MWAHA 12
Empa Etokotoko Yoorekama Ya Achu
WAAHIVIRAVO iyaakha sincipale. Anamwane a Noowa yaahikhala ni anamwane ancipale. Nave ala yaahiinnuwa ekhalatho ni anamwane. Mwawaakuveya waahikhalavo achu ancipale veelaponi yavathi.
Mmoha a achweene yaala aari musulwawe anaawiili a Noowa, aweeriwa Nimuroti. Aari muchu oonanara, yoowo aatothaa ni wiipha inama ni achweene. Nimuroti aahiipakatho mwene wa achu akina. Muluku haasiveliwa ni Nimuroti.
Oothene velukuluku yeele, yaaloca elocelo emoharu pahi. Nimuroti aachunne wii oothene ekhaleru vamoha, wii awerye waalamulelaka. Mano moosuwela yeeyo owo eenriyento vano? Aahilamula wii eteke epooma ni empa etokotoko yoorekama. Munnawerya owoona veerukuni va yuupaka itixolu.
Yehova Muluku haasiveliwe ni yootekeene yeela. Muluku aachuna wii achu emwalamwale ni ekhale veelaponi yoothene. Nyenya awo yaariye: ‘Hinkoni! Nipake epooma ni empa etokotoko yoorekama vancipale, enii ephiye wirimu. Hiihaanto nnahaala ovuwa!’ Achweene yaale yaachuna wiichichimihaka yaawo asineene, ohii Muluku.
Va nthowa nenla, Muluku aahaahiiha oteka empa yoorekama eyo. Mano moosuwela mummo eerenliiye? Aaheriha wii oothene, mwawaakuveya, eloceke ilocelo soohiyana-hiyana, ohii emoharu pahi. Alipa ootekaawo hiyaaiwanannerutho. Va nthowa nenla, nsina na epooma eyo naakhala neeriwaka Paapel, nari Paapulu, nenlo nnataphulela “Waakanyeryeya.”
Achweene yaale yaahipacerya vanonto omwalamwalavo va Paapel. Makhuuru a achu yaaloca elocelo emoha-moha yaahikhala vamoha mmakupa makina a elapo yavathi.
Mapacereryo 10:1, 8-10; 11:1-9.