Yohuserya 3

Ori Wotchuneya Ohuserya Volocha Sa Muluku

Wii mukhale nthamwene a Muluku, nyuwo munnaphwanela ohuserya volocha sa yowo. Mano asiinthamwenaanyu annasuwela nsina nanyu nave annapharihela muteko? Tiweparipari wii ayi. Muluku onatchuna wii nyuwotho musuwele nsina nawe ni opharihela muteko. Nsina na Muluku ti Yehova. (Salmo 83:18; Mateyu 6:9) Nyuwotho munnaphwanela ohuserya yeyo enamuhakalaliha owo ni yeyo ehinamuhakalaliha. Munnaphwanela waasuwela taani ari asiinthamwene awe nave taani ari amwiichani awe. Onnaviravo elukuluku wii omusuwele mutchu mukina. Biblia onlocha wii ori wa miruku okhapelela elukuluku wii mutchu ahuserye volocha sa Yehova.—aEfeso 5:15, 16.

Asiinthamwene a Muluku annerano yeyo enamuhakalaliha owo. Nkupuwelani sa asiinthamwenaanyu shashasha. Wakhala wii nyuwo munnawerela soonanara ni wera itchu hiiho aniichanayano, mano munupuwela wii anahaala opwahiherya okhala asiinthamwenaanyu? Tiweparipari wii hoye! Ori vamohamoha, nyuwo mwaatchunaka wii Muluku akhale nthamwene anyu, munnaphwanela weraka yeyo enamuhakalaliha owo.—Yohane 4:24.

Tahi ikeresha sothene wii sinnahula ephiro wii ekhaleno onthamwene ni Muluku. Yesu, yowo ori nthamwene awachamanasha ni Muluku, oolocha sa iphiro pili. Emoha ya yeyo eri yokothoola nave eri yosareya ni atchu. Eyo enaakusherya wutoloshiwani. Ephiro ekina eri yonimuwa ti atchu avakhani yawo anavira mu eyo. Ephiro yeyo enaakusherya wukumini wohimala. Eyo entaphulela wii, mwaatchunaka okhala ni onthamwene ni Muluku, munnaphwanela ohuserya makhalelo aphama a omuthamalela.—Mateyu 7:13, 14.