MWAHA 15

Malapelo Aneemereryiwa ti Muluku

Malapelo oothene annamuhakalaliha Muluku?

Hiyaano nnii nsuwele hai malapelo eeparipari?

Taani olelo ari alapeli eeparipari a Muluku veelaponi yavathi?

1. Nnahaala opuha eheeni wakhala wi ninnamulapela Muluku mu ephiro yaphaama?

YEHOVA MULUKU onnanthokororya vancipale nave onachuna wi nipuhe moorweela wa ohoolela wawe woosivela. Wakhala wi ninnamulapela owo mu ephiro yaphaama, nnahaala okhala oohakalala nave nnahaala osepa makacamiho mancipale mu okumi. Hiyo tho nnahaala okhalano mareeliho awe ni nikhaviheryo nawe. (Isaiya 48:17) Nyenyanto, sookhalavo ikerexa masana masaneene seiyo sinaloca wi sinnahusiha eparipari vooloca sa Muluku. Naamwi hiiha, soohusiha saya ti soohiyana vooloca sa Muluku taani nave owo onachuna eheeni wa hiyaano.

2. Nnii niwerye hai ohuserya ephiro yaphaama ya omulapela Yehova, nave niphwanaphwaniho taani nnanikhavirya wiiwexexa ela?

² Munii musuwele hai ephiro yaphaama ya omulapela Yehova? Hamunaphwanela ohuserya ni olikanyiha soohusiha sa ikerexa soothene. Munaphwanela ohuserya pahi yeeyo Piipiliya onahusiheiye chiryene vooloca sa malapelo eeparipari. Wi niphwanaphwanihe: Mu ilapo sincipale, wookhalawo makacamiho a opaka ikhorowa satheru. Wakhala wi nyuwo moovahiwa muteko wa osuwela ikhorowa satheru, tiheeni mwaahaalaanyu weera? Mano mwahaala ohela mmuruni mukhalelo ori woothene wa ikhorowa satheru? Hooye. Yoopacerya, waahaala okhala wa miruku osuwela ikhorowa seeparipari. Mmanle osuwela mukhalelo sinakhalaaya ikhorowa seeparipari, mwahaala owerya osuwela ikhorowa satheru. Moolikana, nasuwela malapelo eeparipari, nnanwerya osuwela ikerexa seiyo siri soowoka.

3. Mwawiiwanana ni Yesu, nnaphwanela weera eheeni wakhala wi nnachuna weemereryiwa ni Muluku?

³ Ti woochuneya omulapela Yehova mu ephiro yeeyo eneemereryiwa ni yoowo. Achu ancipale anaroromela wi ikerexa soothene sinnamuhakalaliha Muluku, nyenya tahi yeeyo Piipiliya onahusiheiye. Honaakhwana oloca wi miyo ka Mukiristu pahiru. Yesu ooloca: “Oni avolowe momweneni wa wirimu tahi ole oni: ‘Pwiya, Pwiya’, nto ole onatxhariha okhwela wa Atithi aka ari wirimu.” Mwawiihiiha, wi neemereryiwe ti Muluku, nnaphwanela ohuserya yeeyo Muluku onachuneiye wa hiyaano ni weerano eyo. Yesu aawiichana achu yaale ahineera yookhwela ya Muluku ariki “munera sotakhala.” (Mateu 7:21-23) Hiihaa ntoko ikhorowa satheru, malapelo atheru haanono esisapo yeeparipari. Mwawaaceererya, malapelo awo tootakhala vancipale.

4. Masu a Yesu vooloca sa iphiro piili anataphulela eheeni, nave iphiro iho inahoolela woowi?

⁴ Yehova onnamvaha muchu veelaponi yavathi ekari ya ophura okumi woohimala. Vanonto, wi nikhaleno okumi woohimala mu Parataiso, nnaphwanela omulapela Muluku mwaphaama ni okhalaka hiihaano mu ephiro eneemereryiwa ni yoowo. Yoothananiha ti yawi, achu ancipale annakhooca weerano hiiha. Ti nthowa nene Yesu aalonceiye wii: “Nvoloweke mulako mukhani, wona wi mulako ni mphiro sawunnuwa sinnamukeriha mutxhu worimelani. Nave awatxa yale anakusa etila yeyo. Nto mulako ni mphiro inamukeriha mutxu w’ekumi, oyeva. nave ari vakhani yale anakusa mphiro yowo.” (Mateu 7:13, 14) Malapelo eeparipari anahoolela wuukumini woohimala. Malapelo atheru anahoolela wutolowani. Yehova hanachuna wi muchu ori oothene atoloxiwe, nave ti nthowa nene owo onaavaheiye achu mmapuro oothene ekari wi ehuserye vooloca sa yoowo. (2 Pedro 3:9) Chiryene, ephiro ahu ya omulapela Muluku enanwerya otaphulela okumi naari okhwa ntakhara hiyaano.

NNII NSUWELE MWAWIIHAI MALAPELO EEPARIPARI

5. Nnii naasuwele mwawiihai achu yaale aneerano malapelo eeparipari?

⁵ Nnii niphwanye hai “mphiro inamukeriha mutxu w’ekumi”? Yesu aaloca wi malapelo eeparipari anahaala wooneya mu ikumi sa achu yaawo aneerano. Owo aaloca: “Munamwasuwela ni sawima saya.” “Miri sothene saphama inima saphama.” (Mateu 7:16, 17) Mmasu makina, achu yaale aneerano malapelo eeparipari anahaala oosuweliwa moorweela wa soororomela saya ni meecelo aya. Naamwi eri achu oohiphaameya nave oocheka, alapeli eeparipari ntoko nikhuuru annaavyaavya weera yookhwela ya Muluku. Hankooni nthokororye makhalelo mathanu nammoha yaawo anaasuwanyeiha achu yaale aneerano malapelo eeparipari.

6, 7. Alapeli a Muluku anamoona hai Piipiliya, nave Yesu ovanhe mwawiihai yootakiherya vooloca sa yeela?

⁶ Alapeli a Muluku anathipela soohusiha saya Mpiipiliyani. Piipiliya mukhateiye onii: “Sorempwa sothene supuwelelihiwe ti Muluku, nave muteko aya ori ohusiha, ovanya sawotha, otxharusa ni ohusiha n’wokololowani wi mutxhu a Muluku akhale awakhwanelela ni awireherya wera saphama sothene.” (2 Timóteo 3:16, 17) Paulo aarepa wa asinthamwene awe Eekiristu: “Mwakhelaka wa hiyo nsu na Muluku, himwakhenle ntoko nsu na atxhu, nto ntoko nsu na eparipari na Muluku.” (1 Tesalónika 2:13) Mwawiihiiha, soororomela ni saweera sa malapelo eeparipari hasinathipeliwa mmuupuwelo wa achu naari mu mihapo. Iho sinathipeliwa Mmasu ooveereliwa a Muluku, Piipiliya.

⁷ Yesu Kiristu oovaha yootakiherya yaphaama moorweela wa othipela soohusiha sawe Mmasu a Muluku. Mu nivekelo wa Atiithi awe a wirimu, owo aaloca: “Nsu nà nri eparipari.” (Yohani 17:17) Yesu aanaroromela Masu a Muluku, nave soothene aahusiheiye saaniiwanana ni soorempwa. Ikwaha sincipale Yesu aaloca: “Sorempwa.” (Mateyu 4:4, 7, 10) Voocharela vaya Yesu aanaloca yoorepa. Moolikana, olelo achu a Muluku hanahusiha miruku saya. Awo annaroromela wi Piipiliya ti Masu a Muluku, nave moolipa awo anathipela soohusiha saya chiri mwa yeeyo Piipiliya onaloceiye.

8. Omulapela Yehova onaphitaanyerya eheeni?

⁸ Achu yaale aneerano malapelo eeparipari anamulapela Yehova pahiru nave annasuweliha nsina nawe. Yesu aaloca: “Owepeseke Apwiya Muluku-à, nave yoworu onerawe onamukokhorela.” (Mateu 4:10) Mwawiihiiha, arummwa a Muluku anamurumeela Yehova pahiru. Olapela iwo onaphitaanyerya waaleela achu wi esuwele nsina na Muluku eeparipari nave owo taani. Salmo 83:18, NN oriye: “Wi esuwele wi Nyenyuru, nsina nanyu mwa Yehova, mwa Awirimurimu velaponi yothene ya vathi.” Yesu oovaha yootakiherya mu wakhaviherya achu akina wi emusuwele Muluku, ntoko owo aalonceiye mu nivekelo: “Kìhasuweliha nsina nà atxhu okivan’hawe mwelaponi. Yari awà ni wàkivaha, nave yawo àkhapelela nsu nà.” (Yohani 17:6) Moolikana, olelo alapeli eeparipari annaahusiha achu akina vooloca sa nsina na Muluku, sookhwela sawe, ni makhalelo awe.

9, 10. AKiristu eeparipari anooniherya mmakhalelo taani osivela wa mukina ni mukhwaawe?

⁹ Achu a Muluku annooniherya osivela weeparipari wa mukina ni mukhwaawe. Yesu ooloca: “Mwa yeyo atxhu othene anamusuwela wi muri amuhuserya aka, nyuwo mwakhwelanà mukina ni mukhweiye.” (Yohani 13:35) Akiristu oopacerya yaakhalano osivela iwo wa mukina ni mukhwaawe. Osivela Woomuluku onnamaliha nthalu vooloca sa ohiyana wa mahimo, makhalelo, maloko, nave onnaweeriha achu okhala awiiwanana mu onna weeparipari wa elapo yoothene. (Mwaalakhanye Kolosi 3:14.) Achu a malapelo atheru haanono onna yoowo wa elapo yoothene. Mano nnasuwela hai? Awo anniiphana mukina ni mukhwaawe nthowa noohiyana nloko naari nihimo. AKiristu eeparipari hanaakuxa akapwichi wi ewiiphe anna aya Eekiristu naari achu akina. Piipiliya oriye: “Mwa yela t’anoneyaya anamwane a Muluku ni anamwane a musaserya: othene yole ohinerya yawokololowa ni ohinamukhwela munnawe hanarwa wa Muluku. . . . Nikhwelaneke mukina ni mukhwawe; ohiri ntoko Kaím arule wa mutakhali amwipha munnawe.”—1 Yohani 3:10-12; 4:20, 21.

¹⁰ Chiryene, osivela weeparipari honataphulela pahiru ohiwiipha achu akina. Ni murima woothene akiristu eeparipari annapharihela muteko elukuluku aya, ikuru saya, ni muhakhu aya wi ekhaviherye ni olipihana mukina ni mukhwaawe. (Ahebri 10:24, 25) Awo annakhaviheryana mukina ni mukhwaawe mu ilukuluku sa makacamiho, nave annaathokororya achu akina ni ekhaikhai. Mwevelevelo, awo annapharihela muteko mu ikumi saya ekano ya Piipiliya yawi “onnaphwanela okawana sorèra sawe sothene.”—Galasya 6:10.

11. Ntakhara heeni ti yoochuneya omweemererya Yesu Kiristu ntoko yooworu Muluku onamphariheleiye muteko wi anivuluxe?

¹¹ AKiristu eeparipari annamweemererya Yesu Kiristu ntoko ephiro ya Muluku wi anivuluxe. Piipiliya onnaloca: “Hiwavo ovuluwa mwa mutxhu mukina, wona wi vathiva hinavo nsina nikina nivahiwe atxhu wi hiyo nivuluwele.” (Saweriwa T’arummwa 4:12) Hiiha ntoko nonnaahu Mmwaha 5, Yesu oovaha okumi awe ntoko woopola ntakhara achu awiiwelela. (Mateu 20:28) Mwawaaceererya, Yesu Mwene oothanliwa ni Muluku mu Omwene wa wirimu yoowo anahaala olamulela elapo yoothene yavathi. Nave Muluku onachuna wi nimwiiweleleke Yesu ni opharihela muteko soohusiha sawe wakhala wi ninnachuna okumi woohimala. Ti nthowa nene Piipiliya onaloceiye wii: “Ole onamwemererya Mwana, òkhalano ekumi yohimala. Nto yowo onakhotxa omwiwelela Mwana harwa ona ekumi, nave esara ya Muluku enamukhala mwa yowo.”—Yohani 3:36.

12. Ohipaka makupa a elapo onataphulela eheeni?

¹² Alapeli eeparipari hanapaka Makupa a elapo. Vaavaa aathorihiweiye ni Pilato, mulamuleli a o Roma, Yesu aaloca: “Omwene aka tahi wa elapo yela.” (Yohani 18:36) Moohipwacha elapo enakhalaaya, oomuchara eeparipari a Yesu anamurala a Omwene awe wa wirimu, nave annapwahiherya ohipaka makupa mu miyaha sa elapo ela. Awo hanavolowela owana wa elapo. Mwawiihiiha, arummwa a Yehova hanavolowela soothanla sa achu akina vooloca sa opaka makupa a elapo, ochuna othanliwa ntoko muhooleli, naari omuthanla muhooleli a elapo. Naamwi arummwa eeparipari a Muluku hanapaka makupa mmiyaha sa elapo, awo anniiwelela malamulo a elapo anakhalaaya. Ntakhara heeni? Nthowa nawi Masu a Muluku annaaceenyerya wi ‘ewiwelele asitokwene a elapo’ analamulela. (Aroma 13:1) Wakhala wi alipa oolamulela a elapo anaveka echu ehiniiwanana ni nlamulo na Muluku, alapeli eeparipari anachara yootakiherya ya arummwa, yaawo yaalonce: “Ennakhweleyasa omwiwelela Muluku wapwaha atxhu.”—Saweriwa T’arummwa 5:29; Marko 12:17.

13. Oomuchara eeparipari a Yesu anoona hai Omwene wa Muluku, nave mwawiihiiha, tiheeni awo aneeraaya?

¹³ Oomuchara eeparipari a Yesu annalaleerya wi Omwene wa Muluku ti ewehereryo emoharu wa nloko naachu. Yesu aaloca: “Mutxhaka ola wa omwene onamulaleyiwa mwelaponi yothene wi ovahe onamona maloko othene. Vanonto t’oneraya orwe okutxhula w’elapo.” (Mateu 24:14) Ohiya waalipiha achu ororomela wi alipa oolamulela elapo anammaliha makacamiho aya, oomuchara eeparipari a Yesu Kiristu annalaleerya Omwene wa Muluku wa wirimu ntoko ewehereryo emoharu wa nloko na achu. (Salumu 146:3) Yesu oonihusiha ovekela ntakhara epooma eyo yoophaameya vaavaa owo aalonceiye: “Omwene anyu orwe. Okhwela wanyu wereye, ntoko wirimu hiha vathiva.” (Mateu 6:10) Masu a Muluku yaaloca wi Omwene ola wa wirimu “onammaliha omwene okina nave onamukhala mahiku othene.”—Daniyeli 2:44; Wupulula 16:14; 19:19-21.

14. Nikhuuru taani na malapelo munaroromelaanyu wi ninnakhwaaniherya malamulo a malapelo eeparipari?

¹⁴ Mwawiiwanana ni yeeyo nthokoronryaahu, mwiikohe: ‘Nikhuuru taani na malapelo nnathipela soohusiha saya Mpiipiliyani nave nneeriha nsina na Yehova osuweliwa? Nikhuuru taani na malapelo nnooniherya osivela Woomuluku, nnooniherya nroromelo wa Yesu, nihinapaka makupa a elapo, nave nnalaleerya wi Omwene wa Muluku ti ewehereryo emoharu yeeparipari wa nloko na achu? Mu makhuuru a ikerexa soothene veelaponi yavathi, nikhuuru taani nnakhwaaniherya malamulo oothene ala?’ Saweereya sinnooniherya mwawooneyaxa wi nikhuuru na malapelo nlo ti Anamoona a Yehova.—Mwaalakhanye Isaiya 43:10-12.

TIHEENI MUNAHAALAANYU WEERA?

15. Ohiya ororomela pahiru wi Muluku ookhala, tiheeni owo onachuneiye?

¹⁵ Wi nimuhakalalihe Muluku, honaakhwana omuroromela owo pahiru. Mweeparipari, Piipiliya onnaloca wi masololo annaroromela tho wi Muluku ookhala. (Tiyako 2:19) Nyenya, awo haneera yookhwela ya Muluku nave haanono weemereryiwa wawe. Wi nikhale aweemereryiwa ti Muluku, hannaphwanela ororomela okhalavo wawe pahiru, nyenya nnaphwanela weera yookhwela awe. Hiyaano tho nnaphwanela okhuma mu malapelo atheru nave nchare malapelo eeparipari.

16. Tiheeni nnaphwanelaahu weera vooloca sa opaka makupa a malapelo atheru?

¹⁶ Murummwa Paulo aahooniherya wi hannaphwanela opaka makupa a malapelo atheru. Owo oorepa: “Vinyannvo veri vaya ni mmwalane ni yawo. Alontxe ti Apwiya, muhitannye itxhu sa mwìkho, nave miyo kinan’wakhelani.” (2 Korinto 6:17; Isaiya 52:11) Mwawiihiiha Akiristu eeparipari annasepa echu eri yoothene eniiwanana ni malapelo atheru.

17, 18. “Babilóniya mutokotoko” tiheeni, nave ntakhara heeni ti wawaakuveya ‘ovinyemo’?

¹⁷ Piipiliya onnooniherya wi makhalelo mancipale a malapelo atheru ti makupa a “Babilóniya mutokotoko.”a (Wupulula 17:5) Nsina nlo ninnanuupuxerya muceche wa khalai wa Paapulu, weiwo opacenryewo malapelo atheru evinre Maahi Mancipale mmahiku a Noowa. Soohusiha ni saweera sincipale iri sawunlaana olelo mmalapelo atheru ipacenrye khalai o Paapulu. Ntoko yawooniherya, Apaapulu yaanalapela miluku miraru, naari, amuluku araru mwa mmoha. Olelo, nihusiho ntokotoko na ikerexa sincipale ti Oraru. Nyenya mwawiiweyaxa, Piipiliya onahusiha wi oriwo Muluku eeparipari mmoharu, Yehova, nave wi Yesu Kiristu ti Mwanawe. (Yohani 17:3) Apaapulu tho yaanaroromela wi achu aakhalano echu yoohooneya enavuluwa va okhwa wa mwiili nave enanwerya ohooxeya o nipuro na cukucha. Olelo, ikerexa sincipale sinahusiha wi muchu akhwa ennakhuma echu yoohooneya naari munepa woohikhwa onawerya ohooxeya mu cukucha a mooro.

¹⁸ Vawoona wi malapelo a Paapulu akhalai yaamwalamwala veelaponi yavathi, olelo Paapulu Mutokotoko onanwerya oromoliwa ntoko olamulelo wa elapo yoothene wa malapelo atheru. Nave Muluku ooloherya wi olamulelo wa elapo yoothene wa malapelo atheru onahaala omala mootutuxa. Munnoona ntakhara heeni okhanlaaya woochuneya vancipale okhuma mu makupa ari oothene a Paapulu Mutokotoko? Yehova Muluku onachuna wi nyuwo ‘nvinyemo’ mwawaakuveya elukuluku ehaakumve omala.—Mwaalakhanye Wupulula 18:4.

19. Munahaala ophura eheeni moorweela wa omurumeela Yehova?

¹⁹ Nthowa na othanla wanyu ohiya weera malapelo atheru, achu akina akhweya anahaala ohiya waataana ni nyuwo. Vanonto, moorweela wa omurumeela Yehova vamoha ni achu awe, nyuwo munahaala ophura vancipale opwaha seiyo muyeleelaanyu. Hiihaa ntoko oohuserya oopacerya a Yesu yaawo yaahin’ye ichu ikina wi emuchare yoowo, nyuwo munahaala okhalano anna ni arokora ancipale oomunepani. Munahaala tho opaka makupa a emusi etokotoko ya elapo yoothene ya macikhwi mancipale a Akiristu eeparipari, yaawo anooniherya wa nyuwo osivela weeparipari. Nave munahaala okhalano ewehereryo yootikiniha ya okumi woohimala “omwahiyu.” (Mwaalakhanye Marko 10:28-30.) Akhweya voovira wa elukuluku, yaale enii yoohiyeeni nthowa na soororomela sanyu anahaala waalikhela yeeyo Piipiliya onahusiheiye ni okhala arummwa a Yehova.

20. Mano ewehereryo taani ya muhoolo achu yaale aneerano malapelo eeparipari anawehereryaaya?

²⁰ Piipiliya onahusiha wi moohilekela Muluku onahaala oruuha makuchuwelo a elapo ela ya Satana nave onahaala oraceela ela ni elapo yahiihaano ya ekhaikhai enahaala olamuleliwa ni Omwene awe. (1 Pedro 3:9, 13) Elapo eyo enahaala okhala yootikiniha vancipale! Nave mu elapo eyo ya ekhaikhai, onahaala okhalamo malapelo mamoha pahiru, mukhalelo mmoha wa malapelo eeparipari. Tahi echu ya miruku wa nyuwo wi mwiilipixerye wi muthukumane ni alapeli eeparipari hiihaano vaava?

[Nsu na vathi]

PIIPILIYA ONAHUSIHA EHEENI

▪ Orivo malapelo eeparipari mamoha pahiru.—Mateu 7:13, 14.

▪ Malapelo eeparipari anasuweliwa moorweela wa soohusiha saya ni saweera saya.—Mateu 7:16, 17.

▪ Anamoona a Yehova anneerano malapelo aneemereryiwa ti Muluku.—Isaiya 43:10.

[Ekaaxa va epaaxina 147]

YAALE ANAMULAPELA MULUKU EEPARIPARI

▪ anathipela soohusiha saya Mpiipiliyani

▪ anamulapela pahiru Yehova nave anneeriha nsina nawe osuweliwa

▪ annooniherya osivela weeparipari wa mukina ni mukhwaawe

▪ annamweemererya Yesu Kiristu ntoko ephiro ya Muluku ya ovuluxa

▪ hanapaka makupa a elapo

▪ annalaleerya Omwene wa Muluku ntoko ewehereryo emoharu ya nloko na achu

[Eruku va epaaxina 150]

Moorweela wa omurumeela Yehova vamoha ni achu awe, nyuwo munahaala opuha vancipale opwaha seiyo muyeleenlaanyu