MWAHA 89
Yesu Onneeliha Empa Ya Muluku
YESU onakhala ntoko oonanariwa chiri, kahiyo? Mano moosuwela nthowa nene onanareliwiiye vancipale? Ori nthowa nawii alopwanaawo mu empa ya Muluku mu Yerusalemu aatepa okhala a nrima. Anavyavya ophwanya ikhorowa sincipale wa achu yaawo anarwa omuthamala Muluku.
Mano munnawoona asaana oothene awo amope, ipucepuche ni ipompa? Aahee, alopwanaawo aanatumiha mpamwene mummo. Moosuwela nthowa nene? Nthowa nawii aIsarayeli yaanaphwanela oveleela ephepa ya inama ni ipalame wa Muluku.
Nlamulo na Muluku naariye wii wakhala wii muIsarayeli oheera yoonanara, owo aanaphwanela opaka yooveleela wa Muluku. Navetho wahikhalavo ilukuluku sikina seiyo aIsarayeli yaphwanelaya opaka sooveleela. Nyenya mano yaahaala ophwanya woowi ipalame ni inama sawii eveleele wa Muluku?
AIsarayeli akina yaahikhalano ipalame ni inama. Yaanwerya oveleela hiiha. Nyenyanto ancipale, hiyarinono inama nari ipalame. Nave akina yaakhala ochaiwene ni o Yerusalemu, hiihaa hiyaawerya oruuha inama saya o empa ya Muluku eyo. Hiihaa, achwaawo yaanarwa nave yaanathuma inama soochuneya iho. Nyenya alopwanaawo yaanatepa owalameliha. Yaanaawoka achwaawo. Ohiyavo eyo, awo hiyaaphwanela otumihaka mu empa yeeyo ya Muluku.
Ti nthowa nene Yesu aananareliwiiye. Aahipichula imesa sa ikhorowa sa alopwanaawo nave amwaramwaxa ikhorowa sa malukweene. Aahivathaanyatho ewaxuxu ya mikoi nave aahikaramo inama soothene mu mpa ya Muluku mmo. Aahilamula wa yaawo yaatumiha ipompa ii: ‘Viihani’mo iha muumu! Muhereke empa ya Atiithaaka empa ya maroca.’
Omuchara akina a Yesu yaahirowano vamoha o empa ya Muluku eyo o Yerusalemu. Yaahitikhina ni yeeyo owo enriiye. Yaahuupuwelanto sa yeeyo Piipiliya aalonchiiye sa Mwaana a Muluku: ‘Mvai wa va empa’nyu wokilya miyo.’
Yesu aryeene weiwo o Yerusalemu va Paskha, owo aahipaka sootikiniha sincipale. Vachuli vaya, aahikhuma mu Yudeya nave aahichimula okookela o Galileya. Nyenya mphironi, aahiviria o mpopa wa Samariya. Hinkoni noone yeeyo yerenye weiwo.