Yohuserya 5

Yokhwela Ya Muluku Tisheni Ni Elapo Ya Vathi?

Ntakharaheni Yehova apatunshiye elapo? (1, 2)

Ntakharaheni elapo ehiryaya paradaiso? (3)

Alipa onanara tiheni enahala owera? (4)

Muholo, eheni Yesu onahaliye wera ni alipa awicheliwa, ni awuluvala ni alipa okhwa? (5, 6)

Mumphwanela wera eheni nyuwano wii mwapuhe ni mareliho amuholo? (7)

1. Yehova ahipatusha elapo ela wii atchu ewerye opuha ni okumi mummo okhala wokhala. Atchuna wi elapo ela ekhaliwekeru ni atchu ekhaikhai ni ohakalala. (Masalmo 115:16; Yesaya 45:18) Elapo herwa epahuliwa; enahala okhala okhalawokhala.—Masalmo 104:5; Eklesiasti 1:4.

2. Muluku ahakumve ompatusha mutchu, Owo ahithanla makupa mamoha a elapo atatusha okhala paradaiso aphama. Atchuwa okhala emacha ya ithutu yo-Edeni. Timummo amukunheiyemo mulopwana opacherya ni muthiyana opacherya, Adamu ni Hava. Yotchuna ya Muluku yari yawii ekhale ni anamwane nave esareye elapo yothene. Movira wa elukuluku, awo yahala otatusha elapo yothene okhala paradaiso.—Genesis 1:28; 2:8, 15.

3. Adamu ni Hava yahitcheka nthowa nohiwelela mwayini nlamulo na Muluku. Mwawihiha, Yehova ahiwikara mmachani ya ithutu yo-Edeni. Yamuyelela paradaiso. (Genesis 3:1-6, 23) N’nya Yehova hachuwanle yokhwelawe ni elapo ela yavathi. Olaiherya okokiherya okhala paradaiso mummo atchu anahalaya okhalakamo okhalawokhala. Onahala wera mwawihai yeyo?—Masalmo 37:29.

4. Ehakumve elapo okhala paradaiso, onaphwanela wamaliha alipa onanara. (Masalmo 37:38) Ela enahala wereya mu Harmagedo, ekhocho ya Muluku eni emalihe sonanara. Votcharela, Satana onahala omakiwa mu iyakha 1.000. Ela entaphulela wii hahalaru onanara ori othene wii ananariheke elapo. Mekhayaru atchu a Muluku tanahala ovuluwa.—Yawupulula 16:14, 16; 20:1-3.

5. Vanonto Yesu Kristu onahala olamulela elapo ntoko Mwene mu iyakha 1.000. (Yawupulula 20:6) Movira wa elukuluku, onahala omaliha yotcheka ya mawupuwelelo ahu ni ya mwiliahu. Hiyanonto nnahala okokela okhala atchu aphama, ntoko mummo akhanliye Adamu ni Hava ehakumve otcheka. Vanonto hevarwa vakhalavo erecha, wuluvala ni okhwa. Alipa awicheliwa anahala openushiwa ni awuluvala anahala okokela okhala anamiravo.—Yobu 33:25; Yesaya 33:24; Yawupulula 21:3, 4.

6. Mpuwa mwa Omwene wa miyakha Masanaru Khumi wa Yesu, atchu ororomeleya anahala ophara muteko wii etatushe elapo yothene okhala paradaiso. (Luka 23:43, NM) Navetho masana manchene atchu anahala ovihiwa wii ekhale ni okumi womutchu velaponi yavathi. (Saweriwa Tarummwa 24:15) Yerano yokhwela ya Muluku anahala wikhalelaru okhalawokhala velaponi yavathi. Wohikhala hiha eni yeremutoloshiwa okhalawokhala.—Yohane 5:28, 29; Yawupulula 20:11-15.

7. Hiha enahala wereya yokhwela yopacherya ya Muluku ni elapo ela. Munnatchuna marelihoene yala amuholo? Vanthowa nenla, nyuwano munaphwanela opwahiherya ohuserya etchu volocha sa Yehova ni wiwelela sokhwela sawe. Ohochela ophiya mmithukumanoni mu Empa ya Omwene sa Anamona a Yehova m’makupa owannyu enahala wokhaviheryani werano yeyo.—Yesaya 11:9; Ahebri 10:24, 25.

[Eruku va epaaxina 10]

Paradaiso orimela

[Iruku va epaaxina 10]

Anvire Harmagedo, elapo enahala otatushiwa okhala paradaiso