NYUWAANO MWAANASUWELA?

Nsilo naaphariheliwa hai mu ilukuluku sa khalai?

Masilo yaanaphariheliwa wi isiliweno isoro okhala ephepa wi ipakiwe iphaawu. Athiyana ni akapuro a ichoko sincipale yaanapharihela masilo nihiku nnihiku. Yaari yookhovelela opharihela masilo mu ilukuluku sa khalai.​—Mukwaha 11:5; Yeremiya 25:10.

Eruku ya Yiikuputu ennooniherya meerelo ene. Musoro waanaheliwa va nluku ntokweene noothataana, nenlo ikwaha sincipale nniichaniwa nsilo. Mulipa oosila onnakokhora oculi wa nsilo nenlo nlipixiwe phaama nave onnapharela ni matata oomeeli nluku nikhaani, naari namahaani, nenlo oneeciheiye ayaakano ohoolo ni oculi vasulu wi asile musoro. Mwawiiwanana ni otholathola okina, anamahaani yaawo yaalimela variyari va ikiilu piili naari xexe. Wakhala wi nluku nenlo noophariheliwa ntoko yawiisaakihano, nnanwerya wiipha.​—Amuthoriha 9:50-54.

Osila musoro waari woochuneyaxa wa imusi ophiyerya wi Muluku aavaha nlamulo naakhwatiiha okuxa nsilo ntoko neemexeryo. Liivuru a Malamulo 24:6, BNM, onnaloca: “Mwampoleiha mukhwinyu nsilo ni namahàni nari mumpoleiha nimoha wa maluku yala muhikuse yawo ntoko nemeseryo, ntakhara mwera hiha munamukusa ntoko nemeseryo yele yatxhuneya v’ekumini vawe.”

Nsu nawi ‘okhala va nakhopeni’ nnathoonya eheeni?

Piipiliya onaloca wi Yesu “ókhala va nakhopeni a Atithi.” (Yohane 1:18) Nsu nla nnaloca onthamwene ni mahala yaawo Yesu oreiyeno ni Muluku. Masu ala anooniherya yookhovelela yeeyo yaacharihiwa vaavaa achu yaalyaaya yoolya ya ohiyu.

Mmahiku a Yesu, Ayuuta yaanahaameliha nwono woothiyana va meesa vaavaa yaalyaaya erukurenrye. Muru wa alipa oolya waathitimanela va meesa nave meco saya yaanakeriha okhwipi wa meesa, vaavaa yaakonelaaya nwono woothiyana ekookhwino ekhapeleliwe veechuni. Mukhalelo yoowo waaneeriha wi nwono aya woolopwana okhale wootaphuwa. Vaavaa yaalyaaya va meesa muchu ti muchu aathitimanela omoono woothiyana, “muru waakhala vakhiviru va naakhoopeni wa muchu yoowo aakhala variyari va yoowo,” ennaloca yootholathola emoha, “mwawiihiiha, yaanalociwa wi muchu yoowo ‘aakhala va nakhopeni’ wa mukina.”

Okhala va naakhoopeni va muhooleli a emusi naari wa muhooleli a yoolya yooniwa okhala mahala a vameekhaaya naari ekari. Nyenya mu Paskha ookuchula a Yesu, “óhuserya yowo Yesu ámusivenliye” aari Yohane, yoowo aahaamenle va naakhoopeni va Yesu. Mmukhalelo yoowo Yohane anwerya orukunuwela wa Yesu ni ompakela nikoho.​—Yohane 13:23-25; 21:20.