Nyuwano Munnawerya Otoroka?
1. Otorokeya wa elapo onakhweleya wi nipake matorokelo taani?
1 Mu 1 Akorinto 7:31, Piipiliya onalikanyiha elapo ni palku orino aweera ni saweera inatorokeya. Otorokeya wa elapo onachuneya wi hiyaano nipake matorokelo mu ilukuluku ni ilukuluku mmakhalelo ahu a olaleerya, ni waaphiyerya wahu achu. Nyuwano munnawerya otoroka?
2. Ntakhara heeni nnaphwanelaahu otoroka wi ncharihe marehereryo?
2 Makhalelo Anyu Oolaleerya: Muloko weeKiristu elukuluku yoothene onnatorokeya. Vaavaa Yesu aaruminheiye oohuserya awe woopaceryani, aahaaleela wi ehikuxe yoolya ni ikhorowa mmurupani mwaya. (Mat. 10:9,10) Vahoolo vaya aahitoroka malakiheryo yaala nthowa na ohooxeya wa muhoolo wa oohuserya awe ni waaceereryeya wa muteko wa olaleerya mu ikulucu ikina. (Luka 22:36) Ntoko yawooniherya, variyari va nsana nivinre, marehereryo a Yehova yaahipharihela makhalelo a olaleerya oohiyana—onamoona wa ikaarata, radio, ikaaro sooruma—mwawiiwanana ni yeeyo yaari yookhweleya mu elukuluku yeele. Olelo, woona wi achu mmapuro mancipale hanaphwanyeya mmavaate, onnaceenyeryiwa vancipale ophitaanyerya orummwa wahu wa empa ni empa ni onamoona wa vanlakani. Hiyaano ninnaceenyeryiwa tho olaleerya ohiyu wakhala wi achu analapa othana. Hiiha ntoko ekaaro ya Yehova enatorokaaya meecelo aya, nyuwano munanwerya ochariha yeeyo?—Ezek. 1:20, 21.
3. Otoroka onanikhaviherya hai okhala a mphurelo mu ekulucu ahu?
3 Yooloca Anyu: Tiheeni enaakacamiha hiihaano achu a makupa anyu? Ikhorowa? Echoko? Ekhoco? Ti wa mphurelo osuwela makacamiho a mutano ni makhalelo awunlaana mu ekulucu ahu wi niwerye oreherya yooloca yoophwanelela. (1 Akor. 9:20-23) Vaavaa anamakhala analocaaya, woohikhala ovaha naakhulo nokovelela ni otitelela yooloca nreherenryaahu, yaahaala okhala phaama otoroka mwaha ahu wi nthokororye makacamiho aya.
4. Ntakhara heeni nnaphwanelaahu okhala awaakuvela otoroka?
4 Moohilekela ‘woneya’ wa makuchuwelo a elapo yeela onahaala omala, nave yoohooxa etokotoko enahaala opacerya. “Elukuluku yokhuveya.” (1 Akor. 7:29) Mwawiihiiha, ti woochuneya otoroka ni weerano moohilekela, wi niwerye waakhwaniha vancipale muteko ahu mu elukuluku enahalela!