Eroolo Yakhalai “Etaphuliwe”

Mu 1970 alipa ootholathola yaalapa o Ein Gedi. Makupa awo anakhala o Isarayeli, waacamela makupa onaneela nsuwa oseresere wa Mar Morto. Weiwo yaahiphwanyiwawo epooma yeeyo yaatolosiwe variyari va iyaakha 500 ni 550. Elukuluku yaamukacaaya sinakooka yoowo eeyeliwe, alipa ootholathola yaahiphwanya eroolo yoovyeeni. Eroolo eyo yaahitepa ovya ophiyerya wi muchu haawerya waalakhanya yeeyo yaarempwe vaava. Ophiyeryatho ohula waanavila, woona wi yaahaala ocuphuwa. Nyenya nnikhaviheryo na etekonoloxiya, yaahiweryiwa ohuliwa. Ephariheliwaka meerelo mavyaani aniichaniwa eskaneyamento 3-D ni a softwares a orehereryiwa eruku, achu amavyakelo yaahiwerya osuwela echu yaarepiwe vaava.

Tiheeni eskaneyamento yuupulunlaaya? Mweeparipari eroolo ele, yaari makupa a Piipiliya. Makupaaya yaahikhalano iversikulu soopacerya sa liivuru a Onamukucho. Mu iversikulu seiyo aanaphwanyeyamo Tetrakrama, nsina na Muluku mu Ehepiri. Enooneya wi eroolo eyo yaarepiwe variyari va 50 ni 400 Kristu avinnyevo. Eyo eroolo yakhalai ya nikupa na Piipiliya ephwanyiwe. Ooniheryaka ochuneya waya, Gil Zohar, yornalista a The Jerusalem Post, oorepa: “Ehaakumve eroolo yo Ein Gedi ni nikupa na liivuru a Onamukucho, ohuliwa, waahikhalavo munlaano wa iyaakha ncikhwi variyari va Iroolo sa Mar Morto” seiyo irempwe mu eyaakha nsana ahaakumve Kristu, “ni Códice de Alepo, orempwe na Idade Média, mu seekulu 10 d.C.” Mwawiiwanana ni alipa ootholathola, eroolo yeeyo yaahulewe ennooniherya wi yoorepa massorético da Torá “yaahikhapeleliwa phaama variyari va iyaakha macikhwi, nave wi soohesa sa alipa oorepa ni mata hasitoronke masu.”