Hiyaano Hanri Meekhihu​—Mwaha ola onarweela mu Anuário das Testemunhas de Jeová a 2013

Afrika

Epaaxina 47 eparakrafo 3 ophiyerya epaaxina 48 eparakrafo 2.

Mulaleeryi Meekheiye mu Epooma Yoorakamela

Vaavaa aakhaleiye mu epooma yoorakamela owannyawe o Keniya, Tavite aapacerya omuhuserya Piipiliya ni Anamoona a Yehova. Elukuluku vakhaani, owo aakookela owannyawe epooma ya Lokichar, mu nipuro noorakamela omoko wa Keniya. Muloko wookhuveela waakhala ikilomeeturu 165 va epooma ya Lodwar. Mu iyaakha xexe Tavite wiiliwiili haakumanano Anamoona a Yehova, nyenya aanalaleerya amwaacamani ni amusi awe, yeeyo aahusenryeiye mu elukuluku vakhaani aamuhuseryeiye Piipiliya. Akina yaahooniherya ochuna, nave moohilekela owo aaneeciha soohuserya sa Piipiliya. Mu 2007 Tavite aakumana ni anna o Lodwar nave aakookela yoohuserya awe, nave anapaka mukwaha ayaaka ahuserya itila piili va mweeri ni moota nari ekaaro.

Vaavaa Tavite aahuseryeiye, mvai awe mu orummwa waanaaceereryeya. Naamwi ahaakumve opatisiwa, owo aateka “Empa ya Omwene” ya elukuluku vakhaani ya exiri yoomariwa waacamela vaate vawe, mummo aathukumanyeiyemo ni yaawo yooniherya ochuna. Nyenya, ancipale a ekulucu hiyaasiveliwa ni olaleerya wawe, mu iyaakha piili Tavite aaheeteteya oruwaniwa ni omaniwa. Ekwaha ekina, anamakhala yaamusomela wi owo oruuha “malapelo a Musaserya” mu ekulucu yeeyo, nave yaammana ophiyerya oyeleela miwiya. Nyenya, aamanleiye oveka nikhaviheryo wa oolamulela a ekulucu, ohooxiwa waahimala, nave Tavite aakookela olaleerya. Tavite aaloca, “eparipari ti okumi aka, haavovo mwiicani onahaala okihiiha.”

Mu 2009, Tavite aapatisiwa, olelo owo murummwa oorumeela nave tho piyoneero a elukuluku yoothene. Tavite ni mwanawe a iyaakha 15 tari alaleeryi pahiru mu ekulucu yeele, mu Apirili a 2012 achu 60 yaaphiya va Yawuupuxerya ya okhwa wa Kiristu, mu empa ya elukuluku vakhaani waacamela vaate va Tavite.