Yehova Onnawiriyana Mavekelo a Akapuro Awe​—Mwaha ola okuxiwe mu Anuário das Testemunhas de Jeová de 2013

Miyanmar

Epaaxina 91, eparakrafo 2 ophiyerya Epaaxina 92 eparakrafo 1

Oohuserya Oopacerya o Kayin

Mu 1940 piyoneero mmoha Ruby Goff alaleerya o Insein epooma ekhaani moorukurerya wa Yangon. Amanle ophwanya nchuno vakhaani nihiku nenle, Ruby aavekela: “Yehova khwoo kikhaviheryeni ophwanya ‘epucepuche’ emoha mano kihaakumve okookela owaani.” Va empa yoocharela, owo amphwanya Hmwe Kyaing aari butista o Kayin yoowo aawiriyanne phaama muchaka wa Omwene. Moohilekela, Hmwe Kyaing ni anaawe Chu May (Daisy) ni Hnin May (Lily) yaanamuhuserya Piipiliya nave yaanaya vahoolo omunepani. Naamwi Hmwe Kyaing aayeleela okumi awe, mwanawe echaako Lily, ohoolo waya aakhala oopacerya opatisiwa ntoko Namoona a Yehova o Kayin. Daisy tho aapatisiwa.

Lily ni Daisy yaakhala mapiyoneero amvai nave aahiya yootakiherya yaphaama. Olelo, masana a anaaya ni oohuserya aya a Piipiliya annamurumeela Yehova o Miyanmar ni ilapo ikina.

Miyanmar

Ekaaxa va ipaaxina 108-109

OYARIWA 1933

OPATISO 1949

MUKWASU WA OKUMI AWE Oomaliha iyaka opwaha 50 mmuteko wa elukuluku yoothene o Miyanmar elukuluku yincipale ya yeeyo ntoko ooweherya a efiliyale. Owo nlelo onarumeela mu ekomisau ya Efiliyale.a

Mu 1988 wakhalavo ovaanyihana woohooxa o Yangon, nave macikhwi aachu yaavolowela iphiro evekaka otorokiwa wa epoliitika. Ni waacamela wa okuchuwa wa nloko, waakhalavo okhwa wa nakhoco nave nlamulo na epoliitika naatikitheriwa mmakupa mancipale a elapo. Macikhwi a alipa oovaanya yaahiiphiwa.

Mu mweeri mmohamoha, hiyaano naachuna orumiha erelatoorio ya efiliyale ya eyaakha o Nova York, nyenya ikhankoonya soothene sa olocihana saamaalihiwa, nave hiyaano hinaarino moota wa olokoha muteko. Kimanle osuwela wi Murummwa a Estados Unidos aanarumiha erelatoorio awe moorweela wa elikooptere, kaahuupuwela wi erelatoorio yaanaphwanela orumihiwa vamoha. Mwawiihiiha, kaahiwara yoowara aka yaphaama ni egravata kiya wa murummwa a Estados Unidos.

Vaavaa keecihaaka ekaaro mu iphiro soonaana ni epula kaahoona wi epooma yaari cuu. Kiyaaka vahoolo, kaahoona wi mwiri waahuuwela mu mphiro kaayaka ovira. Mwawiihiiha kaahikhuruwa mu ekaaro nave keeca ni meco.

Kaacamelaka mulako wa murummwa a Estados Unidos, kaahiwoona achu ancipale ekhuwelaka wi evolowe, nyenya alipa a wiipha yaanaawateeliha ovolowa. Miyaano kaaheemela nave kaapaka nivekelo vathivathi. Mulopwana mmoha aahikoona wi kaatepa owarela phaama nave owo aahiloca akithoonyaka: “Ola poti ari namalapa a murummwa a Estados Unidos.” Mwa yeeyo kaahivira veeri va muloko. Vaavaa kaaphin’yaaka vamulako waawaliwe wa murummwa a Estados Unidos, mulipa a wiipha mutokotoko aakiweha ni okhwa minikwa.

Owo aakikoha ananariwe: “Weyo waani? Onachuna eheeni?”

“Kinachuna oloca ni murummwa a Estados Unidos,” kahaakhula. Kookhalano muchaka wookhweleya kinachunaaka orumiha wa Amerika.”

Owo aanakiweha, nave mwawaakuveya aahihula mulako, akikakhela mpuwa nave awala wanaawiili, aawateelihaka achu.

“Onakichara,” owo aahiloca.

Vamulako wa murummwa a Estados Unidos, mulipa awiipha aakikusa ophiyerya va mulapele oovelavela, yoowo aakikonhe ti heeni kaachunaka.

Kaahimulela wi “Ka a efiliyale ya Sociedade Torre de Vigia ya elapo yeela.” “Kookhalano erelatoorio yookhweleya kinachunaaka orumiha o Nipuro ntokotoko nahu o Nova York mweeri yoola. Munamukikhaviherya orumiha vamoha ni yannyu?” Kaamunnya emvelope yookhweleya mutokweene yoole nave kaahaaceererya: “Mukimorele ikharari nkaanono eseelu.”

Mootutuxa mutokweene aahikipakela makoho nave voocharela aahikiroromeliha wi aahaala orumiha erelatoorio. Voocharela vaya, kaahisuwela wi erelatoorio yaahiphiya mu elukuluku yoophwanelela o Nipuro ntokotoko na veelaponi yoothene.

[Nsu na vathi]

[Yooleeliherya va epaaxina 9]

Kaamunnya emvelope yookhweleya mutokweene yoole nave kaahaaceererya: “Mukimorele ikharari nkaanono eseelu.”