MWAHA 75
Anaamiravo Axexe O Paapulu
MWENE Nabukodonosor aahakuxerya o Paapulu aIsarayeli oohuserya vancipale. Vachuli vaya, mwene owo aahaathanla anaamiravo ooreeraxa ni oowaraalaxa. Munnawerya owoona va axexe a yaawo. Mmohoowo ti Daniyeli, nave akina araru awo asinaPaapulu yawiichanne okhala Sadraki, Mesaki ni Abedinego.
Nabukodonosor aahirehererya waahusiha anaamiravo awo wii erumeeleke mu empawe ya omwene. Vachuli va iyaakha raru sa ohuserya, aahala waathanla oowaraalaxa wii emukhaviherye othoriha sookachamiha. Mwene owo aachunne wii anaamiravo awo ekhale akuru ni akumi vavaa yaahuseryaaya. Va nthowa nla, aahaalamulela arummwaawe waavaha oothene awo yoolya emoha-moha yaphaama ni vinyo seiyo owo ni echokwaawe yaakhelaaya.
Nkamooneeni mwaammiravo owo Daniyeli. Mano moosuwela yeeyo aamuleenliiye Asipenazi, murummwa mutokotoko a Nabukodonosor? Daniyeli aamuleenle wii haachuna olya ichu soosiva sa vahasarini sa emeesa ya mwene. Nyenya Asipenazi aahikachamiheya. ‘Mwene oothanla yeeyo munaphwanelaanyu olya ni owurya,’ aahi yoowo. ‘Nave mwaahinooneya phaama ntoko anaamiravo akinaawo, onanwerya okiipha.’
Daniyeli vanonto, aahiloca wa mulipa ooweherya yoowo Asipenazi aamurummiiye omukhapelela owo vamoha ni asinthamwenaawe araru. Aahi: ‘Nkaneererye va mahiku 10. Onivaheke namurovo wii nimulyeeke ni maahi wii niwuryeke. Vachuli vaya, oniphwanaphwanihe ni anaamiravo akinaawo analya yoolya ya mwene, wii woone onooneya phaama taani.’
Mulipa ooweherya owo aaheemereryanano. Nave, omakuchuwelo wa mahiku 10, Daniyeli ni asinthamwenaawe araru awo yooneya akuruxa ohiyana ni anaamiravo akina oothene. Hiihaa, mulipa ooweherya owo aahaahiya wii emulyeeke namurovo, ohiya yoolya ya mwene.
Omakuchuwelo wa iyaakha raru, anaamiravo oothene yaahikuxeryiwa wa Nabukodonosor. Vachuli va oloca ni oothene awo, mwenoowo aamoonne Daniyeli ni asinthamwenaawe araru awo okhala oowaraalaxa. Aahikhala ni yaawo ompa yoomwene awe wii emukhaviheryeke. Elukuluku yoothene yeeyo mwene aakohiiye makoho wa Daniyeli, Sadraki, Mesaki ni Abedinego, awo yaanasuwela wuuluulela 10 ohiyana ni alipa a ephepa naari alipa amiruku awe.
Daniyeli 1:1-21.