YOOHUSERYA 7
Ohusiha ni Olekecha
ECHU YAWEERA: Mpharihele ireferensiya soororomeleya wi mwaakhaviherye oowiriyana anyu okhalano makuchuwelo aphaama.
MUKHALELO WA WEERANO:
● Mpharihele ireferensiya soororomeleya. Sooloca sanyu ithipeleye mu Masu a Muluku, mwaalakhanyeke mwemmo wakhala wooweryeya. Wakhala wi mooromola ichu sa siyensiya, michaka mivyaani, yaweereya, naari ireferensiya sookhaviherya, mvarerye woosiilo ene wi musuwele waakhanle wi iho ti seeparipari ni sahiihaano.
● Mpharihele ireferensiya moophwanelela. Mutharihe soorepa mwawiiwanana ni yaweereya, muchaka woothene wa Piipiliya, ni soolaleeryiwa sa “mulapeli òroromeleya ni awisuwela.” (Mat. 24:45) Mpharihele ireferensiya sihiri sa Mpiipiliyani mwaphaama muhitoronke yootaphulela yoopacerya naari oloca echu yoohiyana ni yeeyo namarepa aachuneiye othariha.
Muhaacereryeke saweereya naari masu oosiphela. Mukhaleno ephoole wi “achu akina” tahi anakhala “achu ancipale” “mmikhalelo mikina” tahi wi enakhala “wiiliwiili” nave “waweryeya” tahi wi enakhala “akhweya.”
● Mvahe sawooniherya. Mmanle waalakhanya yoorepa naari oromola ereferensiya, mpake makoho ootannya nchuno naari ophwanaphwaniha mwaheene wi mwaakhaviherye oowiriyana anyu okhalano makuchuwelo aphaama.
[Ekaaxa va epaaxina 10]
MMUTEKO WOOLALEERYA
Elukuluku muniirehereryaanyu oya mmuteko woolaleerya, muupuwele sa makoho taani achu anapakaaya nave mutholathole mukhalelo wa owaakhula. Wakhala wi oowiriyana anyu opaka nikoho nave muhisuwela naakhulo, mmuleele wi munahaala weererya ophwanya naakhulo nave munahaala okooka nihiku nikina.