wa Yehu aahipintara miitho awe nave ahaavyavya wiireeriha. Nyenya vavaa Yehu aaphiyaliiye ni omoonela vaxanelani aahikhuwela wa alopwanaawo o nchachoni na mwene: ‘Mumvonyerye vathi va!’ Alopwanaawo yaahiiwelela ntoko munaweryaanyu woona va. Yaahimvonyerya vathi, nave owo aahikhwa. Hiihaa aahimalamala Yezebeli Mwene Mwaamuthiyana oonanaroowo.
1 Mamwene 16:29-33; 18:1-4; 21:1-16; 2 Mamwene 9:30-37.