Mmuhusihe Mwaninyu Okhala Awiiyeviha

WIIYEVIHA TIHEENI?

Muchu awiiyeviha onnaacicimiha akina, haniirumiha nave hanaweherya okhalihiwa mmukhalelo wavameekhaaya. Nave owo onnaathokororya achu akina nave ori ooreheryeya ohuserya sa yaawo.

Achu akina anuupuwela wi muchu awiiyeviha tooceecheya. Nto, mweeparipari, muchu awiiyeviha toolipa ntakhara wi onnachuneya olipa murima wi muchu eemererye soohesa sawe ni wiiwexexa wi sookhalavo ichu muchu ohinaweryeiye opaka.

NTAKHARA HEENI WIIYEVIHA TI WOOCHUNEYA?

• Muchu awiiyeviha onnakhalano asinthamwene. Liivuru Ereca ya Wiirumihaa ooloca: “Mwawooneya, achu awiiyeviha ti wookhweya opaka onthamwene ni akina” nave wi awo, “anniiwexexa ichu.”

• Wiiyeviha onammukhaviherya mwaninyu omwaahiyu. Ohuserya okhala awiiyeviha onammukhaviherya mwaninyu hiihaano ni omwaahiyu—ntoko yootakiherya, vaavaa onaavyeiye muteko. Leonard Sax oriye: “Mmiravo oniicicimiha moopwaha makhero nave ohinasuwela soohesa sawe hani akhumelele phaama vaavaa onapakeliweiye makoho ntakhara muteko. Nto mmiravo yoowo onachuna osuwela echu mulipa ookoha onaweheryeiye wa yoowo onnakhalano ekari ya ophwanya muteko.”b

MUKHALELO WA OMUHUSIHA MWANINYU OKHALA A WIIYEVIHA

Mmukhaviherye mwaninyu ohiisoonamo

NLAKIHERYO NA MPIIPILIYA: “Oomwi muchu mukina aniisoona okhala echu enevo, oniiwoka mwaneene.”—Galasya 6:3.

• Musepeke waalocela anamwane anyu ichu ihinahaala weereya. Masu ntoko “Soothene onuupuwelaawe sinahaala weereya,” ni “Weyaano onanwerya okhala yeeyo onachunaawe” anamukhala ntoko masu eeparipari, nto mwawooneya tahi eeparipari. Mwaninyu onamukhala ohakalala wakhala wi okhalano mphimo weeparipari nave iilipixerya okhwaaniherya.

• Mmuthamalele mwaninyu mu ichu opankeiye. Omuthamalelaxa mwaninyu ilukuluku soothene heni emukhaviherye okhala awiiyeviha. Mwawiihiiha, mmuthamaleleke mu miteko sooluluwanya.

• Muhele mphimo mathatelo a mwaninyu mmukhalelo wa opharihela ikhankoonya. Wiiliwiili, achu annasiveliwa opharihela ikhankoonya wi evuwihe mavyakelo aya ni ichu anapakaaya. Eyo ti yoohiyana ni okhala awiiyeviha.

• Mmuceenyerye mwaninyu oveka nikhurumuwelo. Mmukhaviherye mwaninyu woona yoohesa opankeiye, weemererya soohesa sawe ni oveka nikhurumuwelo.

Mmuhusihe mwaninyu okhala oothamalela

NLAKIHERYO NA MPIIPILIYA: ‘Muthamaleleke.’—Kolosi 3:15.

• Othamalela wa soopatuxiwa. Anamwane anaphwanela ovarerya soopatuxiwa ni wiiwexexa wi ninnachuna seiyo wi nikhale. Ninnachuna echeku wi niweryeke omumula, maahi wi niwuryeke ni soolya wi nlyeeke. Mpharihele sawooniherya seiha wi mmukhaviherye ovaha esisapo, otikhiniheyano ni othamalela ichu Muluku opatunxeiye.

• Waathamalela achu. Mmuupuxeryeke mwaninyu wi onamukhalavo muchu ompwaha owo mu echu yammoori nave onaphwanela ocicimihaka mavyakelo aakina, ohiya waakhalela nrima.

• Wooniherya othamalela. Mmuhusihe mwaninyu oloca wi koothamalela ni murima woothene, ohiya omukhinyererya. Ennalociwa wi othamalela mapacereryo awiiyeviha.

Mmuhusihe mwaninyu wi ti waphaama waarumeela akina

NLAKIHERYO NA MPIIPILIYA: “Nto mwiiyeviheke; mmoha ni mmoha amweereke mukhwaawe wi toompwaha. Mmoha ni mmoha ahithokororyeke sawaweru, nto saakhweiye tho.”—Filipi 2:3, 4.

• Mmurumeke mwaninyu opaka miteko sa vaate. Omuhiiha mwaana miteko sa vaate enammweeriha wiisoonaka okhala oochuneyaxa ohiya yeeyo aahaaleiye opaka. Owo onaphwanela wiiwexexa wi muchu onathata amalinhe muteko, mwa yeeyo owo onaphwanela opacerya ophara miteko sa vaate voocharela anaya othata. Mmutharihele wi opaka miteko sa vaate ennakhaviherya emusi yoothene nave wi oothene anahaala okhala oohakalala ni omucicimiha wakhala wi owo oheerano yeeyo.

• Mucicimiherye wi opaka ichu ntakhara akina ti yaphaama. Waarumeela akina echu yoochuneyaxa enooniherya wunnuwa. Mwawiihiiha, mmukhaviherye mwaninyu waasuwela taani anachuna nikhaviheryo ni echu onaphwaneleiye weera. Mmuthamalele mwaninyu nave mmukhaviherye wa yeeyo onapakeiye ntakhara akina.