MWAHA 20
Tiina Onnakhala Mu Sokachamiha
MANO munnawoona yawo Tiina onayiiye waaxekurya? Owo onaya waxekurya akina a asimwali a elapo ya Kaanani. Mano atiithinya Yaakopo annasiveliwa ni yeeyo? Wii mwaakhule eyo, mwavyavye wuupuwelela sa yeeyo Aaparahamu ni Isaaki yuupuwelaaya sa asimwali a o Kaanani.
Mano Aaparahamu aanacuna wii mwanawe Isaaki amuthele muKaanani? Hooye. Mano Isaaki ni Repeka yaanacuna wii mwanaya Yaakopo amuthele mwali muKaanani? Hooye. Mano moosuwela nthowa nene?
Waari nthowa nawii achu ala o Kaanani yaalapela miluku yoowoka. Hiyaari achu aphaama wii muchu akhaleno ntoko iyawe nari mwaariye, nave hiyaari achu aphaama wi akhaleno ntoko asinthamwene. Va nthowa nenla, ninnawerya ochichimiherya wii Yaakopo haasiveliweno wii mwanawe Tiina aahipaka onthamwene ni asimwalyene yaawo aKaanani.
Nave Tiina aahikhala chiri mu yookachamiha. Mano munnamoona mulopwana ole muKaanani verukuni va, onamuweha Tiina? Nsina nawe ti Xikemu. Nihiku nikina, vaavaa Tiina aaxekuryiiye, Xikemu aahimphara Tiina nave aahimwaakeeleliha okona ni yoowo. Ela yaari yoochekeya, nthowa nawii oothelana pahi tanawerya okona vamoha. Yoonanara ela yeeyo Xikemu eenriiye wa Tiina yaaheeriha sokachamiha sincipalexa.
Vaavaa asinneeni a Tiina yaasuwenlaaya eyo, yaahinanariwa vancipale. Eeli a yaawo, Simiyone ni Leevi, yaahinanariwa vancipale, ekuxa mavaka, evolowa m’muceceni nave yaaphwanya alopwana awo motutuxa. Awo ni asinnaya yaahimwiipha Xikemu ni alopwana akina oothene. Yaakopo aahinanariwa nthowa na yoonanara yeeyo anamwanaawe yeenraaya.
Mano soothene iho saapachenrye mwawiihai? Saapachenrye nthowa nawii Tiina aahikhala nthamwene a achu yaawo yahaiwelela malamulo a Muluku. Hiyo hinnacuna okhala ni asinthamwene awihiihaa, tahi eeparipari?
Mapacereryo 34:1-31.