Mwaavyakihe Anamwane Anyu wi Ekhale Alipa Oolaleerya
1. Tiheeni Salmo 148:12, 13 onaaceenyereiye asitiithi wi yeere?
1 Yehova onnamwopa khata mwaana wi amuthamalele yoowo. (Sal. 148:12, 13) Asitiithi Eekiristu, annapwahiherya ohiya pahiru waahusiha anamwane aya eparipari ya Mpiipiliyani ni meecelo a malamulo a Muluku. Awo tho annaavyakiha anamwane aya wi ekhale alaleeryi a michaka yaphaama. Ti mwawiihai eyo enahaalaaya weeriwano moohihiyererya?
2. Ti mwawiihai yootakiherya ya phaama ya asitiithi enahaalaaya waavolowela anamwane aya?
2 Yootakiherya ya phaama: Muthoriha Yeteyoni aahiloca ni alopwana awe masana mararu: “Yeyo muneranyu mone keraka mwereketho.” (Amuthoriha 7:17 Bibiliya Nsu na Muluku) Ikwaha sawaaca anamwane annawoona ni waatakiherya asitiithi aya. Tiithi mmoha aalapa ohiyu, nyenya ohiya oya okona vaavaa owo onakookeleiye owaani nihiku Nawoorowa wooxixelo, owo aanaakuxa anamwane awe mmuteko wa olaleerya naamwi owo aakomme. Naamwi ahilonce ni masu, owo onaahusiha anamwane awe wi muteko woolaleerya echu yoopacerya. (Mat. 6:33) Anamwane anyu annoovaryeryaani wiivoliiherya wanyu moohakalala mmakhalelo oohiyana hiyana a malapelo, ntoko mavekelo, omwaalakhanya Piipiliya, oveleela sooloca sanyu, ni olaleerya? Mweeparipari, nyuwo hamuni mukhale yootakiherya yoolokomana. Nyenya anamwane anyu anahaala okhala a waakhulela vancipale wiilipixerya wanyu mu waahusiha yaawo omulapela Yehova wakhala wi annoona wiiveleela wanyu mu omulapela yoowo.—Malam. 6:6,7; Arom. 2:21, 22.
3. Soolakelela taani soomunepani sooya vahoolo asitiithi anahaalaaya waakhaviherya anamwane aya otikitherya ni ophwanya?
3 Soolakelela sooya vahoolo: Asitiithi annapwacha waavyakiha anamwane aya mmeecelo, mmalocelo, mmawarelo, ni ikina. Vaavaa anamwane aninnuwaaya, annavahereryiwa soolakelela ivyaani wa yaawo. Wakhala wi asitiithi Akiristu, awo tho annaakhaviherya anamwane aya otikitherya ni ophwanya soolakelela soomunepani mwawiiwanana ni iyaakha ni osuwela waya. (1 Akor. 9:26) Nyuwano munnaahusiha anamwane anyu wi eveleeleke sooloca ni masu aya ni orehererya mwahaaya mu Exikola ya Orummwa WooMuluku? (Sal. 35:18) Nyuwano munnaavyakiha yaawo wiivoliiherya mmakhalelo oohiyana hiyana a olaleerya? Nyuwano munnaalipiha yaawo ehaakumve opatisiwa naari ehaakumve ovolowa mmuteko wa elukuluku-yoothene? Nyuwano munnaweeriha wi awo ekhalano asinthamwene aphaama ni oohakalala, alaleeryi oolucuwa anahaala waalipiha yaawo?—Masi. 13:20.
4. Ti mwawiihai anamwane anaphuraaya orweela wa okhalano asitiithi anapacerya waavyakiha yaawo mu orummwa eri makwiya?
4 Mulipa oomurepa Salmo aaloca: “Muluku, mokihusiha opacherya onamwane aka; Nave ophiyerya olelo kinnalaleyerya sotikiniha sanyu.” (Sal. 71:17) Mutitelele waavyakiha anamwane anyu eri makwiya wi ekhale alaleeryi. Mathipelo oomunepani yaawo munaavahaanyu anahaala waakhaviherya yakhala atokweene!—Masi. 22:6.