MWAHA 52
Gideoni Ni Alopwanaawe 300
MANO munnoona yeeyo enneereya va? Oothenaala ti alipa akhoco a Isarayeli. Alopwanaawo enuurama wi ewurye. Mulopwanoowo eemenle vakhiviru vaya ti Mulipa Oothoriha Gideoni. Owo onavarerya mummo awo anawuryelaaya maahi.
Nkoonani phaama ohiyana mmawuryelo a alopwanaawo. Akina anuuramiha muru ophiyerya mmaahini. Nyenya mmoha onrika maahi ni ntata, wii aweryeke woona tiheeni enneereya. Ela yaari yoochuneya, nthowa nawii Yehova aahimuleela Gideoni wii aaphwanela waathanla alopwana yaaworu yii ewuryeke yiiweheryaka. Wa akinaawo Muluku aahi, yaanaphwanela orowihiwa owaani. Hinkoni noone nthowa nene.
AIsarayeli yaaritho mu sookachamiha. Ti wawii hiyaamwiiwelenle Yehova. Achu a o Mitiyani yaari yaalamulelaka ni waaphoreiha. Va nthowa nla, aIsarayeli yaahikhuwela wa Yehova wii ekhaviheryiwe, nave Yehova aahiiwa okhuwela waya.
Yehova aahilamula wii Gideoni athukumanye muloko wakhoco, nave Gideoni aahaathukumanya alipa akhoco 32,000. Nyenya waarivo muloko wakhoco wa alopwana 135,000 woovanyihana ni Isarayeli. Hiihaanto Yehova aahi wa Gideoni: ‘Alopwana oryaaweno weyo aatepa waaca.’ Mano ntakhara heni aalonchiiye hiihaa?
Nthowa nawii Isarayeli iiriiye apwahe okhoconi akhweya yii yuupuwele wii awo apwanhe wa yaawo mekhaaya. Yaahaala wuupuwelaka wii hiyaachuneleya okhaviheryiwa ti Yehova wii epwahe. Va nthowa nla Yehova aahi wa Gideoni: ‘Waarowihe owaani alopwanaawo enii yooveke.’ Hiihaa, alipa akhochwaawe 22,000 yaahikookela owaani. Owo aahanle ni alopwana 10,000 pahiru wii ewane moovanyihana ni 135,000.
Nyenya, Yehova aahi: ‘Nivano alopwana oryaaweno aatepa waaca.’ Va nthowa nla, aahilamula wii Gideoni aweerihe alopwanaawo owurya maahi a mwaamuhiche ola, hiihaanto aarowihaka yaawo yuuramiha muru wii ewurye. ‘Kinahaala woovaha opwaha ni 300 yaawo yaakhanle yiiweheryaka voowurya,’ aahilakanano Yehova.
Ewora yakhoco yaahiphiya. Gideoni aahaakuha awawe awo 300 mmakhuuru mararu. Ahimvaha mulopwana ori oothene nipeka nimoha ni eparatho yookhala ni muthiko mpuwa mwaya. Mu ohiyu eriyari, awo yaahithukumana moorukurerya mikocha ya amwiicani. Ovinyerya vavaa, oothene mu elukuluku emoha yeeyo yaahoopa mapekaaya nave yaahipwexa iparatho saya, ekhuwelaka: ‘Nlema na Yehova ni na Gideoni!’ Asurutaatu amwiicani awo, voovinya, yaahaakanyeryeya nave yaahoova. Oothene yaahipacerya ochawa, nave aIsarayeli yaahipwaha ekhochweeyo.
Amuthoriha ikapitulu 6 ophiyerya 8.