Weeciha Mwa Mphurelo Soohuserya sa Piipiliya
1. Ekari taani ni murici alaleeryi aryaayano?
1 Haavo onawerya omurumeela Muluku waahikhala wi Yehova ‘ompurula yowo.’ (Yoh. 6:44) Naamwi hiiha, alaleeryi yaawo aneeciha soohuserya sa Piipiliya anaphwanela opaka makupa aya mu waakhaviherya achu wiiwexexa yootaphulela ya michaka yaphaama. Onachuneya wiirehererya. Waalakhanya pahiru iparakrafo ni opaka nikoho nrempwe henaakhwanela wi nimukhaviherye oohuserya wiiwexexa mwawaakuveya ni oya vahoolo.
2. Wi neecihe soohuserya sa Piipiliya mwa mphurelo tiheeni nnaphwanelaahu waakhwaniherya?
2 Wi yeecihe mwa mphurelo soohuserya sa Piipiliya, alaleeryi anaphwanela waakhaviherya oohuserya aya wi (1) yiiwexexe mahusiheryo a Piipiliya, (2) yeemererya mahusiheryo a Piipiliya, ni (3) epharihele muteko mahusiheryo a Piipiliya. (Yoh. 3:16; 17:3; Yak. 2:26) Enahaala oviravo elukuluku yincipale wi awo etoroke muupuwelo ni ochariha. Matorokelo ari oothene anooniherya wi annaaceererya onthamwene aya ni Yehova ni wiiveleela wa yoowo.
3. Ntakhara heeni ohusiha mwa mphurelo onavolowela opaka makoho a moonelo?
3 Tiheeni Oohuserya a Piipiliya Onuupuweleiye?: Wi nsuwele wakhala wi oohuserya ahu a Piipiliya onniiwexexa ni weemererya yeeyo onahusereiye, nnaphwanela osepa oloca ichu sincipale, nave nimukhaviherye oohuserya oloca moonelo awe. (Yak. 1:19) Apwanne owo onniiwexexa tiheeni Piipiliya onaloceiye sa mwaha nimanlaahu othokororya? Onanwerya othariha mwaha yoola ni masu awe? Onoona hai vooloca sa seiho onahusereiye? Apwanne onneemererya wi mahusiheryo a Piipiliya teeparipari? (1 Ates. 2:13) Apwanne oniiwexexa wi yeeyo owo onahusereiye enaphwanela otoroka makhalelo a okumi awe? (Kol. 3:10) Wi nikhaleno maakhulo a makoho yaala, nnaphwanela opaka makoho a moonelo mwa ncicimiho, ni onwiriyana. —Mat. 16:13-16.
4. Tiheeni enaphwanela weeriwa wakhala wi oohuserya ookhalano makacamiho mu wiiwexexa naari opharihela muteko yeeyo onahusereiye orweela Mpiipiliyani?
4 Sookhovelela ni muupuwelo otikitheren’ye onnakhala woovila ohiya nave ennaviravo elukuluku yincipale wi muchu acharuwe. (2 Akor. 10:5) Hanka wakhala wi oohuserya a Piipiliya haneemererya naari opharihela muteko yeeyo owo onahusereiye? Moopisa murima onachuneya oweherya elukuluku yeeyo Masu a Muluku ni munepa waweela inahaalaaya otannya murima wa oohuserya. (1 Akor. 3:6, 7; Ahe. 4:12) Ohiya omukhinyererya, ti waphaama okelela mwaha mukina wakhala wi oohuserya haniiwexexa naari hanawerya opharihela muteko mahusiheryo a Piipiliya. Vaavaa nnatitelelaahu omuhusiha moopisa murima ni osivela onarweela Mpiipiliyani, moovira wa elukuluku owo onahaala woona ochuneya wa opaka matorokelo.