MWAHA WA EKAAPA | VAAVAA OOSIVELIWA AHU ONAKHWEIYE

Waahakararya Yaale Ananla

Apwanne montoko okhala ookhulumuwa nthowa na muchu omuyeleenle oosiveliwa awe? Ikwaha ikina nnanwerya ohisuwela echu yooloca naari yaweera—mwawiihiiha haniwerya oloca echu naari opaka echu vyakala. Nyenya sookhalawo ichu ikina nnaphwanelaahu okhaviherya.

Ikwaha soothene, echu enachuneya ori ophiya wanyu vamoha ni masu anyu ntoko “Kinnathanana tho.” Mu sookhovelela sincipale, omukhupaarela mukhalelo waphaama wa wooniherya opwacha. Wakhala wi muchu okhweliwe onachuna oloca, mmuwiriyane phaama. Opwaha soothene, opaka echu ntakhara emusi ekhweliwe, ntoko waapeya yoolya, waakhapelela anamwane, naari okhaviherya marehereryo a ovitha muruchu echu yookhweleya. Miteko ntoko seiyo sinanwerya okhala sa mphurelo opwaha masu aphaama.

Mweelukuluku aya, munanwerya oloca sa muchu okhwile, akhweya mulocaka makhalelo aphaama naari ichu soohakalaliha aapankeiye. Ovaneela ntoko yoola onanwerya omuhakalaliha muchu okhweliwe. Ntoko yootakiherya, Pam—yoowo omuyeleenle iyawe Lan, mu iyaakha thanu nammoha ivirale—onnaloca: “Ikwaha ikina achu annakileela ichu saphaama Lan eereiye miyaano kahaasuwelaaka, nave eyo yaanakihakalaliha.”

Moohiciha, otholathola weeriweno wohooniherya wi achu ancipale akhweliwe yaakhenle nikhaviheryo voopaceryani, nyenya soochuna saya moohilekela saacuwaliwa ni asinthamwene nthowa na ooweiwa ni miteko saya. Mwawiihiiha, mwiilipixerye oloca ni nthamwene okhweliwe moohihiyererya.a Achu ancipale akhweliwe annathamalela vancipale ekari yeela enaakhaviherya woopowa mmukhalelo aya woothanana.

Muthokororye yaweereya ya Kaori, mwali o Xapau yoowo aayelenle amanya, voocharela aamuyeleela murokora awe awunnuwelavo ivinrevo miyeeri 15. Moohakalaliha aahaakhela nikhaviheryo moohihiyererya orweela wa asinthamwene oororomeleya. Mmoha iichaniwa Ritsuko tawunnuwelavo ompwaha Kaori, aahiivaha wi akhale nthamwene awe—waakhala wi yaari amama awe. Kaori onnaloca: “Wi kiloce eparipari miyaano nkaari oohakalala ni yeeyo. Nkaachuna wi muchu apake nikupa na amama aka, nave kuupuwela wi muchu mukina haahaala owerya. Nyenya, nthowa na Mama Ritsuko okikhaliha wawe phaama, miyaano kaakhala nthamwene awe. Isuma soothene, naanaya vamoha mmuteko wa olaleerya ni oya mmithukumanoni vamoha. Owo aanakiwopa wi kanwurye chaaya ni yene, anakiruheela yoolya, ni okirepela ikaarata mu ilukuluku sincipale. Mukhalelo waphaama wa Mama Ritsuko waakivolowela mwakuru.”

Sooviravo iyaakha khumi napiili amannya Kaori ekhwili, nave olelo owo ni iyawe alaleeryi a elukuluku yoothene. Kaori onnaloca: “Mama Ritsuko onnatitelela okipwacha. Kaachikelaka nipuro kiyariwaakawo, wiiliwiili kinnamuxekurya nave kinnapuha onthamwene awe woolipiha.”

Yootakiherya ekina ya muchu yoowo aakhenle nikhaviheryo moohihiyererya ti Poli yoowo ori Namoona a Yehova o Xipre. Poli aakhalano iyawe eepewe, Sozos, yoowo ovanhe yootakiherya yaphaama ntoko mukukhula Eekiristu, moorweela wa owopa ikwaasuni ni anaamukhwele wi yalye owannyawe. (Tiyako 1:27) Moothananiha, arino iyaakha 53, Sozos aakhwa ni ereca ya ocoopare. Poli onnaloca: “Koomuyeleela iyaka oororomeleya yoowo nimalinhaahu iyaakha 33 ntoko atheli.”

Amanle ovithiwa iyawe, Poli aaya o Kanata ni mwanawe mukhaani Taniyeli a iyaakha 15. Weiwo yaapacerya othukumana ni muloko wa Anamoona a Yehova. Poli onnuupuwela. “Asinthamwene a muloko aka muvyaani hiyaasuwenle echu vooloca sa yaweereya ahu ni mikhalelo sahu sookacamiha. Nyenya eyo hiyaweerinhe omaala onaacamela ni onihakararya ni masu aya eepewe ni nikhaviheryo noophara muteko. Nikhaviheryo nla naari na esisapo mu elukuluku mwanaka aachuneiye atiithi awe! Yaale yaahoolela muloko yaahooniherya nchuno ntokweene wa Taniyeli. Mmoha aapaka marehereryo a omvoliiherya Taniyeli mmathateloni mwaya ni asinthamwene ophitaanyerya vaavaa yaayaaya omvonya mphirya.” Oopiili, maai ni mwaana anneerano phaama olelo.

Mweeparipari, aakhalavo makhalelo mancipale nnaphwanelaahu ovaha nikhaviheryo ni nihakararyo wa yaale ananla. Piipiliya tho onnanihakararya moorweela wa onivaha ewehereryo ya omwaahiyu.

[Nsu na vathi]