MWAHA 85
Yesu Onnayariwa Munikholani
MANO munnasuwela wii mwanoola taani? Aayi, ti Yesu. Owo orimuyariwaru mu nikholani. Nikhola ti nipuro nenlo onakhapeleliwamo inama. Mariya onamwaatelela Yesu moolyelamo, mummo onaheliwamo yoolya ya apuuru ni inama sikina. Nyenya, mano ntakhara heni Mariya ni Yoosefe aryaaya muumu ni inama? Tahi nipuro nooyareliwamo mwaana, mano kahiyo?
Hooye, kahiyo. Nyenya ari muumule mwawihaa: Khuverenatore a o Roma, Kaisara Augusto, aahipaka nlamulo, wii oothene yaanaphwanela okookela o epoomani ya owannyaya, wii yarepeliwe nsina naya mu liivuru. Ahe, Yoosefe aayariwe o Petelehemu. Nyenya, vavaa yaaphinyaaya weiwo ni Mariya, hiyaarivoru eruku yawii awo ekhalemo. Ti nthowa nene yakelaaya okhala ni inama. Nave, va nihiku nene nenlo, Mariya aahimuyara Yesu! Nyenya ntoko munoonelaanyu, owo ookhala phaama.
Mano munnawerya owoona akukhula erwaaka wii emoone Yesu? Awo yaari otakhwani ohiyu, elyihaka ipucepuche, vavaa waarya wa omwaleela waarukurenryaaya. Aari mungelo! Akukhulaawo yaahoova. Nyenya mungelo owo aahi: ‘Muhoove! Vawi kookhalano michaka yaphaama wa nyuwo. Wi oyariwa olelo oPetelehemu Kristu, Apwiya. Owo onarwa avuluxa achu! Munaphwanya ohuruwela ekuwo, akonaka molyela.’ Mwawaakuveya, yaahirwa angelo ancipale emuchichimiha Muluku. Hiihaanto akukhulaawo yaahirowa mwawaakuva omwaavyavya Yesu, nave yaahimphwanya mwawaakuveya.
Mano moosuwela nthowa nene Yesu aariiye a vamekheiyexa? Mano moosuwela wii owo chiryene aari taani? Uupuwelani wii m’mwaha woopacerya wa liivuru ola, nooloca sa Mwaana oopacerya a Muluku. Mwaneene yoola aahiphara muteko ni Yehova opaka erimu, elapo yavathi ni sikina soothene. Hiihaanto, ola aari Yesu!
Aayi, Yehova aahikuxa okumi wa Mwanawe, wirimu, nave aahikuha mmirimani mwa Mariya. Mwawaakuveya mwaana aahipacerya winnuwa mwa yoowo, hiihaa ntoko mummo anamwane akina aninnuwelaaya mmirimani mwa amiyaya. Nyenya, mwaana ola aari Mwaana a Muluku. Hiihaa, Yesu aahiyariwa o Petelehemu weiwe munikholani. Mano munniwexexa nthowa nene angelo yaahakalalenlaaya vancipale ophiyerya wathoriherya achu wii Yesu aari ayariweene?