11 Owetha

OWETHA TIHEENI?

Achu oowetha hanoova olapa. Moohiyana, annasiveliwa olapa wi yiivakulele ni waakhaviherya akina naamwi muteko owo ohiri woocicimiheya.

NTAKHARA HEENI TI YOOCHUNEYA?

Eparipari ti yawi okumi ti woosareya mirici. Mweelapo yeela achu ancipale ahinasiveliwaaya olapa mwakuru, olapa moowetha onahaala woophwanyihaani mphurelo wawaaca.—Eklesiyaste 3:13.

“Kohoona wi, wakhala wi muchu onnalapa moowetha, onnakhalano moonelo woohakalala. Moonelo yoowo wookikhaviherya osiveliwa olapa. Okhalano moonelo waphaama vooloca sa muteko onamookhaviheryaani ophwanya ncicimiho.”—Reyon.

PIIPILIYA ONI: “Muteko wothene wokhalano nlivelo naya.”—Masiposipo 14:23.

ECHU YAWEERA

Mukhaleno moonelo waphaama vooloca sa muteko mucharihaka sooleeliherya iha:

Musiveliweke ohuserya opaka phaama ichu. Waakhala wi munalapa muteko, naari munakhwaaxa muteko wa owaani, naari muteko vyakala, musiveliweke ni echu munapakaanyu. Mmanle opaka muteko anyu phaama, mwaavye mikhalelo wi murehererye. Vaavaa munakhalaanyuno mavyakelo, munahaala osiveliwakano muteko anyu.

PIIPILIYA ONI: “Womona mutxhu onaphara phama muteko awe? Owo onammulapaka mwene, hakàlapa atxhu òhisuwanyeya.”—Masiposipo 22:29.

Moone ichu inavolowela. Mmikhalelo sincipale, vaavaa munathokororyaanyu murici anyu phaama, munnakhaviherya akina. Ntoko yootakiherya, vaavaa munawethanyu mmuteko anyu, munnaakhweiherya akina aveechokoni vanyu.

PIIPILIYA ONI: “Onavaha ori [oohakalala] ompwaha yole onakhela.”—Saweriwa T’arummwa 20:35.

Mwaaceererye muteko anyu. Ohiya olapa vakhaani, mweererye waacererya muteko anyu opwaha enaweheryiwaaya. Mmukhalelo yoowo, nyuwo munnavareryela ekumi anyu—mwaaceererye muteko, ohiya nthowa nawi munamukhinyereryiwa, koma nthowa nawi yoolakelela anyu.—Mateu 5:41.

PIIPILIYA ONI: “Nto nkikhwenle wera etxhu weyano ohikemihenrye, wi merelo-à aphama ehikhale ophareliwa, nto awilakelela.”—Filémone 14.

Mukhale oophimelela. Achu oowetha tahi amankoonya navetho tahi wi anamoona olapa elukuluku yoothene. Awo annaphimelela, ephwanyaka ohakalala mmuteko aya wakuru ni elukuluku ya wiichuuwa.

PIIPILIYA ONI: “Nto ti yotxhuneyasa mutxhu witxhùwa vakhani, èliwaka murima ni itxhu vakhani, ohiya mutxhu olapa ahiphurak’etxhu!”—Eklesiyaste 4:6.