Muhaavye Ehako!
EMuchu ori oothene onnachuna osuwela sa omwaahiyu. Elukuluku pahiru poti okacamiha. “Kinanwerya omwaala nakhuwo aka omeelo?” “Kinahaala owerya okwasa malaxi esumana enacharela?” “Elukuluku enahaala okhala hai mweeri onoorwa variyari va efesta ahu?”
2 Ochuna osuwela sa omwaahiyu honamalela pahiru elukuluku yooloherya. Achu voothevene annuukhuwa vooloca sa saweereya sa omwaahiyu mu miyaha sa maloko oothene, maroca, ni xaxaxa miyaha sinaavolowela yaawo mukhataaya ni oosiveliwa aya. Yoochuna yeela yoolipa ennaweeriha achu ancipale waavya ehako wi esuwele maakhulo a makoho aya vooloca sa omwaahiyu.
3 Anahako annaloca wi amuluku annawerya wuupulula omwaahiyu wa yaale avyakihiwe wi yaalakhanye ni etaphulele ineneeryo ni ihako seiyo analocaaya wi sinnaloca mmakhalelo oohiyana: Moorweela wa sootikiniha sa wirimu (mpuro ni weeca wa itheneeri, irimo, elapo, epiphi, muthuko); moorweela wa ikuru sa vathi (echeku, epula, mooro); moorweela wa meerelo a asinama (wuuwa wa anapwa, ovava wa ipalame, weeca wa inowa); moorweela wa mukhalelo wa makukhu a chaaya mu koopho nari mukhalelo wa makhurwa mmaahini nari omora wa mavaka; moorweela wa mukhalelo wa hapa, masaso ni sampuwa sa asinama; moorweela wa ineneeryo sa mmatani ni moorweela wa “minepa” sa alipa ookhwa.
MWAHA WA EHAKO ONNOONIHERYA WI TAHI YAPHAAMA
4 Makhalelo oothene a ehako, moohipwacha oreerihiwa waya, haniiwanana ni Piipiliya Aweela. Yehova wiiliwiili nave moolipa moorweela wa Moose aahaalopola aIsarayeli wi ehipake saweera seiya sa ehako sa maloko makina, ariki:
“Ahikhalemo mwa nyuwano oni ampahe mwanawe amwamulopwana nari amwamuthiyana ntoko mukutxho; ahikhale oni àsyeke ehako nari wavya osuwela sa omwahiyu, ahikhale oni akhale mulipa a masitxa, wera sa malavi, nari okoha minepa nari olowa; ahikhale oni asyeke wakoha atxhu òkhwa. Yole orimukhala mutxhu onera itxhu seiha onnathanyiwa ti [Yehova.] wa nthowa na itxhu seiho sothanyeya [Yehova,] Muluku anyu, anamwikaravo maloko yawo vamithoni vanyu.”—Malam. 18:9-13; Onam. 19:26, 31.
5 Alipa ooloherya ehako, naamwi ineneeryo ni saweera saya yaalohenryaaya saneereya, awo hiyooceela olakiwa. (Malam. 13:1-5; Yer. 23:32; Zak. 10:2) Othoriha wa Piipiliya moovanyihana ni anahako onnooneya mu nlamulo nawe nawi oothene yaaphwanela wiiphiwa.—Onam. 20:27.
6 Ehako yaari tho yoovuwa elukuluku ya orummwa wa Yesu veelaponi yavathi ni arummwa. Vaavaa aareiye o evilivili ya Xipre murummwa Paulo aakumana ni mukhwiri nsina nawe Baryesu, Paulo aamuhokola ni evaasi. Nave o Makedoniya Paulo aahiikara nsololo na ehako mwa nahano ookacamiheya, eyo yaatepa waathananiha apwiya awe yaawo yiiphwanyerya vancipale moorweela wa ikuru sawe sa oloherya soovitheya. (Saw. 13:6-11, 16:16-19) Nyenya, akina, ntoko Simoni o Samariya, yaathanla ohiya meerelo aya a onamulosiwe, nave o Efeso yaakhalawo achu ancipale yaweeyenle aliivuru aya a ehako nave esisapo aya yaari ikhorowa saweela macikhwi makhumi mathanu (akhweya $8,000).—Saw. 8:9-13; 19:19.
EHAKO YOOHIYANA NI YAWUPULULA YA MULUKU
7 Wookhalavo ohiyana otokotoko variyari va eparipari enarweela wa Muluku ni miseelo inarweela wa ehako. Yaawo anaavya ehako wiiliwiili annavoloweliwa ni ikuru soowali soohooneya sa masololo. Ikwaha ikina awo analapa mukhataaya ntoko aasavuwa moorweela wa macipo ni mirece. Nsu na eGriki na “ehako” nnarweela mu maiʹne·sthai, nnataphulela “okhuwela,” nave nnaphariheliwa wi alociwe muchu onakhuma maphoru mwaano nave orino maihi oonyopotana.
8 Akapuro a Yehova vaavaa yaavoloweliwaaya ni munepa waweela wi eloce hiyaakhalano makhalelo ntoko yaawo a mwiili ni muupuwelo. (Saw. 6:15; 2 Pet. 1:21) Alipa miririmo a Muluku mmukhalelo wa muteko yaaloca mootaphuwa ehiweheryaka oliviwa. Moohiyana, anahako yaamweera nakoso aya nthowa na wiiphwanyerya mukhataaya mwa nrima.
9 Mu Piipiliya mukhalelo ori woothene wa ehako honalociwa phaama. Ikwaha sincipale mmasu a othoriha saweera sa onamulosiwe sa ehako inalociwa vamoha ni oraruwa ni ocapaheya. (2 Mam. 9:22; Nah. 3:4; Malak. 3:5; Akal. 5:19, 20; Yaw. 9:21; 21:8; 22:15) Vamiithoni va Muluku ehako enaphwanaphwana ni yoocheka ya omwaryeya. (1 Sam. 15:23) Mwawiihiiha, heniiwanana ni soorempwa wuupuwela wi Yehova aalocaka ni akapuro awe ti mooniheryo wa ehako “yaphaama.”
10 Sooloha sa ehako saavekiwa ni mulipa ooloha. Tahi hiihaa wakhala wi sooloha sarweela wa Yehova. Iho saakhala sookhweya ni sawooneya ohikhalavo minikwa wi sarweela wa Yehova (Map. 20:3-7; Amut. 7:13-15; 1 Mam. 3:5; Mat. 1:20; 2:12, 13, 19, 22), nari, sooloha sawiiphini ni sookhuweya, haavovo nahako aawerya wiiwexexa seiyo, pahiru akapuro awiiveleela a Yehova ti yaawerya otaphulela seiyo.—Map. 40:5-19; 41:1-32, 39; Dan. 2:1-47; 4:1-28.
ANAHAKO AAKHOOCIWA NI YEHOVA
11 Hamani oonanara aaheera wi “evonyeriwe ekari, [mwawooneya ni mulipa oohuserya itheneeri] nihiku ni mweri,” wi asuwele elukuluku yoophwanelela wi etoloxiwe achu a Yehova. (Est. 3:7-9) Vooloca sa meerelo awe a ehako ninnaalakhanya wi:
“Vooloca sa mukhalelo yoola wa waavyaavya nihiku naphaama na weerano yoolakelela awe, Hamani eerano hiihaa ntoko mamwene ni atokweene o Persiya yeeraaya elukuluku yoothene, haapaka echu ahaakumve waakoha alipa ohuserya itheneeri, ni okhala oohakalala ni ewora ya ekari.”—Ekomentaario ya Jamieson, Vol. II, p. 639.
12 Acharaka ikano sa masololo, Hamani moohilekela aayano vahoolo yoolakelela awe yoonanara. Nyenya, owerya wa Yehova owoopola achu awe waahooniheryiwa wanawiili, nave Hamani, yoowo aaroromela ehako, aathomeiwa va mwirini yoowo aampakenleiye Mordekai.—Est. 9:24, 25.
13 Yootakiherya ekina ya wunnuwa wa owerya wa Yehova moohiyana ni ikuru sookhuweya ti yaweereya vaavaa aMowabi yaaruulaaya “ni itxhu sari sokhweleya [sa ehako]” wi emuliveno Balamu nahako o Mesopotamiya wi awuulumele aIsarayeli. (Nam. 22:7) Naamwi Balamu aahaavya “ihako,” vanonto Yehova aamweerinhe oloca mareeliho pahiru. Mu nsiposipo nawe, Balamu, apuruliwaka ni owerya wa Yehova, aaloca: “Mwa nloko na Isarayele hiwamo alipa awàtxiha nari mwa nloko na Yakobe alipa a ihako.”—Namarepela, ikapitulu 23, 24.
14 Nthowa na mwaha woonanara wa ehako, tahi wa miruku mu “elukuluku yookuchula” yeela waavya ehako wi nsuwele sa omwaahiyu. Mwa muyareriwo muchu onnachuna osuwela omwaahiyu, nave yoochuna eyo enakhwaanela phaama vaavaa muchu onamulapeleiye ni omurumeela Mpatuxa awe Mutokotoko. Opwaha soothene, Yehova ti ehime ya miseelo soororomeleya vooloca sa omwaahiyu. Yehova pahiru onnasuwela makuchuwelo ovinyerya omapacereryo. (Yes. 46:9, 10) Opwaha yeeyo, moorweela wa ephiro awe ya olocihana ni Masu awe Piipiliya Yehova moosivela onnuupulula yeeyo eri yaphaama wi muchu asuwele elukuluku ehaakumve.—Amosi 3:7.
15 Nyenya, vaavaa achu anamuhiyaaya Yehova nave ekhala ocai wa Yoowo pahiru onasuwela omwaahiyu, awo mookhweya annavoloweliwa ni meerelo a masololo. Sawuli yootakiherya yoolipa, yoowo woopaceryani aamwaavya Yehova wi asuwele saweereya sa omwaahiyu, nyenya Sawuli, amanle okhoociwa nthowa na ohiroromeleya, aahaavya masololo ntoko yooraceela ya ohoolela wa Wirimu. (1 Sam. 28:6, 7; 1 Math. 10:13, 14) Mukhale ni ephoole wi muhipake yoocheka emohamoha!
[Eruku va epaaxina 3]
Mwaha ola onarweela mu A Sentinela, 1 a Fevereru a 1970, ipaaxina 89-93