Wunnuwiha Mavyakelo ahu mu Orummwa—Wooniherya Opwacha
Ntakhara Heeni ti Yoochuneya: Yesu awoona achu ntoko mmoha ti mmoha, nave aahooniherya osivela ni waapwacha. Ntoko yootakiherya, mu elukuluku emoha Yesu aamoriwa ikharari ni makacamiho a mulopwana yoowo ahiiwa, nyenya vaavaa owo aampenunxeiye, eenreno eyo ari meekheiye, ocai wa muloko. (Mar. 7:31-35) Owo aahooniherya ncicimiho wa oohuserya awe moorweela wa osuwela okotakota waya ni ohiwaaceerya mahusiheryo. (Yoh. 16:12) Naamwi ari wirimu, Yesu nlelo onnooniherya opacha wawe. (2 Tim. 4:17) Ntoko oomuchara a Kiristu, nnachuna omutakiherya. (1 Pet. 2:21; 1 Yoh. 3:16, 18) Mwa yeeyo, nnahaala okhalano mphurelo mu orummwa wahu wakhala wi ninnooniherya ncicimiho wa namakhala, ni osuwela makhalelo awe, soochuna sawe, ni wuukhuwa wawe. Owo onahaala osiveliwa vancipale oniwiriyana wakhala wi ohoona wi hiyaano hanri pahiru mmuteko wa olaleya michaka naari ohiya yoolaleeryiwa, opwaha yeeyo, hiyaano ninnampwacha yoowo.
Mukhalelo wa Weerano Yeela:
• Mwiirehererye phaama. Mwiichaalele, mutheyeke vakhaani, nave mooniheryeke onthamwene.
• Mukhale oovareryela. Munnoona echu enooniherya wi muchu owo ookhalano anamwane? onnasiveliwa kapinka naari axinama? apwanne owo ookhalano malapelo oneemereryeiye? Munaphwanela otoroka mapaceryiho anyu wi muthokororye mukhalelo awe.
• Mmukohe moonelo awe, nave mmuwiriyane moomaaleleya muhimukwatelenle. Mumvareryeke wi mooniherye wi munanwiriyana. Muthamalele ni murima woothene sooloca sawe. Muhaacerye oloca.
• Mukhale a waakuvela otorokeya. Wakhala wookhweleya, mutoroke mapaceryiho anyu wi muthokororye wuukhuwa wa muchu owo. Eyo ti yookhweya opwaha munuupuwelaanyu, woona wi itrataato sahu, iproxura, irevista sinnathokororya miyaha soohiyana hiyana. Wakhala wi nyuwaano mphin’ye mu elukuluku yoohiphwanelela, akhweya aweiwale, mukukuce mwaha anyu.
Mweererye Ela Variyari va Mweeri:
• Mukhaleno nikupa na wiivyakiha variyari va malapelo a echoko, naari mu orummwa, mukhalelo mulaleeryi onatorokeiye mapaceryiho awe wi athokororye echu yeeyo namakhala olonceiye.
• Variyari va muthukumano wa muteko wa mmacani, munna onahoolela onaphwanela othokororya naari wooniherya mukhalelo wa wooniherya opwacha.