Mano Anamona a Yehova Anroromela Esheni?

“Nyenya ninnakhwela wiwa on’léle onupuwelela sheni; vawi sa omwaryeya wu, ninnasuwela wi ennahelela vothe vene’vo.” (Saweriwa Tarummwa 28:22) Ahooleli amothukumanela yaawo o Roma a iyaakha sa nsana noopacerya yahiveleela yotakiherya yaphaama. Awo yaahichuna wiiwa oorwela va mathipelo, ohiyana wiiwa oorwela wa achu amalapo ovaanya.

Moolikana, olelo vava wiiliwiili Anamona a Yehova annalochiwa moonanara, nave waahaala okhala ocheka owehererya osuwela eeparipari yooloca sa awo oorwela vamathipelo okhala ni nthalu. Mwawihiihaa, nookhala ohakalala wothoriheryani sikina sa sororomela sahu sitokotoko.

Piipiliya, Yesu Kristu ni Muluku

Ninnaroromela wii “Sorempwa sothene sávereliwe ti Muluku, nave sinnaphwanyerya etchu.” (2 Timoteo 3:16) Nave nari ori wawii akina analoca wii hiyaano hinri aKristu, hiiha hiiri seeparipari nivakhaaniru. Ninneemererya momalela onamoona wa murummwa Petro woloca sa Yesu Kristu: “Hinavovo nsina nikina vathi verimu ya wirimu, novahiwa wa atchu, nenlo n’naphwanelahu ovulushiwano.”—Saweriwa Tarummwa 4:12.

Nyenyanto, vawoona wii Yesu aaloca wii owo tuwo “Mwana a Muluku” nave niwii ‘Atithi ákiruma Miyo,’ Anamona a Yehova anaroromela wii Muluku ori mutokotoko ompwaha Yesu. (Yohane 10:36; 6:57) Yesu owo mwaneene ahisuwela: “Atithi ari m[u]tokotoko ókipwaha Miyo.” (Yohane 14:28; 8:28) Mwawihiihaa, hiyo hinnaroromela wii Yesu ori oolikana ni Atiithi, ntoko mummo mahusiheryo a makhalelo a Araru mwa Mmoha anahusiheryaya. Ohiyavo eyo, ninnaroromela wii owo arimpachushiwa ni Muluku ni wii ori vathi va olamulelo Awe.—Akolose 1:15; 1 Akorinto 11:3.

Mu elocelo yeLomwe, nsina na Muluku tinlo Yehova. Piipiliya onii: ‘Ti nyenyuru pahi, nsina nanyu mwa YEHOVA, nave mwa awirimurimu veelaponi yoothene ya vathi.’ (Masaalimu 83:18, Almeida, edição revista e corrigida) Mopharihana ni yolokohene yeeyo, Yesu ahichichimiherya vancipale nsina na Muluku, ahusihaka omucharawe ovekela: “Atithihu a Wirimu, Nsina nanyu nélihiwe.” Nave owo mwaneene ahivekela wa Muluku: “Kihoniherya nsina nanyu wa atchu yawo mukivahilanyu Miyo.”—Mateyu 6:9; Yohane 17:6.

Anamona a Yehova anaroromela wii annaphwanela omutakiherya Yesu mwa ovuwiha nsina ni sokhwela sa Muluku. Mwawihiihaa, nohemererya nsina nawii Anamona a Yehova nthowa nawii ninnamutakiherya Yesu, “namona óroromeleya.” (Yawupulula 1:5; 3:14) Mophwanelela, Yesaya 43:10 onii wa achu amweemelenle Muluku: ‘“Nyuwo tinyuwo anamonaaka,” onii Yehova, “ayi, murummwaaka yoowo kimuthanlilaka.”’

Omwene wa Muluku

Yesu ohahusiha omucharawe ovekela, “Omwene anyu orwe,” nave owo ahipaka Omweneene yoowo okhala muru mutokotoko wa mwaha wa ohusiha wawe. (Mateyu 6:10; Luka 4:43) Anamona a Yehova anaroromela wii Omwene tuwo epomenesha yokuhiwa wirimu, yeeyo enahaala olamulelaka veelaponi yavathi, niwii Yesu Kristu tuwo Mwene ohoneya okuhiwa. ‘Olamulelo ori mmakhatani mwawe,’ onii hiihaa Piipiliya. ‘Winnuwa wa olamulelo ola ni sa murechele hiirwa ikhala ni makuchuwelo.’—Yesaya 9:6, 7, Al.

Nyenyanto, Yesu Kristu harwa akhala mwene meekheiye a epooma ya Muluku. Owo onahaala okhala ni olamulela akhwaawe ancipale wirimu. “Navilela,” aahirepa murummwa Paulo, “n’narwa-nlamulatho vamoha.” (2 Timoteo 2:12) Piipiliya onathonyerya wii walikhanyerya wa achu yaawo anaviihiwa wa alipa okhwa wii yalamulele ni Kristu wirimu ori woophiyerya “amile nsana nimoha, makhumi masheshe owapula asheshe, yawo yópoliwe wilaponi.”—Yawupulula 14:1, 3.

Chiryene, epooma eri yoothene ennaphwanela okhala ni anamurala, nave Anamona a Yehova anaroromela wii wachererya va olamulela awirimu, machikwi mancipale a achu akina anahaala wakhela okumi woohimala. Vookuchulela vaya, elapo yavathi, etatushiwene okhala paradaiso oreera, enahaala osareiwa ni anamurala oophwanelela a Omwene wa Muluku, oothene eri awiwelela mu olamulelo wa Kristu ni wa olamulela akhwaawe. Mwawihiihaa, Anamona a Yehova ari ochichimiherya vancipale wii elapo yavathi herwa enanarihiwa okhala-wookhala, niwii nlakano na Piipiliya nnahaala wakhwaniheriwa: “Muluku onarwa aavaha eekhaikhai elapo ya vathi, yiikhalelaru mummo okhala wookhala.”—Masalmo 37:29; 104:5.

Nyenya mano, Omwene wa Muluku onahaala orwa mwawiihai? Mwa wiiwelela wookhwela aneene wa achu oothene mu epooma ya Muluku? Mohiyana ni yeeyo, Piipiliya mochichimiherya onathonyerya wii orwa wa Omwene onahaala ochuneleya ovolowela moluluwanya wa Muluku mu sawereya sa veelaponi yavathi: ‘Muluku awirimu onarwa atikitherya omwene yoowo onii ohinanarihiwetho okhala wookhala. Nave olamulelo awe . . . onahaala onyanya ni omaliha mamwene aya oothene, onarwa okhala wawiikhalelaru okhala wookhala.’—Daniyeli 2:44.

Mano Omwene wa Muluku onahaala orwa liini? Va mathipelo a soloherya sa Piipiliya hiiho inakhwaniheriwa, Anamona a Yehova anaroromela wii onahaala orwa mwawakuveya. Ninnawiichanelani ovarerya sikina sa soloherya hiiho inathoriha sawoneya sa “m’mahiku ókutchula” amathoriheryo ala aichu oonanara. Sirempwe va Mateyu 24:3-14; Luka 21:7-13, 25-31; ni 2 Timoteo 3:1-5.

Vawoona wii ‘ninnamusivela Apwiya Mulukuahu, ni murimahu woothene, ni okumiahu woothene, ni mirukuahu yoothene, ni ikuru sahu soothene, ni mukhwihu ntoko nnirahu wisivela anene,’ hinri ookawanyeya mwa nloko, mwa nihimo nari mwa makhalelo a achu. (Marko 12:30, 31) Nri osuweliwa vancipale nthowa na osivela yoowo onathonyeriwa veeri va annihu eKristu, yaawo anaphwanyeya mmaloko oothene. (Yohane 13:35; 1 Yohane 3:10-12) Mwawihiihaa, ninnakhapelela mukhalelo womaaleleya ntakhara a saweereya sa ipoliitika sa maloko yaawo. Ninnererya okhala oophwanaphwana ni oohuserya opacerya a Yesu, sa yaawo owo alonciiye wii: “Hari a elapo ya vathi ntoko Miyo nkiri a elapo ya vathi.” (Yohane 17:16) Ninnaroromela wii wikhapelela nri ohiyana ni elapo ontaphulela osepa mukhalelo wohiphwanelela yoowo ohikhweiye wuulana vancipale olelo vava, ophitanyeryavo wotha, wiiya, ochapaheya, mararuwo, okonihana wa achu oolikana imwaamushini, opharihela muteko moochekeya wa ephome, olapela sophwaniherya ni ichu sikina sawihiihaa, sovanyiwa m’Piipiliyani.—1 Akorinto 6:9-11; Aefeso 5:3-5; Saweriwa Tarummwa 15:28, 29.

Yowehererya Ntakhara Muhoolo

Anamona a Yehova anaroromela wii okumi ahu yoola mwiilapo ela kaahi yolaru yoowo orivovo. Ninnaroromela wii Yehova omurumiha Kristu veelaponi yavathi oyeeha nikhami nawe nokumi ntoko yawoopola, mwawihiihaa wii achu ewerye ophwanya mukhalelo wekhaikhai ni Muluku ni waakhela okumi woohimala m’mathoriheryo ahihano a ichu. Ntoko alochenliiye murummwa mukina a Yesu: “Nave vano neriwahu ékhaikhai n’nikhami nawe.” (Aroma 5:9; Mateyu 20:28) Anamona a Yehova annisoona ohakalalasha wa Muluku ni wa Mwanawe nthowa na yookawela eyo ya yawoopola yeeyo enapakiha okumi wa muhoolo okhala woweryeya.

Anamona a Yehova akhala ni ororomela wawakhwana wa okumi wamuholo, worweela va ovinya wa achu okhwa, vathi va Omwene wa Muluku. Ninnaroromela, ntoko mummo Piipiliya onahusihiiye, wii vavaa muchu onakhwiiye, okhala wawevo onnamala, nave “nihiku nene nenlo miteko sawe uupuweleleiye sinnamala.” (Masalmo 146:3, 4; Ezekiyeli 18:4; Eklesiasti 9:5) Ayi, okumi wa muhoolo wa achu okhwa inaroromeleya wa Muluku owupuwelela wawe mu oviihiwa.—Yohane 5:28, 29.

Nyenyanto, Anamona a Yehova ari ochichimiherya wii ancipale yaawo hihano ari ni okumi anahaala ovuluwa vavaa Omwene wa Muluku onatoloshaya ipooma soothene irivovo nave ntoko hiihaa Noowa ni echoko awe yavulunwaya va Maahi, awo anahaala opwahiherya okhala akumi wii ehakalale ni okumi wawiikhalelaru mu elapo yavathi yaweelihiwa. (Mateyu 24:36-39; 2 Petro 3:5-7, 13) Nyenya ninnaroromela wii ovuluwa onaroromeleya wa muchu wakhwaniherya sokhwela sa Yehova, ntoko Piipiliya olochenliiye wii: “Elapo ya vathi ennavira . . . , nyenya yowo onerano okhwela wa Muluku onnikhalelaru okhala wokhala.”—1 Yohane 2:17; Masalmo 37:11; Yawupulula 7:9, 13-15; 21:1-5.

Tiwawoneya wii honaweryeya wii nloce vava sororomela soothene sa Anamona a Yehova, nyenya ninnoovekaani wii mphwanye sosuweliha sawachereryeya.

[Yooleeliherya va epaaxina 4]

Nookusha nsina nawii Anamona a Yehova nthowa nawii ninnamutakiherya Yesu