MWAHA 111
Mmiravo Yoowo Aakonne
NKOONANI achu! Mano nloce wii mmiravoowo okonne vathi va ootepa ophoreya? Nkavareryani, mmoha a alopwanaawo yoowo onakhuma mpa mmo ti Paulo! Mano munnamoonatho Timoteo? Nloce wii mmiravoowo uuwale vaxanelani?
Aayi, ela ti yeeyo yeerenyee. Paulo aari alocaka mwaha wa oohuserya o Trowa. Aanasuwela wii hahaala owoonatho mu elukuluku yoorekama, ntakhara wii omeelo aya aaya onwela pophoro. Va nthowa nla, aakhala alocakaru ophiyerya ohiyu eriyari.
Ahe, mmiravo ola awiichaniwa Utiko aakilanthe vaxanelani nave aakonelavo. Uuwela oculi, vaate vaxanela eyo, va empa ya vasulu yaneeraru oya vathi, ophiyerya vachayani! Ti nthowa nene achwaala va aryaaya ntoko oohaleeliheya. Ntoko yoovelelaaya, mmiravoowo ohookhwa!
Paulo vawoona wii mmiravoowo ohookhwa, aahimuuramela nave ahimupaara. Vachuli vaya aahi: ‘Muhukhuwe. Okumi awe wokhalaru!’ Nave waari okhanlene chiri! Yaari yotikiniha! Paulo aahimukookiherya wukumini! Muloko wa achu owo waahisareya ni ohakalala.
Vanonto oothene yaawela oya olya. Paulo aahipwahiherya oloca ophiyerya oyaka nuuxa. Nyenya, chichimiheryani wii Utiko haakonnetho! Ovinyerya vavaa, Paulo, Timoteo ni yaawo yaaryaayano vamoha vamukwahani yaahinwela pophoro. Mano moosuwela wiiwo yakelaayawo?
Paulo aahimaliha mukwahaawe waneeraru wa olaleyerya nave aari akookelaka owannyawe. Mmukwaha ola, aakhanle iyaakha raru pahi o Efeso. Waari mukwaha woorekama vancipale opwaha wanaawiili.
Echimunleene o Trowa, pophoro aahemela o Mileto. Oonneene wii aari vakhiviru ni Efeso, Paulo aahirumiha wiichaniwa atokweene a muloko yoole wii erwe va Mileto, wii aloceno mu ekwaha yokuchulela. Vachuli vaya, vavaa yaaphinyaya elukuluku yonwela pophoro, yaari oothanana vancipale omoona Paulo achimulaka!
Vookucula vaya, pophoro aahiphiya o Kaisareya. Ompa wa oohuserya Filipo wiiwo Paulo aaryiiyewo, mulipa a miririmu Agabo aahimulopola Paulo. Aariye wii Paulo onahaala ophariwa aphiya o Yerusalemu. Nave saahereya hiihaa. Ovinyerya vavaa, vachuli va okhala iyaakha piili mukariposo o Kaisareya, Paulo aahirumihiwa o Roma, wii athorihiwe ti Kaisara. Hinkoni noone yeeyo yeerenyee mmukwaha wa o Roma.
Saweriwa Tarummwa ikapitulu 19 ophiyerya 26.