MWAHA 106
Woopoliwa Mukariposo
NKAMOONENI mungelo opharenle nsele nohuliweene na ekariposo. Achu onaakumihiiye awo ti arummwa a Yesu. Hinkoni noone nthowa nene yawaleleliwaya mukariposo.
Serenye elukuluku vakhaani vachuli va omiineliwa wa munepa wawela wa oohuserya a Yesu. Saari mwawiiha: Oxekuwa okina, Petro ni Yohane yaahirowa o empa ya Muluku mu Yerusalemu. Wiiwo, vakhiviru ni vamilakoni, wahikhala muchu mukina orakala mecho oyariwa woyariwa. Achu akina yaanamutexerya va nipuro nenlo mahiku oothene, wii avekeke ikhorowa wa yaawo yaavolowa mumpa ya Muluku eyo. Vavaa awonniiye Petro ni Yohane, ahiveka yamahala. Mano awo yenre eheni?
Yahemela emuwehexexa muchuuwo. ‘Ikhorowa nkinono,’ aahi Petro, ‘nyenya yeeyo kiriakano ela kinoovaha. Mu nsina na Yesu vinya nave echa!’ Petro aamphara ntata nawe, nave muchuuwo ahemela echa. Vavaa achu akina yoonnaaya ela, yaatikhina ni ohakalala ni yotikiniha ela.
‘Noherano yotikiniha ela ni ikuru sa Muluku, yoowo aamviihale Yesu wa alipa okhwa,’ aahi Petro. Petro ni Yohane erikimulocaru hiihaa, yaahirwa ahooleli a mathamalelo. Yaahinanariwa, nthowa nawii Petro ni Yohane yaloca sa Yesu wii aaviihiwa. Hiihaa, yahaphara yawalela mukariposo.
Omelwaaya, ahooleli a mathamalelo yaahipaka muthukumano mutokotoko. Yaahilamula oruuhiwa Petro, Yohane vamoha ni muchu openuxiwa owo. ‘Ni ikuru taani mweenranyu ela nyuwo?’ yahikoha.
Petro aahi wa yaawo wii waari ni ikuru sa Muluku, yoowo aamviihale Yesu wa alipa okhwa. Alipa a ephepa yaahihalela yawera, ntakhara wii hiyawerya okhoocha yotikiniha eyo. Yaahiwopopiha arummwaawo wii ehilocetho sa Yesu nave yaahaataphula.
Mmahiku ocharelavo, arummwaawo yaahipwahiherya olaleyerya sa Yesu ni openuxa awiicheliwa. Iha saahivuwa. Nave nari achu a epooma yoorukurerya Yerusalemu yaarwano awiicheliwa wa arummwaawo, wii epenuxiwe. Ahooleli a mathamalelo yaahinla ehache, nave yaahaaphara arummwaawo, yaavoxa mukariposo. Nyenya, awo hiyaakhanlemo mu elukuluku yincipale.
Ohiyu, mungelo a Muluku aahula vamilakoni va kariposo, ntoko munoonelanyu va. Mungelo aahi: ‘Haweni mulume mu’mpa ya Muluku wa achu.’ Woxixelwaaya, vavaa ahooleli a mathamalelo awo yalamunlaya oruuhiwa arummwaawo, awo hiyaarimomo. Vachuli vaya, yaaphwanyiwe ehusihaka mumpa ya Muluku nave yaakuxeryiwa o nikhucheni na atokweene o Sineedrio.
‘Naaholamulelani muhihusihetho sa Yesu,’ yaahi ahooleli a mathamalelo awo. ‘Nave nkoonani mosarya Yerusalemu ni ohusiha wanyu.’ Arummwaawo yaahaakhula yii: ‘Ninnaphwanela omwiwelela Muluku ntoko oolamulela wopwaha achu.’ Nave yaapwahiherya ohusiha “michaka yaphaama.” Mano tahi yotakiherya yaphaama wa hiyo?
Saweriwa Tarummwa ikapitulu 3 ophiyerya 5.