Nroromelo Nanyu mu Soolaiherya sa Yehova, Nlimpe Ophiyerya Mweeryo Taani?

Yosuwa ni Solomoni, ooweeli ala yaaheerela onamoona wi hinaavo nsu nimoharu na soolaiherya sa Yehova niheeren’ye. (Yos 23:14; 1Mam 8:56) Onamoona weereliwe ni anamoona ala, mathipelo a nroromelo nahu.​—2Kor 13:1; Tito 1:2.

Ti mwawiihai Yehova aakhwaanihenreiye soolaiherya sawe mmahiku a Yosuwa? Vamoha ni echoko anyu, moone etrama erino muru ‘Hinaavovo Nsu Nimoharu Niheeren’ye.’ Voocharela muthokororye makoho ala anacharela: (1) Muni mutakiherye hai nroromelo na Rahapi? (Ahe 11:31; Tiy 2:24-26) (2) Ti mwawiihai yootakiherya ya Akani enooniheryaaya wi ohiiwelela onnaruuha sookhumelela soowaawa? (3) Naamwi Akapawoni yaari anakhoco akuru, ntakhara heeni yaalakelela onwoka Yosuwa ni opaka murecele ni Aisarayeli? (4) Su a Yehova yaakhwaanenle hai vaavaa mamwene mathanu a Amonita yaakelaaya owana ni Aisarayeli? (Yos 10:5-14) (5) Yehova onookhaviheryaani hai vaavaa munakuhaanyu Omwene wa Muluku ni ekhaikhai awe mu nipuro noopacerya mu okumi anyu?​—Mat 6:33.

Vaavaa nnuupuwelaahu soothene seiho Yehova eenreiye, oneereiye, ni onahaaleiye weera, nroromelo nahu mwa soolaiherya sawe ninnalipiheya.​—Aro 8:31, 32.