Ovaha Soolaleeryiwa mu Ikulucu Sinaloca Ilocelo Soohiyana

¹ Mmapuro mancipale a ikulucu, annaphwanyeyamo achu anarweela mu ilapo ikina. Ancipale a yaawo annahuserya mwa waakuveya ni wiiwexexa phaama vaavaa anahusihiwaaya ni elocelo aya yooyariwano. Marehereryo taani arivovo a soolaleeryiwa sa Piipiliya mu elocelo aya wi yaakhaviherye wiiwexexa phaama?

² Ti liini Nnaphwanelaahu Ovaha Soolaleeryiwa: Vaava miloko miili naari sincipale sinaloca ilocelo soohiyana sinalapaaya mu ekulucu emohamoha, nikhuuru na asitokweene avoloweliwe anahaala olapa vamoha, ooweherya a muteko annalakelela vamoha mukhalelo waweemereryeya onaphara muteko wi nikhuuru nri noothene na elocelo nivahe onamoona woomalela. Naalaleeryaka empa ni empa, alaleeryi ikwaha sincipale hanavaha soolaleeryiwa sa elocelo ya muloko mukina. Nave vaavaa alaleeryi anavahaaya onamoona woohilakelela naari wa vanlakani awo anaphwanela ovaha soolaleeryiwa mu elocelo ya achu.​—Moone makoho a ekaaxa ya Orummwa Wahu wa Omwene a Otupuru a 1990.

³ Ti liini Nnaphwanelaahu Okuha Soolaleeryiwa: Tiheeni enaphwanela weeriwa wakhala wi achu ancipale analoca elocelo yoohiyana ni yeeyo muloko onalocaaya? Variyari va mukhalelo yoola, muloko anaphwanela okuha soolaleeryiwa vakhaani sookhweleya sinaphwanyeya mu elocelo yeeyo, ntoko itrataato naari eproxura Muluku Ontchuna naari Nthamwene a Muluku!, naari liivuru Conhecimento. Alaleeryi anaphwanela ovaha soolaleeryiwa iha wa muchu ori oothene onawerya waalakhanya elocelo yeeyo.

⁴ Mukhalelo wa Okhapelela Soolaleeryiwa: Wakhala wi muloko hiwaano soolaleeryiwa mu elocelo yeeyo ya alipa awaalakhanya, ti mwawiihai soolaleeryiwa sa elocelo yeeyo sinahaalaaya ophwanyiwa? Mulaleeryi onaphwanela oloca ni ooweherya a soolaleeryiwa wi asuwele soolaleeryiwa sinaphwanyeya mu elocelo yeeyo mwawihiihaa ichu sinachuneya sinahaala ovekiwa mu yooveka ya muloko enacharela.

⁵ Wakhala wi onnakhweleya muteko wa waakuveya, alaleeryi anaphwanela omukoha mmoha a Nikhuuru na Muteko wa Muloko waakhanle wi yooveka ennaphwanela orumihiwa ehaakumve yooveka ya muloko enacharela. Wakhala wi eyo yoheemereryiwa, ooweherya a soolaleeryiwa naari muchu othanliwe ni yoowo, onaphwanela orumiha yooveka moorweela wa mail naari telefone wa efiliyale. Soolaleeryiwa sinahaala orumihiwa wa muloko moorweela wa entereso yookhovelela naari ekina wakhala woochuneya. Wakhala wi yooveka enahaala orumihiwa mu nihiku nimoha naari meeli, muloko tonahaala oliva yoolivela aya.

⁶ Nnanwerya opharihela phaama soolaleeryiwa Seekiristu wi naakhaviherye “atchu othene” mu elocelo aya ‘wi ephiye voróra eparipari wi evuluwe.’​—1 Tim. 2:3, 4