Makoho a Alipa Awaalakhanya
Tiliini Onahaalaaya Okotelavo Olaleerya Michaka Saphaama?
Yesu ooloca: “Nave michaka saphaama seiha sa Omwene sinarwa silaleeryiwa veelaponi yoothene yavathi, wi sivahe onamoona wa maloko oothene, voocharela anamphiya makuchuwelo.” (Mat. 24:14) Masu awi “makuchuwelo” mu elocelo yoopacerya va eversikulu yeela ni iversikulu 6 ni 13, enaloca sa makuchuwelo a elapo ya Satana va Armaketo. (Wup. 16:14, 16) Mwawiihiiha, nnahaala otitelela olaleeryaka michaka saphaama ophiyerya ehalaka vakhaani omala makuchuwelo yaala. Eyo ennatoroka wiiwexexa wakhalai.
Khalai, niiwexexa wi nnahaala ohiya olaleerya michaka saphaama vaavaa Yoohooxa Etokotoko enahaalaaya opacerya ni otoloxiwa wa Papulu Mutokotoko. (Wup. 17:3, 5, 15, 16) Neemererya wi, vaavaa Yoohooxa Etokotoko yaahaalaaya opacerya Yehova haahaala waavaha achu ekari ya weemererya michaka saphaama. (Yes. 61:2) Nuupuwela tho wi yaale yaahaala okophola va Yoohooxa Etokotoko yaahaala wooniherya omulapa waya Yehova ehaakumve yaweereya yeela. Hiyaano naahaalikanyiha ni Ayuta yaawo yaakophonle mu otoloxiwa wa Yerusalemu mu 607 E.E.K. Achu yaala yaaheliwa eneneeryo wi ekophole woosiilo ene nthowa nawi yaanamulapela Yehova nave yaaniica yoonanara. (Ese. 5:11; 9:4) Mwawiihiiha, olikanyiha yoola honiiwanana ni masu a Yesu anaphwanyeya mu Mateyu 24:14, yaawo enooniherya wi achu ananwerya okhalano ekari ya weemererya michaka saphaama ophiyerya ehalaka vakhaani omala makuchuwelo va Armaketo.
Wa nthowa na wiiwexexa wahu wookwakwaleyaxa onaphwanyeya mu Mateyu 24:14, ninnaphwanela tho otoroka wiiwexexa wahu onalociwa mu Wupulula 16:21 yoowo onaloca sa maluku matokotoko a maralala. Waalikhela okina wohooniherya wi soorepa soopiili sinniiwanana. Mwawiihai? Naakhulo ninnaphwanyeya mmukhalelo achu anaakhulelaaya michaka sa Omwene. Wa “yaale anavuluxiwa,” murummwa Paulo oorepa wi michaka saphaama ori “muhiriri wa wunkhela wa okumi.” Nyenya wa amwiicani a Muluku, ori muchaka woonanara “muhiriri wa okhwa.” (2 Ako. 2:15, 16) Enniica muchaka wa Omwene nthowa nawi onnuupulula wi elapo yeeyo awo enasivelaaya ti yoonanara, enalamuleliwa ni Satana nave wi moohilekela enahaala otoloxiwa.—Yoh. 7:7; 1 Yoh. 2:17; 5:19.
Moone tho wi, maluku matokotoko a maralala ooxiphela enahaala okhala ‘matokotokoxa.’ Eyo enataphulela wi variyari va yoohooxa etokotoko, muteko woolaleerya onanwerya okhala woovilaxa naari wi, nsina na Yehova nnahaala osuweliwa opwaha khalai. (Ese. 39:7) Apwanne mu elukuluku yeeyo, amanle Papulu Mutokotoko otoloxiwa achu akina enahaala osiveliwa ni michaka hiiha ntoko muhiriri wawunkhela woosiva? Eyo ti yooweryeya. Akhweya nyuwaano munnuupuwela naari munnasuwela wi mu iyaakha sincipale Anamoona a Yehova aalokoha sa omala wa malapelo atheru.
Eyo ennalikana ni yeeyo yeeren’ye o Yikuputu akhalai ivinre Ipahu Khumi. Yehova amanle ‘waathoriha amiluku oothene o Yikuputu,’ aahaaphitaanyeryavo va achu awe “achu ancipale” yaawo yahaari Aisarayeli. (Muk. 12:12, 37, 38, TNM) Achu yaala akhweya yaahithanla opwaha ni achu a Yehova vaavaa yoonnaaya wi soothene seiho Mose aalonceiye saaheereya wa emoha ti emoha sa Ipahu seiye Khumi saaruule.
Muchu ori oothene yoowo onahaala othanla omurumeela Yehova amanle otoloxiwa Papulu Mutokotoko, onahaala okhalano ekari ya opaka yaphaama wa anna a Kristu yaawo nlelo enahaala okhala veelaponi yavathi. (Mat. 25:34-36, 40) Mwawiihiiha, ekari yeela ya othorihiwa ntoko ipucepuche onahaala omala ahaakumve Armaketo, vaavaa oothanliwa oohalela enahaalaaya waakhela nchuwelo naya wirimu.
Wiiwexexa yoola wookwakwaleya onnooniherya owerya otokweene wa osivela ni ikharari sa Yehova. Mweeparipari, owo “hanachuna wi muchu mmoharu mano atoloxiwe, nto onachuna wi oothene erukunuxe murima.”—2 Pet. 3:9.