MWAHA 54
Mulopwana Akuru Vancipale
MANO moosuwela nsina na mulopwana akuruxa aakhanlewo? Owo aari mulipa oothoriha awiichaniwa Samsoni. Aari Yehova yoowo aamvanhe Samsoni ikuru. Owo ahaakumve oyariwa, Yehova aahi wa amannya: ‘Weyo onahaala okhala ni mwaana mwaamulopwana. Owo onahaala ohoolela mu ovuluxa Isarayeli wa asinaFilisti.’
AsinaFilisti yaari achu oonanara, yaawo yaakhala o Kaanani. Yaahikhala ni alipa akhoco ancipale nave yaanaakachamiha a Isarayeli. Ekwaha ekina, Samsoni ayaaka weiwo asinaFilisti yaakhalaayawo aahiwana ni mwaco. Nyenya owo ahimwiipha mwachoowo ni matataru pahi. Ahiwiiphatho asinaFilisti onanaraawo masana masaneene.
Samsoni aahimwaakamela muthiyana awiichaniwa Dalila. Ahooleli asinaFilisti yahilaiherya mmoha ni mmoha ayaawo omvaha Dalila ikhorowa samalukweene sa eparata 1,100 wakhala wii ohaathoriherya yeeyo yaamweeriha Samsoni okhala akuruxa. Dalila haari nthamwene a Samsoni, naari a achu a Muluku, nyenya aachuna ikhorowa. Aahimukoha Samsoni mwawaakeeleliha sa yeeyo yaamweeriha okhala akuru.
Vookuchula vaya, Samsoni aahithoriha yawiiphiiniiyo. ‘Miihi aka hantonko ochemmwa,’ aahi yoowo. ‘Oyariwa wooyariwa, Muluku aahikithanla ntoko murummwa avameekheiye, ntoko muNaziri. Kachemaru miihi, nkikhala ni ikuru.’
Dalila asuwenleene sa ela, aaheriha wii Samsoni akone. Vanonto aahimwiichana mulopwana mmoha wii acheme miihi awe. Vavaa Samsoni aavinnyiiye, haarinoru ikuru. Vanonto aahiphariwa ni asinaFilisti. Yaala yaahimuchoola miitho nave yaahimpaka kapuro.
Nihiku nikina, asinaFilisti yaahipaka efesta etokotoko ntakhara a mulukwaaya Dagoni, emuruuha Samsoni wii aathatiheke. Nyenya miihi awe yeera yiinuwaleene wanaawiili. Samsoni aahi wa mmiravo yoowo aampharelelaa: ‘Kikuxerye va apocho yaawo anaxeereryaa empa yoothitaanyeryana ela.’ Vavaa, owo aahivekela ikuru wa Yehova nave aahiilipiha mwa apocho awo. Akhuwela: ‘Kikhwe miyo ni asinaFilisti.’ AsinaFilisti 3,000 yaari va efesteeyo yaahikhwa vavaa Samsoni aachikinnyiiye apocho awo nave empeeyo yaahikurumuwa.
Amuthoriha ikapitulu 13 ophiyerya 16.