MWAHA 5
Okumi Woovila Onnapacerya
OKHWIPI wa emaca ya Eeteni, Aatamu ni Haava yaahikhala ni sookachamiha sincipale. Yaanaphwanela ophara muteko mootothowa wii ekhale ni yoolya. Mpuroni mwa miri yooreera ya sawiima, yoona miiwa nnakhwali sinnuwaka mowarukurerya. Ela ti yeeyo yeerenyee vaavaa Aatamu ni Haava yahaamwiiwelenlaaya Muluku ni ohiya okhala asinthamwene Awe.
Yootepaxa, Aatamu ni Haava yaahipacerya okhwaaka. Muupuwele wii Muluku ahaalopola wii yaahaala okhwaaka, yakhala wii aalya yawiima ya mwiri wa mmori. Phameene, nihiku nenlo yalyiyaaya yaahipacerya okhwaaka. Yaalosonwe mwawiihai nki ohimwiiwelela Muluku!
Anamwane oothene a Aatamu ni Haava, yaayariwe vachuli va wiikariwa wa asitithyaya ti Muluku mu emaca ya Eeteni. Otaphulela wii anamwanaawotho yahaala wuuluvalaka ni okhwa.
Aatamu ni Haava yaamwiiwelenle Yehova, okumi aaya ni wa anamwanaaya waahaala okhala woohakalala. Oothene yahaala oowerya okhala ni okumi wawiikhalelaru moohakalala veelaponi yavathi. Haavovo ii uuluvaleke, wiicheliwa ni okhwa.
Muluku onachuna wii achu ekhaleke ni okumi wawiikhalelaru moohakalala, nave olakana wii nihiku nikina inahaala okhala hiihaa. Tahi elaporu yoothene enii ekhale yooreera, nyenya oothene anahaala okhala ni okumi. Nave oothene, veelaponi yavathi, anahaala okhala asinthamwene mukina ni mukhwaawe ni a Muluku.
Nyenya Haava hakhanletho nthamwene a Muluku. Hiihaanto, vawaayara anamwane hiwaakhala wookhweya wa yoowo. Anoona wiichela. Ohiimwiiwelela wawe Yehova wahimuruuhela othanana wawaacha, tahi hiihaa?
Aatamu ni Haava yaahikhalano anamwane ancipale aasilopwana ni aasithiyana. Vaavaa mwaanaya oopacerya aayariwiiye, yamuchunwe wii ti Kayine. Mwaanaya anaawiili aakhenle nsina nawii Haavele. Mano tiheeni yeeyo yeerenyee wa yaawo? Mano nyuwo moosuwela?
Mapacereryo 3:16-23; 4:1, 2; Yawupulula 21:3, 4.