MWAHA 98
Va Mwaakoni Wa Azitona
OLA va, ti Yesu Vamwaakoni wa Azitona. Alopwana axexe awo ari vamoha ni yoowo ti arummwaawe. Ti onnaaya Andreya ni Petro, navetho ti onnaaya Yaakopo ni Yohane. Vahoolo vaya vale munnawerya woona empa ya Muluku mu Yerusalemu.
Wooviravo vano mahiku meeli ovinyerya vavaa Yesu aavolonwiiye mu Yerusalemu anwenle mwaasana a puuru. Narinto nihiku na Naawiili. Wooxixelweene nihiku nenle, Yesu aari mu empa ya Muluku. Alipa a ephepa yaaheererya omphara Yesu wii emwiiphe. Nyenya yaahoova.
‘Inowa ni anamwane a inowa!’ awiichanne hiihaa Yesu atokweene a mathamalelo ale. Yesu aahiinto wii Muluku aahala waalaka ntakhara a soonanara soothene hiiho yenraaya. Vachuli vaya, Yesu aahiwela Vamwaakoni wa Azitona, nave vavo arummwa axexe awo yaamukoha. Mano moosuwela yeeyo yamukonhaaya Yesu?
Arummwaawo yaamukonhe Yesu sa ichu sa muhoolo. Yaanasuwela wii Yesu aahala omaliha onanara woothene veelaponi yavathi. Nyenya, yaachuna osuwela wii eyo yaahaala wereya liini. Mano ti liini vavaa Yesu iiriye arwetho wii alamulele?
Yesu aanasuwela wii oomucharaawe veelaponi yavathi, hiyii ewerye omoona mu okooka wawe. Ntakhara wii owo aahala okhala wirimu, nave weiwo hiyii eweryeke omoona. Va nthowa nenla, Yesu aahiloca wa arummwaawe sa ichu seiyo sahaala wereya veelaponi yavathi, voolamulela owo wirimu. Mano sikina sa ichu sene seiyo ti sivini?
Yesu aariye wii onahaala okhalavo ikhoco sincipale, awiicheliwa ancipale ni atala, nave ipahu saahaala waachereryeya, navetho waahaala okhalavo ochikinyeya otokotoko wa elapo. Yesu aahilocatho wii michaka yaphaama ya omwene wa Muluku saahaala olaleyeryiwa veelaponi yoothene yavathi. Mano nohoona ichu sene seiyo mu elukuluku ahu? Aayi! Va nthowa nenla, ninnachichimiherya wii Yesu onnalamula wirimu. Moohilekela, owo onahaala omaliha onanara woothene veelaponi yavathi.
Mateyu 21:46; 23:1-39; 24:1-14; Marko 13:3-10.