MWAHA 61
Tavite Ti Mwene
SAAWULU aaheererya wanaawiili omphara Tavite. Aahikuxerya asurutatu oororomeleya 3,000. Vavaa Tavite aasuwenliiye sa ela, aahaarumiha alipa-oohocha wii yasuwele vavaa Saawulu ni achwaawe yaathukumanaayavo ohiyu. Ovinyerya vavaa, Tavite aahaakoha eeli a achwaawe: ‘Mano taani onarowa ni miyo omikochani wa Saawulu?’
‘Miyo kinarowa,’ aahi Abisai. Abisai aari mwaana a murokorawe a Tavite, Zeruya. Vavaa Saawulu ni achwaawe yaarupaaya, Tavite ni Abisai yaahirowa moomaaleleya vamikochani vaa. Vavaa yaahikuxavo nivaka ni murinka sa Saawulu vakhiviru vawe. Haavovo aawoonne naari owiiwa, nthowa nawii yaamukona.
Ninnawoona va Tavite ni Abisai. Aachawa nave aawela veeruwani. Tavite aahikhuwela wa muhooleli a muloko wakhoco wa Isarayeli: ‘Abineri, mano ntakhara xeeni ohinamwiikichelaawe pwiya, mwenoowo? Nkoona nivaka ni murinkaawe siryaayawo?’
Saawulu aahihuhumuwa. Aahiroora nsu na Tavite nave aahikoha: ‘Mano ti weyo Tavite?’ Mano munnamoona Saawulu ni Abineri muhicho mmo?
‘Aayi, pwiyaka ni mwenaaka,’ aahaakhula Tavite. Nave aahimukoha: ‘Mano ntakhara heni onavyaa-vyaawe okiphara? Keenre eheni yoonanara? Nivaka nanyu ti nla, nyuwo mwene. Murumeeni mmoha a achwaanyu wii arwe akuxe.’
‘Koheera moonanara,’ aahaakhulela Saawulu. ‘Koheerano moolosowa.’ Vanonto, Tavite aahirowa nave Saawulu aahikookela owaani. Nyenya Tavite aahuupuwela: ‘Nihiku nikina nri noothene, Saawulu onahaala okiipha. Kinahaala ochawela weelaponi ya asinaFilisti.’ Nave ti yeeyo owo eenriiye. Tavite aahiwerya waawoka asinaFilisti, aaroromelihaka wii aari vamoha ni yaawo.
Elukuluku ekina vachuli vaya, asinaFilisti yaahirowa oya owana ni Isarayeli. Mu ekhochweeyo, Saawulu ni Yonatani ene yaahiiphiwa. Tavite aahithanana vancipale nave aahipaka nchipo nooreera, nnii: ‘Kinnathanana nthowa na weyo, munnaka Yonatani. Mummo miyo koosivelelaaka weyo!’
Mwawihiihaa, Tavite aahikookela o Isarayeli epooma ya Heeporoni. Wahikhalavo ekhoco veeri va yaawo yaamuthanlile mwaana a Saawulu, Isbosete, wii akhale mwene, ni va akina yaawo yamuchuna Tavite. Vookuchula vaya, achu a Tavite yaahipwaha. Tavite aarino iyaakha 30 akhalaka mwene. Aahilamulela mu iyaakha thanu napiili ni emeya mu Heeporoni. Akina a anamwane aayanriiye mummo ti Amnoni, Apusalamu ni Adonia.
Yaahiphiya elukuluku yawii Tavite ni achwaawe erowe yaakhe epooma yooreera eyo yawiichaniwa Yerusalemu, Yowapu mwaana mukina a murokorawe a Tavite, Zeruya aahihoolela ekhochweeyo. Tavite aahimuchuwela mwa ompaka okhala muhooleli a muloko wakhoco. Mwawihiihaa, Tavite aahipacerya olamulela mu Yerusalemu.
1 Samuwele 26:1-25; 27:1-7; 31:1-6; 2 Samuwele 1:26; 3:1-21; 5:1-10; 1 Matharihelo 11:1-9.