MWAHA 6
Mwaana Mmoha Ooreera Murima Ni Mukina Oonanara Murima
NKAWOONENI vano Kayine ni Haavele. Ahiinuwa vano. Kayine aahikhala mulipa olima. Aalima mmiso, sawiima nnamurovo.
Haavele aahikhala mukukhula a ipucepuche. Aanasiveliwa waapwacha asaana a ipucepuche. Awo yahiinnuwa, nave, mu elukuluku yavakhaani, Haavele aahikhala ni muloko wa ipucepuche wii apwacheke.
Nihiku nikina, Kayine ni Haavele yaahiveleela yamahala wa Muluku. Kayine aarunhe soolya sa mmacani. Nave Haavele aarunhe epucepuche awe yaphaamaxa. Yehova aahisiveliwa ni Haavele ni yamahalaawe. Nyenya haasiveliwe ni Kayine ni yamahalaawe. Mano moosuwela nthowa nene?
Hiwaari nthowaru pahi nawii yamahala ya Haavele yaari yaphaamaxa opwaha ya Kayine. Waari nthowa nawii Haavele aari aphaama. Anamusivela Yehova ni munneeni. Nyenya, Kayine aari oonanara murima; haamusivela munneeni.
Hiihaa, Muluku ahimuleela Kayine wii atoroke mukhalelo awe. Nyenya Kayine haaiwelenle. Aahinanariwa vancipale, nthowa nawii Muluku aasiveliwexa ni Haavele. Vanonto, Kayine aahi wa Haavele, ‘Hinko niye omaca.’ Vavaa yaryaaya weiwo meekhaayawo, Kayine aahimmana munneeni Haavele. Aahimmana moomulipiha, amwiipha. Yaari yoonanara mwawiihainto!
Haavele aahikhwa, nyenya ninleelo Muluku onnamuupuwela. Haavele aari aphaama, nave Yehova hanaachuwalaru achu awihiihaa. Va nthowa nenla, nihiku nikina, Yehova Muluku onahaala omukookiherya Haavele okumi. Vaavanto, Haavele harwaruu akhwa. Onahaala oowerya okhala ni okumi wawiikhalelaru veelaponi yavathi. Mano honahaala okhala waphaama waasuwela achu awihiihaa ntoko Haavele?
Nyenya, Muluku hanasiveliwa ni achu ntoko Kayine. Ti nthowa nene, vachuli va Kayine omwiipha munneeni, Muluku aahimulaka, amurumiha ociiwene ni emusi awe. Vavaa Kayine akeliiye omakupa makina a elapo, ahimukuxa mmoha a arokorawe, akhala mwaariye.
Wovira wa elukuluku, Kayine ni mwaariye yaahaayara anamwane. Anamwane akina aasilopwana ni aasithiyana a Aatamu ni Haava yaahithela ni otheliwa navetho yaahaayara anamwane. Mu elukuluku yavakhaani, waahikhalavo achu ancipale veelaponi. Hinkoni noone mummo achu awo yaakhalenlaaya.
Mapacereryo 4:2-26; 1 Yohane 3:11, 12; Yohane 11:25.