MWAHA 57
Muluku Onnamuthanla Tavite
MANO munnoona yeeyo yeerenyee? Mmiravoowo ohaakiha epucepuche ela mwikharuni mwa napiili. Napiili owo aahiphara epucepucheeyo nave aahala okhuura. Nyenya mmiravoowo aahimwiikara owo nave aahaakiha epucepucheeyo vayanoni va napiili owo. Nave vavaa napiili owo eemelenliiye, mmiravoowo aahimphara nave ahimwiipha! Mu ekwaha ekina, aahaakiha epucepuche mwikharuni sa mwaco. Mano haari akuru mmiravo ola? Mano munamusuwela wii taani?
Ti mmiravo Tavite. Aakhala m’epooma ya Petelehemu. Ataataawe yaari Obede, mwaana a Rute ni Boazi. Mano munnawuupuwela yaawo? Nave atiithinya a Tavite aari Yese. Tavite aakukhula ipucepuche sa atiithinya. Aayariwe vachuli va iyaakha 10 Yehova amuthanlile Saawulu okhala mwene.
Ekwaha ekina, Yehova aahi wa Samuwele: ‘Okuxe makhurwa vakhaani oothanleya nave orowe owannyawe wa Yese, o Petelehemu. Koomuthanla mmoha a anamwanaawe wii akhale mwene.’ Samuwele voomoona mwaana mutokotoko a Yese, Eliabu, aahi wa yoowo mwaneene: ‘Ola onnaphwanela okhala yoowo othanliwe ti Yehova.’ Nyenya Yehova aahi wa yoowo: ‘Ohipwache sa mummo okhalenliiye oorekama ni ooreera. Nkimuthanlile ntoko mwene.’
Hiihaa, Yese aahimuthoonyiherya mwanawe Aminadabe wa Samuwele. Nyenya Samuwele aahi: ‘Hooye, Yehova hamuthanlileru.’ Voocharelavaya, Yese aahimuthoonyiherya mwanawe Xamaa. ‘Hooye, Yehova hamuthanlileru ola,’ aahi Samuwele. Yese aahaaruuha anamwanaawe athanu neeli wa Samuwele, nyenya Yehova haamuthanlile naari mmoharu a yaawo. ‘Mano oothene ti yaala?’ aahikoha Samuwele.
‘Nlelo okhalavo mwaamukhaanixa,’ aahi Yese. ‘Nyenya owo ori okhwipi iwe, athokororyaka ipucepuche.’ Tavite aphiyaka, Samueli aahoona wii aari mmiravo ooreera. ‘Ti yoola,’ aahi Yehova. ‘Miinela makhurwa va yoowo.’ Nave Samuwele aaheerano hiihaa. Vachuli vaya Tavite aahikhala mwene a Isarayeli.
1 Samuwele 17:34, 35; 16:1-13.