Mukhale Oolakelela Waapaka Arummwa
1. Tiheeni enachuneya wi achu evuluwe?
1 Ovuwihiwa wa Muteko wa mmacani wa eyaakha ya 2014 onnooniherya mvai wa achu a Muluku mu olaleerya michaka saphaama sa Omwene. (Mat. 24:14) Moorweela wa muteko wa empa ni empa, xaxaxa mukipici wa okawa itrataato, miwopelo, ni olaleerya wahu wa vanlakani, ninnaaphwanyiha achu ancipale michaka saphaama sa Mpiipiliyani opwaha khalai. Mwawiihiiha, wi achu evuluwe, nnaphwanela waakhaviherya okhala oomuchara a Yesu moorweela wa omuhuserya Piipiliya ni yaawo.—1 Tim. 2:4.
2. Makoho taani nnaphwanelaahu wiipakela wi enikhaviherye opaceryiha yoohuserya ya Piipiliya?
2 Mvahe Yoohuserya ya Piipiliya: Vaavaa muchu onooniheryeiye nchuno, apwanne munniilipixerya okhalano nunturu nawe nave omuxekurya moohilekela ni yoolakelela ya opaceryiha yoohuserya ya Piipiliya? Teevi yaari ekwaha yoopacerya mweerenryaayu wooniherya yoohuserya ya Piipiliya mu ovaanela woopacerya? Teevi yaari ekwaha yoopacerya mvanhaanyu yoohuserya ya Piipiliya wa yaale anasiveliwa ni soolaleeryiwa sahu? Apwanne momooniha exilema Ntakhara Heeni Omuhuserya Piipiliya? ni Como é um estudo Bíblico? wa asinthamwene oomutekoni, ooxikola, amwaacamani, amusi, naari achu akina mwaasuwenlaanyu? Vaavaa munapharihelaanyu meesa a soolaleeryiwa, munniilipixerya waaleela yaale anakuxa yoolaleeryiwa ya ohuserya wi ennavahiwa yoohuserya ya Piipiliya mahala ene?
3 Tiheeni enachuneya wi nihusihe eparipari mwa mphurelo?
3 Nikhaviheryo Nnarweela wa Yehova ni Yesu: Moorweela wa opaceryiha nlamulo ‘wahusiha atchu’ ni nsu “rowani,” Yesu aahooniherya wi nnaphwanela wiilipixerya wi nipaceryihe. Naamwi hiiha, owo hanihin’ye mukhatiihu nyenya onnaroromeliha okhala ni hiyaano. (Mat. 28:19, 20) Mwawaaceererya, Yehova oonivaha munepa awe waweela, ikaruma, ni ovyakiha yoowo nnachunaahu wi naahusihe achu eparipari. (Zak. 4:6; 2 Akor. 4:7) Nnaphwanela ovekela wi nikhaleno “okhwela ni werano wene” wi niivoliiherye mmuteko yoola wookhweleya.—Afil. 2:13.
4. Ntakhara heeni ninniilipixerya waapaka oohuserya?
4 Olaleerya michaka saphaama onnaruuhela ohakalala vancipale. Mwawiihiiha, ohakalala wahu onnaaceererya vaavaa nnamuhusihaahu muchu eparipari ni omukhaviherya onichara mu “ephiro eyo yoyano wukumini.” (Mat. 7:14; 1 Ates. 2:19, 20) Echu yookhweleyaxa mmuteko ahu wa waapaka oohuserya, ninnamuhakalaliha “ahinakhwela wi akina etholowe, nyenya wi othene ephiye wutcharuwani.”—2 Pet. 3:9.