Nsana Nimoha na Olaleya Omwene!
1. Tiheeni achu a Yehova yaaceenyeryiwaaya weera mu nsana nivinre?
1 “Onani, Mwene onnalamulela! Nyuwaano mwa achu awe munamvuwiha. Laleyaani, laleyaani, laleyaani, Mwene ni omwene awe.” Ni masu yaala oolipiha yaalociwe ni Munna Rutherford mu nsana nivinre, achu a Yehova yaanaceenyeryiwa omwaramwaxa michaka sa Omwene mmakupa oorakamela. Nave ti yeela nenraahu! Ntoko Akiristu oopacerya, hiyaano noolaleerya michaka saphaama sa Omwene “wa sopachushiwa sothe sene sa vathi verimu.” (Akol. 1:23) Naawuupuwelaka muculi, tiheeni nenraahu wi nlaleye Omwene wa Muluku? Ti mwawiihai nnahaalaahu otitelela olaleya Omwene wa Muluku vaavaa nnaacamelaahu waakhwana wa iyaakha 100 sa oyariwa wa Omwene?
2. Ti mwawiihai soolaleeryiwa sahu saavuwihaaya Omwene wa Muluku?
2 Wuupuwela Muculi: Mu iyaakha sincipale, soolaleeryiwa sahu saanavuwiha Omwene wa Muluku. Opacerya 1939 erevista ahu yaarino muru: Mulipeleli Alaleyaka Omwene wa Yehova. Erevista yeela wiiliwiili yaanathokororya Omwene ni yeeyo owo onahaalaaya waakhwaniherya. Erevista Despertai! yaanavuwiha tho Omwene wa Muluku ntoko yoowehererya ya omaliha makacamiho. Ti woophwanelela wi irevista heiha piili sinnataphuleliwa ni okaiwa mu elapo yoothene!—Yaw. 14:6.
3. Mikhalelo taani naapharihenlaahu wi nlaleye Omwene?
3 Achu a Yehova yaahipharihela mikhalelo soohiyana hiyana wi elaleye Omwene. Mmahiku akhalai, hiyaano napharihela ikaaro sooruma, araatio kaseti, eviitiyu ya iruku sa soopatuxiwa. Mikhalelo heiho saanikhaviherya omwaramwaxa michaka yaphaama wa alipa oowiriyana mweelaponi mu elukuluku aya yaphaama naamwi naari alaleeryi a Omwene vakhaani. (Sal. 19:4) Mu iyaakha sa hiihaanoru, hiyaano noovuwiha sooleeliha mu jw.org, nlaleyaka Omwene wa macikhwi—ophitaanyerya yaale anakhala mu ilapo heiho muteko ahu owatiihiwaayawo.
4. Mukhalelo taani wavameekhaaya niivoliihenryaahu?
4 Achu a Yehova ahiivoliiherya tho mmukhalelo wavameekhaaya wi emwaramwaxe michaka sa Omwene. Ntoko yawooniherya, opacerya 1990, hiyaano nohiilipixerya waaceererya muteko ahu wa empa ni empa moorweela wa olaleerya mmapuro awaaciwamo, ni oothumiha. Hiihaanoru, hiyaano noorehererya onamoona wavameekhaaya wa achu a ipooma itokotoko orukurerya elapo. Mwawaacererya, miloko mincipale sinniivoliiherya mu onamoona wa vanlakani mu ikulucu saya moorweela wa opharihela meesa a soolaleeryiwa enakhala mmapuro awaaciwamo. Chiryene, hiyaano ninnoona muteko wa olaleerya empa ni empa ntoko mukhalelo waphaama wa olaleerya Omwene.—Saw. 20:20.
5. Ikari taani eyaakha evyaani ya muteko enahaalaaya waavaha ancipale a hiyo?
5 Wuupuwela Muhoolo: Ni opacerya wa eyaakha evyaani ya muteko mu Setempro, ancipale anahaala opacerya orumeela ntoko mapiyoneero a elukuluku yoothene. Munanwerya okhala mmoha a yaawo? Wakhala wi hooye, mano munanwerya ilukuluku ikina orumeela ntoko piyoneero ookhaviherya? Echu vyakala munaweryaanyu, okhala piyoneero naari hooye, muroromele wi Yehova onahaala wooreelihaani nthowa na wiilipixerya wanyu wi mwiivoliiherye moomalela mu olaleya Omwene.—Malak. 3:10.
6. Ntakhara heeni mweeri wa Otupro a 2014 onahaala okhala wavameekhaaya?
6 Mweeri wa Otupro a 2014 inahaala waakhwana iyaakha 100 sa oyariwa wa Omwene. Moophwanelela, Mulipeleli a mweeri yoowo onahaala ovuwiha Omwene wa Muluku. Ntakhara heeni ohiilipixerya ovaha erevista yeela wa achu ancipale munaweryaanyu? Vaavaa nnuupuwelaahu muhoolo, nnanwerya otitelele olaleerya “mitchaka yaphama ya Omwene wa Muluku” wa yaale anahaala owiriyana—Saw. 8:12.
[Epaaxina Ohirivo Echu 4, 5, 6]